Kumbi Tingachita Wuli Kuti Tilutirizgi Kuja Ndi Mtima ‘Wakulindizga’?

“Ndilindizgengi.”—MIKA 7:7.

KUMBI MUNGAMUKA WULI?

Kumbi tingasambiranji pa chakuwoniyapu chaku Mika?

Kumbi tilindizga kuwona vakuchitika nivi?

Kumbi tingalongo wuli kuti tiwonga kuzizipizga kwaku Yehova?

1. Nchinthu wuli cho chingatichitiska kuti tileki kuzizipizga?

MAZUŴA ngakumaliya nga mgonezi waku Satana ngangwamba mu 1914, Ufumu Wakuwusika ndi Mesiya wati wajalikiskika. Pa nyengu iyi, kuchanya kunguchitika nkhondu ndipu Yesu wanguponya Diabolo ndi mademoni ngaki pacharu chapasi. (Ŵerengani Chivumbuzi 12:7-9.) Satana waziŵa kuti “nyengu yaki njimanavi.” (Chiv. 12:12) Kweni “nyengu” yeniyi yajapu kwa vyaka pafufupi 100 ndipu anyaki akhoza kuwona kuti mazuŵa ngakumaliya ngato nyengu yitali ukongwa. Pa nyengu yo tilindizga Yehova kuti watuzgepu mgonezi waku Satana, kumbi taleka kuzizipizga?

2. Kumbi tisambirengenji m’nkhani iyi?

² Kuleka kuzizipizga kungaŵa kwakofya chifukwa kungachitiska kuti tichitengi vinthu mwakupupuluma. Kumbi tingachita wuli kuti tilutirizgi kuja ndi mtima wakulindizga? Nkhani iyi yitiwovyengi kuja ndi mtima wakulindizga chifukwa yimukengi mafumbu yanga. (1) Kumbi tingasambiranji pa chakuwoniyapu chaku Mika? (2)  Kumbi ndi vinthu nivi vo vazamulongo kuti umari we pafupi? (3) Kumbi tingalongo wuli kuti tiwonga kuzizipizga kwaku Yehova?

KUMBI TINGASAMBIRANJI PA CHAKUWONIYAPU CHAKU MIKA?

3. Kumbi vinthu venga wuli mu Yisraele mu nyengu yaku Mika?

³Ŵerengani Mika 7:2-6. Mchimi Mika wawonanga vinthu vichinangika mu Yisraele pa nkhani yakuteŵete Chiuta. Ndipu vinthu vingunangikiya limu m’nyengu ya fumu yiheni Ahazi. Mika wanguyeruzgiya Ayisraele ambula kugomezgeka ndi “lisitu laminga.” Nge mo lisitu laminga lihome weyosi yo walikwaska, Ayisraele aheni yaŵa achitanga vinthu vakupweteka munthu weyosi. Achitanga vinthu vinandi vambula urunji ndipu vatimbanyizganga mabanja.  Mika waziŵanga kuti palivi cho wangachita pakuyija kuti wasinthi vinthu. Mwaviyo, wanguromba kwaku Yehova ndipu wangulindizga kuti Chiuta wanozgi vinthu. Iyu waziŵanga kuti Yehova wanozgengi vinthu pa nyengu Yaki.

4. Kumbi tikumana ndi masuzgu wuli?

⁴ Nasi tija ndi ŵanthu akujanja nge wo ŵengaku mu nyengu yaku Mika. Anandi mbambula “kuwonga, ŵambula ukhovu, ŵazira chanju chakawi.” (2 Tim. 3:2) Tiguŵa asani tiwona kuti anyidu a ku nchitu, kusukulu kweniso wo tikuzengezgana nawu, mbakujanja. Kweni ateŵeti anyaki aku Chiuta akumana ndi masuzgu ngakuluska ngenanga. Yesu wangukamba kuti wo atimulondo, azamususkika ndi ŵanthu a m’banja lawu ndipu wangugwiriskiya nchitu mazu ngakuyanana ndi ngo nge pa Mika 7:6 pakukonkhoska mo uthenga waki wazamukwaskiya ŵanthu. Yesu wakukamba kuti: “Ndikuziya kwazigawuskana mwana munthurumi ku wiski, ndi mwana munthukazi ku nyina, mkumwana ku mpongozi waki; ndipu ŵamawongu ŵa munthu ŵaŵengi ŵamunyumba yaki.” (Mat. 10:35, 36) Asani ŵanthu a m’banja lidu wo Mbakaboni cha atitinyoza kweniso atitisuska, vija vakusuzga ukongwa kukunthiyapu. Asani tikumana ndi mayeseru ngaviyo yanga, tingatheranga cha. M’malu mwaki, tikhumbika kulutirizga kuja akugomezgeka ndi kulindizga kuti Yehova wanozgi vinthu. Asani nyengu zosi titimupempha kuti watiwovyi, watipaskengi nthazi kweniso zeru zo zingatiwovya kukunthiyapu.

5, 6. Kumbi Yehova wangumutumbika wuli Mika, kweni ndi vinthu nivi vo Mika wanguleka kuwona?

⁵ Yehova wangutumbika Mika chifukwa chakuti wenga wakuzizipizga. Fumu Ahazi yingufwa ndipu muwusu waki uheni nawu ungumala. Mika wanguwona venivi vichichitika ndipu wanguwona so Fumu Hezekiya, mwana wamampha waku Ahazi wachihara mpandu wachifumu ndi kuwezgiyapu kusopa kwauneneska. Ndipu uthenga wacheruzgu wakukwaskana ndi msumba wa Samariya wo Yehova wangukamba kuporote mwaku Mika, ungufiskika pa nyengu yo Asiriya anguthereske ufumu wa kunkhondi wa Yisraele.—Mika 1:6.

⁶ Kweni Mika wanguwona kufiskika kwa mauchimi ngosi cha ngo Yehova wangumukambiya. Mwakuyeruzgiyapu, Mika wangulemba kuti: “Mu mazuŵa ngakumariya phiri la nyumba ya Ambuya likamikikanga kuŵa litali kuruska mapiri ngosi, ndipu likatumphuskikanga kuŵa litali kuruska mapiri ngosi; ndipu ŵanthu ŵamundonde kwaku lo, ndi mitundu yinandi yikazanga ndi kunena kuti: ‘Tiyeni tikwere ku phiri la Ambuya.’” (Mika 4:1, 2) Mika wangufwa uchimi uwu wechendafiskiki. Kweni iyu wangusimikizga mtima kuti wajengi wakugomezgeka kwaku Yehova mpaka nyifwa, chinanga kuti ŵanthu wo wajanga nawu achitanga vinthu viheni. Mika wangulemba kuti: “Mitundu yosi ya ŵanthu, wewosi utenda m’zina laku Chiuta waki, kweni ifwi tiyendengi m’zina la Ambuya Chiuta widu muyaya ndi muyaya.” (Mika 4:5) Mika walindizganga mwakuzizipizga mu nyengu yakusuzga iyi chifukwa chakuti wenga ndi chigomezgu chosi kuti Yehova wazamufiska malayizgu Ngaki ngosi. Ivi vilongo kuti mchimi wakugomezgeka uyu, wathembanga nadi Yehova.

7, 8. (a) Nchifukwa wuli titenere kugomezga Yehova? (b) Nchinthu wuli cho chichitiskengi kuti nyengu yimali liŵi?

⁷ Kumbi nasi titimugomezga viyo Yehova? Titenere nadi kumugomezga chifukwa chakuti tawona kufiskika kwa uchimi waku Mika. “Mu mazuŵa ngakumariya,” ŵanthu mamiliyoni akutuliya mu mitundu, mafuku ndi manenedu ngosi aja achindonde ku “phiri la nyumba ya Ambuya.” Chinanga kuti ŵanthu yaŵa atuliya mu mitundu yo yitinkhana, yiwu asula “malipanga ngawu kuŵa mayembi” ndipu akaniya limu kusambira “nkhondu.” (Mika 4:3) Te ndi mwaŵi ukulu ukongwa kuja m’gulu la ŵanthu aku Yehova achimangu.

 ⁸ Tikhumba nadi kuti Yehova watuzgepu mgonezi uheni uwu pambula kuswera yapa. Kweni kuti tilindizgi mwakuzizipizga, titenere kuwona vinthu nge mo Yehova wativiwone. Iyu wakuŵika zuŵa lo wazamuyeruzgiya ŵanthu wosi mwakugwiriskiya nchitu “munthu yo wamumika,” Yesu Khristu. (Mac. 17:31) Kweni ivi vechendachitiki, Chiuta wapaska ŵanthu amitundu yosi mwaŵi wakuti afiki pa “mziŵiru wa uneneska,” agwiriskiyi nchitu vo asambira ndi kuzitaskika. (Ŵerengani 1 Timote 2:3, 4.) Asani titangwamika ndi nchitu yakovya ŵanthu kuziŵa Chiuta, tiwonengi kuti nyengu yakuti Yehova wayeruzgiyi mtundu wa ŵanthu yiswera cha. Ndipu yazamuja nge yamala mwamabuchibuchi ŵaka. Asani nyengu iyi yazikwana, tazamukondwa ukongwa kuti tingutangwamika ndi nchitu yakupharazga Ufumu.

KUMBI NDI VINTHU NIVI VO VAZAMULONGO KUTI UMARI WE PAFUPI?

9-11. Kumbi lemba la 1 Ŵatesalonika 5:3 likufiskika? Konkhoskani.

⁹Ŵerengani 1 Ŵatesalonika 5:1-3. Pambula kuswera yapa, mitundu yazamukamba kuti, ‘Chimangu ndi wanangwa!’ Kuti tizileki kubuchizgika ndi kukambulizga uku, “tije masu kweniso tiŵanaŵanengi umampha.” (1 Ŵat. 5:6, NW) Kuti tileki kugona mwauzimu, tiyeni tikambiskani vinthu vo vichitiskengi kuti ŵanthu akambulizgi.

¹⁰ Nkhondu ziŵi za pacharu chosi zati zamala, mitundu yosi ya ŵanthu yakhumbisiskanga kuja mwachimangu. Nkhondu yakwamba yapacharu chosi yati yamala, wupu wa League of Nations ungupangika ndi chilatu chakujalikiska chimangu pacharu. Pavuli paki, nkhondu yachiŵi yapacharu chosi yati yamala, ŵanthu agomezganga kuti wupu wa United Nations uwovyengi kuti pacharu paje chimangu. Alongozgi a visopa kweniso a vyaru, aja achithemba mawupu yanga kuti ndingu ngajalikiskengi chimangu pacharu. Mwakuyeruzgiyapu, wupu wa United Nations ungukamba kuti chaka cha 1986, chenga Chaka Chachimangu cha Charu Chosi. M’chaka ichi, alongozgi a vyaru ndi visopa vinandi anguchikumana ndi mura wa Tchalitchi la Katolika ku Assisi m’charu cha Italy, kuti akarombe chimangu.

 ¹¹ Kweni mazu ngakukwaskana ndi chimangu kweniso wanangwa ngo ŵanthu yaŵa angukamba, ngakufiska cha uchimi wa pa 1 Ŵatesalonika 5:3. Nchifukwa wuli tikamba viyo? Chifukwa chakuti ‘phasulu . . . lakubuchizga’ lechendachitiki.

12. Kumbi tiziŵanji pa nkhani ya kukambulizgika kwa mazu ngakuti “Chimangu ndi wanangwa”?

¹² Kumbi mbayani wo azamukambulizga kuti “Chimangu ndi wanangwa”? Kumbi alongozgi a Visopa va Chikhristu kweniso visopa vinyaki azamukambulaku? Nanga alongozgi a vyaru, kumbi nawu azamukambulaku? Malemba ngakambapu chechosi pa nkhani iyi. Kweni vo tiziŵa vakuti chimangu chaki chazamuja chaboza, chinanga angazikambula mu nthowa wuli pamwenga angazikamba mazu ngakukhorweska wuli. Mgonezi wunu ulutirizgengi kuja m’manja mwaku Satana. Charu ichi chikuvundiya limu ndipu chilutirizgengi kuja viyo. Vingaŵa vakupaska chitima ukongwa asani weyosi waku isi wangagomezga maboza ngaku Satana ndi kuserere mu vakuchitika va ndali.

13. Nchifukwa wuli angelu ako mphepu za chisuzgu chikulu?

¹³Ŵerengani Chivumbuzi 7:1-4. Penipo tilindizga kufiskika kwa lemba la 1 Ŵatesalonika 5:3, angelu anthazi ako mphepu za chisuzgu chikulu. Kumbi alindizganji? Wakutumika Yohane wakukonkhoska kuti chinthu chakukhumbika ukongwa cho chitenere kuchitika dankha, nkhuzighiriya “ŵaŵanda ŵaku Chiuta widu” kakumaliya. * Angelu azamutaya mphepu za chisuzgu chikulu asani kuzighiriya kwakumaliya kwamala. Sonu nchinthu wuli cho chazamuchitika pavuli paki?

14. Nchinthu wuli cho chilongo kuti Babiloni Mukuru we pafupi kubwangandulika?

¹⁴ Babiloni Mukuru, yo wamiya visopa vosi vaboza, wazamubwangandulika. “Makamu, ndi mizinda, ndi mitundu, ndi marongororedu” ngosi nga ŵanthu ngazakumuwovya so cha. Pasonu panu tiwona maukaboni ngakulongo kuti waja nadi kamanavi kubwangandulika. (Chiv. 16:12; 17:15-18; 18:7, 8, 21) Ndipu uneneska ngwakuti nkhani zo zikambika m’mawayilesi, m’manyuzipepala, pa Intaneti kweniso pa TV, zilongo kuti ŵanthu ayamba kususka ndi kuyukiya visopa kweniso alongozgi a visopa. Kweni alongozgi a Babiloni Mukuru awona kuti palivi chakofya chechosi. Yiwu atijipusika ukongwa! Asani azikambula kuti “Chimangu ndi wanangwa,” andali a mugonezi waku Satana azamuyukiya visopa vaboza mwamabuchibuchi ndipu azakuvituzgiyapu limu. Babiloni Mukuru wazamuwoneka so cha! Mwaviyo, tingachita umampha kulindizga mwakuzizipizga vakuchitika vakukhumbika venivi.—Chiv. 18:8, 10.

KUMBI TINGALONGO WULI KUTI TIWONGA KUZIZIPIZGA KWAKU CHIUTA?

15. Nchifukwa wuli Yehova wazizipizga?

¹⁵ Yehova walindizga mwakuzizipizga nyengu yamampha yakuti watuzgepu mugonezi uheni uwu, chinanga kuti ŵanthu anyoza zina laki. Iyu wakhumba cha kuti ŵanthu a mtima wamampha azinangiki. (2 Pet. 3:9, 10) Kumbi nasi tiŵanaŵana viyo? Zuŵa laku Yehova lechendazi, tingalongo kuti tiwonga kuzizipizga kwaki mu nthowa izi:

16, 17. (a) Nchifukwa wuli tikhumbika kovya ŵanthu akulopwa? (b) Nchifukwa wuli akulopwa atenere kuwere kwaku Yehova mwaliŵi?

¹⁶ Kovya akulopwa. Yesu wangukamba kuti kuchanya kuja likondwa asani mbereri yimoza yo yinguwala yasanirika. (Mat. 18:14; Luka 15:3-7) Ivi vilongo kuti Yehova waphwere ukongwa ŵanthu wo atanja zina laki chinanga kuti pasonu panu mbakulopwa. Asani titovya akulopwa kuti awere mu mpingu, tichitiska kuti Yehova ndi angelu akondwengi.

¹⁷ Kumbi namwi mwe m’gulu la ŵanthu wo akulopwa? Akhumba mukuleka kuwungana ndi gulu laku Yehova chifukwa chakuti munthu  munyaki wangukuguŵiskani. Sonu pakuti pajumpha nyengu, jifumbeni kuti: ‘Kumbi sonu ndikondwa ukongwa kuruska kali? Kumbi yo wangundiguŵiska ndi Yehova pamwenga munthu wambula kufikapu? Kumbi Yehova Chiuta wakundichitiyapu chinthu chiheni chechosi?’ Kukamba uneneska, nyengu zosi watitichitiya vinthu vamampha. Iyu watitizomerezga kuti tikondwengi ndi vinthu vamampha vo wapereka chinanga kuti titondeka kuchita vinthu mwakukoliyana ndi kujipereka kwidu. (Yak. 1:16, 17) Zuŵa laku Yehova laja kamanavi kuza. Ndipu sonu ndiyu nyengu yakuwere kwa Awuskefwi akuchanya kweniso kumpingu, chifukwa chakuti ndingu malu ngamampha ngo titenere kusanirikaku m’mazuŵa ngakumaliya nganu.—Mar. 33:27; Ŵah. 10:24, 25.

18. Nchifukwa wuli titenere kuvwiya wo atitilongozga?

¹⁸ Kuvwiya wo atitilongozga. Yehova ndi Muliska wachanju ndipu watitilongozga kweniso kutivikiliya. Iyu wakusankha Mwana waki kuja Muliska Mura wa mskambu. (1 Pet. 5:4) Ŵara wo ateŵete mumipingu yakujumpha 100,000 atesesa kuphwere mbereri yaku Chiuta yeyosi pakuyija. (Mac. 20:28) Asani tivwiya ŵara wo atitilongozga, tilongo kuti tiwonga vosi vo Yehova ndi Yesu atitichitiya.

19. Kumbi tingachita wuli vinthu mwakukoliyana?

¹⁹ Kuchita vinthu mwakukoliyana. Kumbi kung’anamuwanji? Asani gulu la asilikali akusambizika umampha lazingika ndi arwani, msilikali weyosi watesesa kundere kufupi ndi anyaki. Kuchita ivi kutiŵawovya kuti aleki kuthereskeka. Satana wayukiya ukongwa ŵanthu aku Chiuta. Mwaviyo, sonu ndi nyengu yakuti weyosi wachitiyengi vinthu pakuyija cha. Ivi ving’anamuwa kuti titenere kuchita vinthu mwakukoliyana ndi anyidu, tigowokengi asani anyidu atinangiya ndipuso tilongongi kuti tigomezga ulongozgi waku Yehova.

20. Kumbi sonu titenere kuchitanji?

²⁰ Tiyeni tosi tilutirizgi kuja masu ndi kulongo mtima wakulindizga. Tilutirizgi kulindizga mwakuzizipizga mazu ngakuti, ‘Chimangu ndi wanangwa!’ kweniso kuzighirika kwakumaliya kwa Akhristu akusankhika. Asani ivi vajumphapu, angelu ŵanayi azamufwatuwa mphepu za chisuzgu chikulu ndipu Babiloni Mukuru wazamubwangandulika. Pa nyengu yo tikhazga vakuchitika vakukhumbika ivi, tiyeni tilutirizga kuvwiya ulongozgi wakutuliya ku ŵara wo atitilongozga m’gulu laku Yehova. Tichitengi vinthu mwakukoliyana, kuti Satana ndi mademoni ngaki aleki kutithereska! Sonu ndi nyengu yakuvwiya ulongozgi wo wakulemba Sumu wangukamba, kuti: “Muŵi ŵanthazi, ndipu khwimani mtima, mosi mwa ŵakulindizga Ambuya!”—Sumu 31:24.

[Mazu ngam’mphata]

[Mafumbu]

[Chithuzi papeji 12]

[Chithuzi papeji 14]

Ateŵeti aku Yehova atesesa kovya akulopwa kuti awere kwaku Yehova (Wonani ndimi 16, 17)

[Chithuzi papeji 16]

Sonu ndi nyengu yakuti tichitengi vinthu mwakukoliyana, kuti Satana ndi mademoni ngaki aleki kutithereska (Wonani ndimi 19)