1. Kumbi ŵanthu anandi atijipereka pa vinthu nivi, nanga nchifukwa wuli?

 ŴANTHU atijipereka pa vinthu vo awona kuti vakukhumbika kwaku yiwu. Apapi amaliya nyengu, ndalama ndi nthazi zawu kuti awovyi ŵana ŵawu. Ampupuka anyaki zuŵa ndi zuŵa amaliya nyengu yawu kunozgeke ndi kusambira masaza kuti akamiyi charu chawu pa nyengu ya maphara penipo anyawu aseŵe ŵaka ndi kuchezga. Yesu nayu wangujipereka pa vinthu vo venga vakukhumbika kwaku iyu. Iyu wapenjanga vinthu vapachanya cha ndipuso wengavi ŵana. M’malu mwaki, wangusankha kuŵika mtima waki wosi pa nchitu za Ufumu. (Mat. 4:17; Luka 9:58) Akumulondo ŵaki nawu angusiya kuchita vinthu vinandi kuti awovyi Ufumu waku Chiuta. Kugwira nchitu za Ufumu chenga chinthu chakwamba pa umoyu wawu ndipu anguyesesa kujipereka kuti awovyi Ufumu wenuwu. (Mat. 4:18-22; 19:27) Mwaviyo, tingajifumba kuti, ‘Nchinthu wuli chakukhumbika ukongwa pa umoyu wangu?’

2. (a) Kumbi nkhujipereka wuli ko Akhristu wosi auneneska akhumbika kuchita? (b) Kumbi ndi nchitu nizi zakusazgiyapu zo anyaki achita?

² Kujipereka kunyaki nkhwakukhumbika kwa Akhristu wosi auneneska chifukwa kutiŵawovya kuti alutirizgi kuja pa ubwezi wakukho ndi Yehova. Kujipereka kwa viyo, kusazgapu kugwiriskiya nchitu nyengu ndi nthazi zidu pa kuromba, kuŵerenga Bayibolo, kuchita kusopa kwa pabanja, kuwungana kweniso kupharazga. a (Yos. 1:8; Mat. 28:19, 20; Ŵah. 10:24, 25) Nchitu yakupharazga yiluta panthazi chifukwa chakuti Yehova watititumbika kweniso chifukwa cha phamphu lo tenalu ndipu anandi alutirizga kundonde ku “phiri la nyumba ya Ambuya [Yehova].” (Yes. 2:2) Kuti awovyi nchitu za Ufumu, anandi atijipereka kuchiteŵete pa Beteli, kovya kuzenga Nyumba za Ufumu ndi Malu nga Unganu, kunozga mawunganu ngakulungakulu pamwenga kuwovya asani kwachitika  ngozi zachilengedu. Nchitu zakusazgiyapu zenizi, zakukhumbika chifukwa zitovya nchitu za Ufumu kweni ndizu cha zo zingatichitiska kuti tizilonde umoyu wamuyaya.

3. (a) Kumbi tisaniya vitumbiku wuli asani titijipereka chifukwa cha Ufumu? (b) Kumbi ndi mafumbu nanga ngo titenere kungaŵanaŵaniya?

³ Mazuŵa nganu, pakhumbika ŵanthu anandi kuti awovyi nchitu za Ufumu kuluska kali. Nchinthu chakukondwesa ukongwa kuwona kuti anandi atijipereka ndi mtima wosi kuti ateŵete Yehova! (Ŵerengani Sumu 54:6.) Mtima wakupaska waviyo, uchitiska kuti tije ndi likondwa po tilindizga kuza kwa Ufumu waku Chiuta. (Mar. 16:15; Mac. 20:35) Chinanga kuti ve viyo, tosi tikhumbika kujisanda mwakuphwere. Kumbi tiwona kuti pe vinthu vo tingachita kuti tisazgiyeku sembi zo tipereka chifukwa cha Ufumu? Kumbi tigwiriskiya wuli nchitu nyengu, ndalama, nthazi ndi malusu ngidu? Kumbi ndi vinthu wuli vo tikhumbika kuphwere navu? Tiyeni tikambiskani vo anyidu anguchita, vo vingatiwovya kupereka sembi zakukhumba tija kuti tilutirizgi kukondwa.

4. Kumbi Ayisraele ayanduwanga wuli ndi sembi zo aperekanga?

⁴ Ayisraele a mu nyengu yakali aperekanga sembi kuti agowokereki maubudi ngawu. Ŵanthu akhumbikanga so kupereka sembi kuti Yehova waŵayanji. Zinyaki mwa sembi zenizi, aperekanga chifukwa lenga dangu penipo zinyaki achitanga kukhumba ŵija. (Ŵal. 23:37, 38) Sembi zinyaki zakupiriza zaperekekanga nge vawanangwa kwaku Yehova ndipu zinyaki ŵanthu aperekanga mwakukhumba ŵija. Chakuwoniyapu cha sembi zo zaperekekanga kwaku Yehova ndi cho chinguchitika pa nyengu yo apatuliyanga nyumba yakusopiyamu yo Solomoni wanguzenga.—2 Mik. 7:4-6.

5. Kumbi ndi dangu wuli lo Yehova wangupereka ku ŵanthu asauchi?

⁵ Yehova waziŵanga kuti weyosi wangapereka mwakuyanana cha. Iyu wakhumbanga kuti munthu weyosi waperekengi vo wangafiska. Dangu laku Yehova lakambanga kuti nyama zakhumbikanga kuchinjika kuti ndopa zituwi, venivi venga ‘chizgezgi cha vamampha vo vinguza’ kuporote mwa Mwana waki Yesu. (Ŵah. 10:1-4) Yehova wenga wakuwoloŵa pa dangu lo wangujalikiska. Mwakuyeruzgiyapu, iyu wazomerezganga kuti munthu waperekengi sembi ya viwunda va nkhunda asani watondeka kupereka sembi ya nyama. Venivi vachitiskanga kuti chinanga ndi musawuchi waperekengi sembi mwalikondwa kwaku Yehova. (Ŵal. 1:3, 10, 14;  5:7) Chinanga kuti nyama zo aperekanga sembi zapambananga, penga vinthu viŵi vo munthu wakhumbikanga kuchita asani wapereka sembi mwakukhumba yija.

6. Kumbi munthu wakhumbikanga kuchitanji asani wapereka sembi, nanga nchifukwa wuli wakhumbikanga kulondo marangu ngo ngengapu?

⁶ Chakwamba, munthu wakhumbikanga kupereka sembi yamampha ukongwa. Yehova wangukambiya Ayisraele kuti sembi yosi yo atingi aperekengi yakhumbikanga kuŵa yamampha kuti yije ‘yakulondereka.’ (Ŵal. 22:18-20) Asani nyama njakupunduka Yehova wayilondiyanga cha. Chachiŵi, munthu yo waperekanga sembi wakhumbikanga kuja wambula kufipiskika. Asani munthu ngwakufipiskika, wakhumbikanga kupereka sembi ya ubudi kuti waje so pa ubwezi ndi Yehova wechendapereki sembi yakukhumba yija. (Ŵal. 5:5, 6, 15) Iyi yenga nkhani yikulu ukongwa. Yehova wangulangula kuti asani munthu ngwakufipiskika, waryaku sembi ya chimangu yo yasazgangapu sembi zawanangwa, wakhumbikanga kubayika. (Ŵal. 7:20, 21) Ndipu asani munthu yo waperekanga sembi wenga pa ubwezi wakukho ndi Yehova ndipuso sembi yaki yenga yamampha, wakondwanga ukongwa.​—Ŵerengani 1 Mikoka 29:9.

7, 8. (a) Kumbi tisaniya likondwa wuli asani titijipereka ku nchitu za Ufumu? (b) Kumbi ndi vinthu wuli vo te navu?

⁷ Mazuŵa nganu, ŵanthu anandi atijipereka ndi mtima wosi kuti ateŵete Yehova ndipu iyu wakondwa ukongwa ndi venivi. Kuwovya abali ŵidu kuzisa vitumbiku. Mubali munyaki yo wazenga nawu Nyumba za Ufumu ndipuso watovya asani kwachitika ngozi zachilengedu, wangukamba kuti wakondwa ukongwa chifukwa chakuteŵete abali mu nthowa zenizi. Iyu wanguti, “Asani abali ndi azichi akondwa ndi kuwonga chifukwa chakuti ŵe ndi Nyumba ya Ufumu yifya pamwenga asani alonde chovyu chifukwa cha ngozi yachilengedu yo yaŵachitikiya, ndiwona kuti nthazi ndipuso nchitu yosi yo ndagwira valuta paŵaka cha.”

⁸ Gulu laku Yehova la mazuŵa nganu, nyengu zosi litesesa kusaniya nthowa zakuwovye nchitu yaku Yehova. Mu 1904, Mubali C. T. Russell wangukamba kuti: “Weyosi wakhumbika kuziŵa kuti wakusankhika ndi Ambuya ndipu we ndi udindu wakugwiriskiya nchitu umampha nyengu, nthazi, ndalama ndipuso vinthu vinyaki, weyosi wakhumbika kugwiriskiya nchitu vinthu venivi mwakukwana kuti wakankhuski Ambuya.” Chinanga  kuti tisaniya vitumbiku vinandi kweni tichitapu kanthu kuti tipereki sembi kwaku Yehova. (2 Sam. 24:21-24) Mwaviyo, tikhumbika kugwiriskiya nchitu umampha vinthu vo tenavu.

9. Pa nkhani yakugwiriskiya nchitu nyengu, kumbi ndi ulongozgi nuwu waku Yesu wo we pa Luka 10:2-4, wo tingawugwiriskiya nchitu?

⁹ Nyengu yidu. Abali ndi azichi amaliya nyengu yinandi ndipuso nthazi kuti afwatuliyi ndi kusindikiza mabuku ngidu, kuzenga malu ngakusopiyapu, kunozga mawunganu ngakulungakulu, kuwovya asani kwachitika ngozi zachilengedu ndipuso kugwira nchitu zinyaki zinandi zo zikhumbika. Te ndi maola ngamanavi pa zuŵa. Pa nyengu yo watumanga akusambira ŵaki kuti akapharazgi, Yesu wangukamba fundu yo yingatiwovya. Iyu wanguŵakambiya kuti: “Mungendamutawuzga nanga njumoza cha mu nthowa.” (Luka 10:2-4) Nchifukwa wuli Yesu wangupereka ulongozgi waviyo? Munthu munyaki wakuziŵa ukongwa mbiri ya Bayibolo wangukamba kuti: “Mo ŵanthu a ku mulenji kwa Asia aperekiyanga moni kali, vipambana ndi mo tipereke mazuŵa nganu. Le tikotama ŵaka kamanavi ndipuso tipaskana moni wa m’manja. Kali avumbatiyananga mwakuwerezgawerezga, agwadanga ndi kusindama mpaka pasi ndipu achitanga so vinandi. Vinthu vosi venivi vakhumbanga nyengu.” Yesu wachiskanga akusambira ŵaki kuti achitengi mtafu cha. M’malu mwaki, waŵawovyanga kuziŵa kuti ŵe ndi nyengu yimanavi ndipu akhumbikanga kuti ayigwiriskiyi nchitu pa vinthu vakukhumbika. (Ŵaef. 5:16) Kumbi nasi tingagwiriskiya nchitu ulongozgi wenuwu kuti tije ndi nyengu yakukwana yakuwovye nchitu za Ufumu?

10, 11. (a) Kumbi ndalama zo tipereka za nchitu ya pacharu chosi zigwira nchitu wuli? (b) Kumbi ndi ulongozgi wuli wo usanirika pa 1 Ŵakorinte 16:1, 2, wo ungatiwovya?

¹⁰ Ndalama zidu. Pakhumbika ndalama zinandi zakuwovye nchitu za Ufumu. Chaka chechosi ndalama mamiliyoni nganandi zigwiriskikiya nchitu kuphwere akuwonere vigaŵa ndi dera, apayiniya apade ndipuso amishonale. Kwambiya m’chaka cha 1999, Nyumba za Ufumu zakujumpha 24,500 zazengeka muvyaru vikavu. Kweni pakhumbika so Nyumba za Ufumu pafupifupi 6,400. Magazini ngakujumpha 100 miliyoni nga Chigongwi cha Alinda ndi Galamukani! ngasindikizika mwezi wewosi. Vosi ivi vichitika chifukwa cha ndalama zo mupereka mwakukhumba kwinu.

¹¹ Wakutumika Paulo, wangukamba ulongozgi wo titenere kuwugwiriskiya nchitu pa nkhani yakupereka ndalama. (Ŵerengani 1 Ŵakorinte 16:1, 2.) Mwakukambirika, Paulo wanguchiska abali ŵaki a ku Korinte kuti akhumbikanga cha kulindizga mpaka pakumaliya pa sabata kuti awoni ndalama zo zajaku. M’malu mwaki, akhumbikanga kusunga ndalama kukwambiriya kwa sabata mwakukoliyana ndi vo atingi afiskengi. Mazuŵa nganu, abali ndi azichi anozgeke kusunga ndalama zo angapereka malinga ndi mo asaniriya. (Luka 21:1-4; Mac. 4:32-35) Yehova wawonga ukongwa mtima wakupaska wenuwu.

12, 13. Kumbi ndi maŵanaŵanu wuli ngo ngangachitiska anyaki kuti aleki kugwiriskiya nchitu nthazi ndi malusu ngawu, nanga Yehova waŵawovyengi wuli?

¹² Nthazi ndipuso malusu ngidu. Asani tichita phamphu, Yehova watiwovyengi kuti tigwiriskiyengi nchitu nthazi ndi malusu ngidu kuti tiwovyi nchitu za Ufumu. Iyu watitilayizga kuti watiwovyengi asani tavuka. (Yes. 40:29-31) Kumbi tiwona kuti tilivi malusu ngo tingagwiriskiya nchitu kuti tiwovyi nchitu za Ufumu? Kumbi tiŵanaŵana kuti pe anyaki wo ŵe ndi malusu kuluska isi? Kumbukani kuti Yehova wangasazgiyaku lusu lidu lo tikuwa nalu nge mo wanguchitiya ndi Bezalele kweniso Oholiaba.​—Chit. 31:1-6; wonani chithuzi cho che papeji 13.

¹³ Yehova watitichiska kuti tingalekanga cha kupereka chechosi cho tingafiska. (Nthanthi 3:27) Pa nyengu yo azenganga so nyumba yakusopiyamu, Yehova wangukambiya Ayuda ku  Yerusalemu kuti aŵanaŵaniyengi nchitu yo ŵenga nayu. (Hag. 1:2-5) Yiwu achitanga vinthu vinyaki ndipu anguleka kuŵikiyapu mtima pa nchitu yo agwiranga. Tingachita umampha kuyesesa kuti vo tikhumba vitenere cha kusere m’malu mwaku vo Yehova wakhumba. Kumbi ‘tingaŵanaŵaniya mo tijaliya’ kuti tichiti vinandi pa nchitu ya Ufumu m’mazuŵa nganu ngakumaliya?

14, 15. (a) Kumbi tichiskika wuli ndi vo abali ŵidu akavu anguchita? (b) Kumbi isi tikhumbika kuchitanji?

¹⁴ Ŵanthu anandi aja muvyaru vikavu pamwenga mo mwe masuzgu ngakulu. Gulu lidu litesesa kuwovya abali ŵidu wo aja muvyaru venivi. (2 Ŵakor. 8:14) Abali wo mbakavu nawu awona kuti kupaska, nchinthu chamampha. Yehova wakondwa ukongwa asani abali wo mbakavu apaska kutuliya pasi pa mtima.​—2 Ŵakor. 9:7.

¹⁵ Abali anyaki m’charu chikavu ukongwa ku Africa, angugaŵa madimba ngawu kuti rwandi linyaki aguliskengi vo akolora. Ndalama zo asaniyanga, zawovyanga pa nchitu za Ufumu. M’charu chenichi mwakhumbikanga kuzengeka Nyumba ya Ufumu. Abali ndi azichi akweniko akhumbanga kuwovya. Kweni nchitu yeniyi yakhumbikanga kuchitika mu nyengu yakupandiya mbewu zawu. Yiwu anguyesesa kuwovya nchitu yeniyi, musana agwiranga nchitu yakuzenga Nyumba ya Ufumu ndipu mazulu akanga kuminda yawu kuchipanda mbewu. Abali ndi azichi ŵenaŵa angujipereka ukongwa! Venivi vititikumbuska vo anguchita abali a ku Makedonia, mu nyengu ya akutumika. Chinanga kuti ŵenga “mu ukavu weniukuru” kweni angupempha kuti awovyi nchitu yo yengapu. (2 Ŵakor. 8:1-4) Mwaviyo, nge mo abali ŵenaŵa anguchitiya, weyosi watenere ‘kupereka uli ndi mo usakati wo Ambuya amupaska.’​—Ŵerengani Marangu 16:17.

16. Kumbi tingaziŵa wuli kuti Yehova walonde sembi zidu?

¹⁶ Chinanga kuti ve viyo, tikhumbika kuphwere. Nge mo venge ndi Ayisraele akali, titenere kuyesesa kuti sembi zo tipereka mwakukhumba tija zijengi zakuzomerezgeka ndi Chiuta. Nchifukwa wuli tikhumbika kuŵanaŵaniya fundu yeniyi? Tikhumbika kuchita vinthu mwakwenere kuti tiphweriyengi maudindu ngidu ngakukhumbika ukongwa ngo ndi mabanja ngidu ndipuso kusopa Yehova. Kugwiriskiya nchitu nyengu yidu ndipuso vinthu vo tenavu kuti tiwovyi anyidu kuleki kutitondekeska kovya mabanja ngidu kuja pa ubwezi wakukho ndi Chiuta kweniso kungaphwere mwakuliŵavu. Asani tichita viyo, ndikuti tipereka vinthu vo tilivi. (Ŵerengani 2 Ŵakorinte 8:12.) Kusazgiyapu pa fundu yeniyi, tikhumbika kuyesesa kuja pa ubwezi wakukho ndi Chiuta. (1 Ŵakor. 9:26, 27) Titenere kuziŵa kuti, asani tichita vinthu mwakukoliyana ndi fundu za m’Bayibolo, sembi zidu zizisa likondwa likulu, tija ndi umoyu wamampha kweniso sembi zidu ‘zilondereka’ kwaku Yehova.

17, 18. Kumbi tikhumbika kuchitanji ndi wosi wo atijipereka chifukwa cha Ufumu, ndipu tosi tikhumbika kuŵanaŵaniyanji?

¹⁷ Abali ndi azichi ŵidu anandi ‘atijipunguwa’ nge sembi yakumwa pa vo achita kuti awovyi nchitu zakukhumbika za Ufumu. (Ŵaf. 2:17) Titiŵawonga ukongwa wo alongo mtima wakupaska waviyo. Ŵana kweniso awolu ŵa abali wo alongozga nchitu za Ufumu, akhumbika so kuŵawonga chifukwa cha jalidu lawu lakupaska ndi kujipereka chifukwa cha anyawu.

¹⁸ Tikhumbika kwesesa kuti tiwovyi nchitu za Ufumu. Tiyeni tosi tiyesesi kuromba ndi kuŵanaŵaniya mo tingachitiya kuti tigwirengi nchitu yeniyi kuluska kali. Mungaja ndi chigomezgu kuti mphotu yinu njikulu sonu ndipu yazamukuŵa yikulu ukongwa “mu mgonezi wo utuza” pamwenga kuti m’charu chifya cho chituza.​—Marko 10:28-30.