Betaniya wenga msumba umana wo wenga pa mtunda wa makilomita ngatatu kutuwa ku Yerusalemu. (Yohane 11:18) Kwati kwaja masabata ngamanavi kuti Yesu wafwi, m’msumba uwu munguchitika chinthu chinyaki chakuchitiska chitima. Lazaro yo wenga mubwezi waku Yesu wangutama ukongwa mwamabuchibuchi ndipu wangufwa.

Yesu wati wavwa nkhani iyi, wangukambiya akusambira ŵaki kuti Lazaro wagona tulu ndipu wakhumbanga kuchimuyuska. (Yohane 11:11) Kweni akusambira ŵaki anguvwisisa cha vo wang’anamuwanga. Mwaviyo, Yesu wanguŵakonkhoske mwakuvwika umampha kuti: “Lazaro wakufwa.”​—Yohane 11:14.

Pati pajumpha mazuŵa nganayi kutuliya po angumuŵikiya mumuwunda, Yesu wanguza ku Betaniya kuti wapembuzgi Marta, mzichi waku Lazaro. Marta wangukamba kuti: “Asani mwenga panu Ambuya, mphanyi mzichi wangu kuti wakufwa cha.” (Yohane 11:17, 21) Yesu wangumuka kuti: “Ini ndini chiyuka ndi umoyu; wakuvwana mwaku ini, chingana wangafwa, waŵengi wamoyu.”​—Yohane 11:25.

Kuti walongo kuti vo wangukamba venga vauneneska, Yesu wanguluta pamuwunda ndi kudanirizga kuti: “Lazaro, tuliya kunu kubwaru!” (Yohane 11:43) Ŵanthu wo awoneriyanga anguzizwa kuwona kuti munthu yo wangufwa wayuka.

Pa nyengu iyi, ndipu Yesu wayuskapu kali ŵanthu ŵawi. Nyengu yinyaki wanguyuska mwana munthukazi waku Yairo. Wechendamuyuski, Yesu wangukamba kuti mwana uyu wagona tulu.​—Luka 8:52.

Wonani kuti Yesu wanguyeruzgiya nyifwa yaku Lazaro kweniso ya mwana waku Yairo ndi tulu. Ichi nchakuyeruzgiyapu chakuvwika. Nchifukwa wuli tikamba viyo? Asani munthu wagona, waziŵa chechosi cha ndipu wapumuwa ku urwirwi ndi masuzgu. (Wakutaula 9:5; wonani bokosi lakuti  “Nyifwa Yenge Tulu.”) Akusambira aku Yesu akwamba aziŵanga umampha mo akufwa aliri. Buku linyaki likamba kuti: “Akusambira aku Yesu awonanga nyifwa nge tulu ndipu muwunda awuwonanga nge malu ngakupumuliyaku . . . ŵanthu wo ŵafwa ŵeche kugomezgeka.” a—Encyclopedia of Religion and Ethics.

Tipembuzgika kuziŵa kuti ŵanthu akufwa asuzgika cha kweni agona tulu mumuwunda. Mwaviyo, tiziŵa vo vichitika asani munthu wafwa ndipu titopa cha.

Chinanga kuti tikondwa asani tagona chifukwa chakuti tipumuwa, kweni kumbi ndiyani yo wakhumba kugona mpaka muyaya? Kumbi isi te ndi chilindizga chakuti ŵanthu wo agona mumuwunda azamuyuka ndi kuja so ndi umoyu nge Lazaro ndi mwana waku Yairo?

Jobu nayu wangufumba fumbu lenili wati watama ukongwa. Iyu wangufumba kuti: “Asani munthu wafwa, kumbi wakaŵanga so wamoyu?”​—Jobu 14:14.

Jobu wangujimuka po wakambiskananga ndi Chiuta Wanthazi Zosi kuti: “Mwazamudana, ndipu ndazakukumukani. Mwazamukhumba nchitu ya manja nginu.” (Jobu 14:15, NW) Jobu waziŵanga kuti Yehova ngwakukhumbisiska kuyuska ateŵeti Ŵaki akugomezgeka. Kumbi vo Jobu wangufumba vingachitika nadi? Hinya.

Vo Yesu wanguchita pakuyuska ŵanthu vilongore limu kuti Chiuta wakumupaska nthazi za kutuzgiyapu nyifwa. Bayibolo nalu likamba kuti Yesu sonu we ndi “mijuriru ya nyifwa.” (Chivumbuzi 1:18) Yesu wazamuyuska akufwa nge mo wanguyuskiya Lazaro.

Bayibolo lizumbuwa mwakuwerezgawerezga layizgu la chiyuka. Mungelu wangusimikizgiya mchimi Danyele kuti: “Upumuwengi ndi ukamanga mu malu ngo ngakupaskika kwaku iwi pa umari wa mazuŵa.” (Danyele 12:13) Yesu wangukambiya Asaduki, alongozgi a Chiyuda wo akambanga kuti kulivi chiyuka kuti: “Mulanda, pakureka kuziŵa Malemba, chingana ndi nthazi yaku Chiuta.” (Mateyu 22:23, 29) Wakutumika Paulo wangukamba kuti: Nde “ndi chigomezgu mwaku Chiuta . . . kuti chiŵengepu chiyuka cha ŵarunji ndi ŵaziraurunji.”​—Machitidu 24:15.

Kumbi chiyuka cha arunji ndi ambula urunji chazamuŵaku zukwanji? Mungelu wangukambiya Danyele yo wenga murunji kuti wazamuyuka “pa umari wa mazuŵa.” Marta nayu wenga ndi chigomezgu kuti muzichi waki Lazaro wazamuyuka so “mu chiyuka cho cha mu zuŵa lakumariya.”​—Yohane 11:24.

Bayibolo likonkhoska “zuŵa lakumariya” mwakukoliyana ndi Ufumu waku Khristu. Paulo wakulemba kuti: “Chifukwa kutenere iyu [Khristu] kuwusa, mpaka penipo waŵika ŵamawongu wosi kusi ku marwayo [malundi] ngaki. Wamawongu wakumariya kwachiwayulika ndi nyifwa.” (1 Ŵakorinte 15:25, 26) Ichi nchifukwa chakuvwika chakurombe kuti Ufumu waku Chiuta uzi ndipuso kuti khumbu laki lichitika panu pacharu. b

Jobu waziŵanga umampha kuti Chiuta wakhumba kuti akufwa aziyuskiki. Nyifwa yazamutuzgikapu asani zuŵa lo lazikwana. Ndipu pa nyengu iyi, palivi yo wazamufumba so kuti: ‘Kumbi nyifwa nkhumala kwa vinthu vosi?’