Bayibolo lititikambiya mwakuvwika umampha vo Yehova ndi Mwana waki Yesu Khristu achitengi kuti atuzgepu masuzgu ngo Satana Diabolo, wachitiska. Bayibolo likamba kuti: ‘Mwana yo waku Chiuta wangurongoleke chenichi kuti wanangi nchitu zo zaku Diabolo.’ (1 Yohane 3:8) Vinthu vosi va m’charu vo vichitika chifukwa cha mbunu, kutinkhana ndipuso mijalidu yiheni vituzgikengepu. Yesu walayizga kuti, “muwusi wa charu ichi” Satana Diabolo, “wakaponyekanga kubwalu.” (Yohane 12:31) M’charu chifya cho chazamujalikiskika, mwazamuja urunji ndipuso chimangu chifukwa kwazamuŵavi Satana.​—2 Petro 3:13.

Nchinthu wuli cho chichitikiyengi ŵanthu wo akaniya limu kusintha nthowa zawu ndipu alutirizga kuchita vinthu viheni? Ŵanaŵaniyani layizgu lambula kubisa ili: “Akunyoroka akajanga m’charu, ndipu ŵanthu akujisunga umampha akajaliriyanga mwaku cho; kweni aheni akadumulikangaku kucharu cho, ndipu akunyenga akazuwikangamu.” (Nthanthi 2:21, 22) Vinthu vosi vo ŵanthu aheni achitiska kwazamuŵavi. Pa nyengu yachimangu yeniyi, ŵanthu akuvwiya azamufwatukanga kamanakamana ku ubudi wo anguhara.​—Ŵaroma 6:17, 18; 8:21.

Kumbi Chiuta wazamutuzgapu wuli vinthu viheni m’charu chifya? Iyu wazakuŵalonda cha ŵanthu wanangwa wakusankha vakuchita ndipu azamuchitanga vinthu nge makina cha. M’malu mwaki wazamusambiza ŵanthu akuvwiya nthowa zaki, wazakuŵawovya kuti aleki kuŵanaŵana vinthu viheni ndipuso kuvichita.

Kumbi Chiuta wazamuchita wuli ndi ngozi zachilengedu kweniso matenda? Iyu wakulayizga kuti pambula kuswera yapa, boma la Ufumu waki liyambengi kuwusa charu chapasi. Yesu Khristu yo wakusankhika ndi Chiuta kuja Fumu ya Ufumu wenuwu, we ndi nthazi ndipu wazamuchizga wo atama. (Mateyu 14:14) Iyu wazamumaliska so ngozi za chilengedu. (Marko 4:35-41) Mwaviyo, masuzgu ngosi ngo ngachitika chifukwa cha ‘nyengu ndi [“vinthu vamabuchibuchi,” NW]’ ngazamumala. (Wakutaula 9:11) Mu muwusu waku Khristu, kwazamuŵavi masuzgu ndipuso ngozi zachilengedu.​—Nthanthi 1:33.

Nanga ŵanthu mamiliyoni nganandi wo akufwa pa ngozi? Yesu we pafupi kuyuska mubwezi waki Lazaro wangukamba kuti: ‘Ini ndini chiyuka ndi umoyu.’ (Yohane 11:25) Iyu wazamuyuska ŵanthu wo akufwa chifukwa we ndi nthazi zakuchitiya viyo.

Asani mukhumba kuzija m’charu cho vinthu viheni vazakuŵachitikiya so cha ŵanthu amampha, sambirani Bayibolo kuti muziŵi vinandi vakukwaskana ndi Chiuta wauneneska kweniso khumbu laki. Akaboni aku Yehova a muchigaŵa chinu mbakunozgeka kukuwovyani kuti muziŵi vinandi. Titikupemphani kuti mukumani nawu pamwenga mulembe kalata apharazgi a magazini ngenanga.