NKHANI YA PAPEJI LAKWAMBA | VO MUNGACHITA KUTI MUKONDWENGI NDI NCHITU
Kumbi Tikhumbika—Kugwira Nchitu Mwaphamphu?
Alex wanguvuka ukongwa wachikweza mabokosi nga vinthu vinyaki mugalimotu ya kampani yo wagwiraku nchitu. Iyu wangujifumba kuti: ‘Nchifukwa wuli ndigwira nchitu yambula kundiyanduliya? Ndi zukwanji po vinthu vazamukwamba kundiyende umampha? Vinthu vingandiyende umampha ukongwa asani ndingaleka kugwira nchitu.’
Mwakuyanana ndi Alex, ŵanthu anandi akondwa cha kugwira nchitu mwaphamphu. Aaron yo wagwira nchitu yakunozga magalimotu wangukamba kuti: “Ŵanthu anandi aŵanaŵana kuti akhumbika cha kugwira nchitu zakusika. Yiwu akamba kuti: ‘Ndigwira nchitu iyi mwakulindizgiyapu ŵaka.’”
Nchifukwa wuli ŵanthu anandi aŵanaŵana kuti akhumbika cha kugwira nchitu mwaphamphu? Panyaki aŵanaŵana viyo chifukwa cha vo atuvwa pa TV ndipuso pa wayilesi kuti angaja ndi “umoyu wamampha” ukongwa asani angaleka kugwira nchitu mwaphamphu. Matthew yo wagwira nchitu yakunozga vinthu vakupambanapambana wangukamba kuti: “Ŵanthu awona kuti palivi cho chichitika pa umoyu wawu chinanga kuti ayesesa kugwira nchitu mwaphamphu.” Shane yo wagwira nchitu yakuphwere nyumba nayu wangukamba kuti: “Ŵanthu akuleka kali kujifyo ndi nchitu ndi chilatu chakuti alonde ndalama zinandi.”
Chinanga kuti ve viyo, ŵanthu anandi wo vinthu vitiŵayende umampha akondwa ndi nchitu zo agwira mwaphamphu. Daniel wavyaka 25 yo wagwira nchitu yakuzenga wangukamba kuti: “Ndiwona kuti kugwira nchitu mwaphamphu nkhwakukhumbika ukongwa asani we ndi vilatu vamampha.” Andre wavyaka 23 nayu wangukamba kuti: “Munthu wakondwa ukongwa asani wagwira nchitu mwaphamphu. Kweni asani wagwira nchitu mwaulesi wakumana ndi masuzgu nganandi!”
Kumbi nchinthu wuli cho chawovya Daniel, Andre kweniso ŵanthu anyaki kuti aje ndi maŵanaŵanu ngakwenere pa nkhani yakugwira nchitu mwaphamphu? Yiwu agwiriskiya nchitu fundu za m’Bayibolo pa umoyu wawu. Chinanga kuti ŵanthu achiska anyawu kuti agwirengi nchitu mwaulesi, Bayibolo lititichiska kuti tigwirengi nchitu mwaphamphu kweniso tikunthiyengepu. Bayibolo lititikambiya ŵaka kuti tigwirengi nchitu cha, kweni le ndi fundu zinandi zo zingatiwovya. Likamba so vo tingachita kuti tikondwengi ndi nchitu yidu.
Kumbi ndi fundu nizi za m’Bayibolo zo zingakuwovyani kuti mukondwengi ndi nchitu yo mugwira? Titikupemphani kuti muŵerengi fundu zenizi m’nkhani yakulondopu.
