Mu chaka cha uteŵeti cha 2021, a masuzgu ngangulutiriya mbwenu mucharu chifukwa cha mulili wa COVID-19. Nge mo nkhani yakuti “Ntchitu Yakupereka Chovyu pa Nyengu ya Mulili wa Pacharu Chosi” yingukonkhoske, tagwiriskiya ntchitu madola b mamiliyoni nganandi pa nyengu ya mulili ndipuso tajalikiska Makomiti Ngakovya pa Masoka ngakukwana 950.

 Po mulili wachitiskanga kuti paŵi masuzgu nganandi, masoka ngachilengedu nganyaki kweniso ngakuchitiskika ndi ŵanthu, ngachitiska kuti abali ndi azichi pacharu chosi, akumani ndi masuzgu. Kuti awovyi ku masoka ngukujumpha 200 ngo ngakuchitika, Komiti ya Akukumaniska ya Wupu Wakulongozga yinguzomereza kuti asazgiyeku ndalama zakukwana madola 8 miliyoni zakuti ziwovyi pa nyengu ya milili wa COVID-19. Wonani mo ndalama zo mupereka, zinguwovye abali ndi azichi wo angukwaskika ndi masoka pambula kuswera.

 Pa 22 May 2021, vimaba vingwamba kuphulika mu Phiri la Nyiragongo, ku Democratic Republic of the Congo. Vimaba vo vingusapaliya, vingunanga nyumba, masukulu ndi ko asunga maji. Kweni ndi vimaba pe cha vo venga vakofya. Kwati kwajumpha waka mazuŵa ngamanavi, josi liheni lo lingutuwa mu Phiri lingusapaliya mutawuni ya Goma ndipu kwenga vidilirisi vanthazi ukongwa cha. Ŵanthu anandi a mutawuni yo angusama. Anandi anguthaŵa, anyaki anguluta ku Rwanda.

 Pa ŵanthu wo angusama penga Akaboni aku Yehova pafufupi 5,000. Anyaki nyumba zawu zikunangika po phiri linguphulika; anyaki anguŵabiya vinthu munyumba panyengu yo athaŵanga. Makomiti ngakovya pamasoka nga ku Rwanda ndi Democratic Republic of the Congo angupereka chovyu. Pakukamba va komiti yinyaki yakovya pa masoka, Ofesi ya nthambi ku Congo (Kinshasa) yingukamba kuti: “Abali a mukomiti iyi angwamba kupereka chakurya, maji, vakudika ndipuso vakuvwala, chinanga kuti vinthu venga umampha cha mutawuni kweniso pa nyengu yo ŵenga ŵechendakambi kuti ŵanthu asami.” Mutawuni yinyaki yo abali ndi azichi akujumpha 2,000 anguwungana, abali a mukomiti yakupereka chovyu angujintha matenti, angupereka ma masiki ndipuso angukonkhoska mo abali ndi azichi angachitiya kuti aleki kutama matenda nga COVID-19 ndi cholera.

 Mu myezi yitatu pe, abali ŵidu angupereka mpunga wakujumpha makilogilamu 6,000, ufwa wakukwana makilogilamu 6,000, mafuta ngakubikiya ngakujumpha malita 3,000 ndipuso maji ngakujumpha malita 3,000. Kuti aleki kunanga ndalama zinandi, ofesi ya nthambi yingunozga kuti yiguli chakurya chinandi cha mucharu cho mumalu mwakugula chakurya chakudula chakutuliya kucharu chinyaki.

 Mzichi munyaki yo nyumba yaki yifya yingunangika ndi vimaba, wangukamba kuti: “Tinguguŵa kweniso tenga ndi chitima.” Kweni banja laki lingulonde chovyu chakuliŵavu ndipuso linguchiskika kuti likhumbika kulutirizga kuja lakugomezgeka. Sonu iyu wakamba kuti: “Ndi chovyu chakutuliya kwaku Yehova, teche ndi vinthu vakukhumbikiya pa umoyu. Tawona kuti Yehova watitinyamuliya katundu widu ndipuso watitiwovya kuti tikunthiyepu.”

 Masuzgu nga ndalama ngaja ngachisuzga ukongwa ku Venezuela kwa vyaka vinandi. Abali ŵidu kwenuku akunthiyapu masuzgu ngo akumana nangu chifukwa cha kusoŵa kwa chakurya ndipuso kusazgikiyaku kwa uchigeŵenga. Kweni gulu laku Yehova laŵajowo cha.

 Mu chaka cha uteŵeti cho chajumpha, angugwiriskiya ntchitu ndalama zakujumpha madola 1.5 miliyoni kuti aguliyi chakurya ndi sopu kuti awovyi mabanja ngo ngapenja chovyu. Ofesi ya nthambi ku Venezuela yingukamba kuti: “Ntchipusu cha kutumiza chakurya chinandi pa galimotu mwezi wewosi kwa abali ndi azichi wosi mu charu chenichi kweniso kuchipereka kwa abali ŵidu wo akhumbika chovyu.” Kuti asimikizi kuti chakurya cho chinangikengi cha, kanandi abali atumiza katundu yo awona kuti wangaja kwa nyengu yitali. Ofesi ya nthambi iyi yingukamba so kuti: “Titesesa kugula chakurya chinandi pa nyengu yimoza ndipu titichigula mu nyengu yakuvuna kweniso pa nyengu yo chitchipiyaku. Pavuli paki, tigwiriskiya ntchitu matiransipoti ngakutchipa.”

 Leonel wa Mukomiti Yakovya pa Masoka ku Venezuela, watiwuyanja uteŵeti waki. Iyu wangukamba kuti “Ntchitu yakupereka chovyu njapade ukongwa. Uteŵeti wenuwu utindichiska ukongwa kwambiya po muwolu wangu wakufwiya chifukwa cha matenda nga COVID-19. Nditangwanika pakovya abali wo akhumbika chovyu. Ndajiwone ndija mo Yehova wafiskiya layizgu laki lakuti waŵajowongi cha ŵanthu ŵaki.”

 Mubali munyaki yo wangulonde chovyu, wangugwiraku mukomiti yakupereka chovyu vyaka vo vajumpha. Iyu wangukamba kuti: “Sonu yenga nyengu yangu yakuti ndilonde chovyu. Tingulonde waka chovyu chakuliŵavu pe cha. Abali angutiwovya ini ndi muwolu wangu kuti tije akufwasa. Atiphweriyanga, kutipembuzga ndipuso kutichiska.”

 Nyengu zinyaki viziŵika kamanavi kuti masoka ngachitikengi penipo nyengu zinyaki viziŵika cha. Kweni, kanandi gulu laku Yehova lisaniya kweniso kupereka chovyu mwaliŵi, tiwonga ukongwa vakupereka vinu vo vigwira ntchitu pacharu chosi. Nthowa zinyaki zakupereke ndalama ze pa donate.pr418.com. Titikuwongani chifukwa cha mtima winu wakupaska.