Yesu wangukambiya akusambira ŵaki kuti: “Mwazamuja akaboni ŵangu . . . mpaka kuvigaŵa vakutali ukongwa va charu chapasi.” (Machitidu 1:8) Mazuŵa nganu, Akaboni aku Yehova achita phamphu pakufiska mazu ngenanga. Kweni, peche vigaŵa vinyaki va charu chapasi, kusazgapu vigaŵa vo ve ndi ŵanthu anandi ko ukaboni wechendaperekeki mwakukwana. Ndipu mu vyaru vinyaki mwe Akaboni ŵaka amanavi. (Mateyu 9:37, 38) Kumbi tichita wuli kuti tifiski kufikiya ŵanthu anandi?

Kuti yiwovyi pakufiska dangu lo Yesu wangukamba, Komiti Yakuwonere Uteŵeti ya Wupu Wakulongozga wa Akaboni aku Yehova, yitumiza amishonale kumalu ko kukhumbika chovyu pacharu chosi. Pasonu panu, pa charu chosi pe amishonale akukwana 3,090. a Anandi mwa amishonale yaŵa akusere yakusambiza Bayibolu nge Sukulu ya Apharazgi a Ufumu. Amishonale mbakunozgeka kusiya nyumba zawu ndi kusamiya kucharu chachilendu. Ndipu chifukwa chakuti mbakukhwima mwauzimu kweniso asambira vinandi, amishonale akugomezgeka ŵenaŵa atovya ukongwa pakupharazga uthenga wamampha ndipuso ntchakuwoniyapu chamampha kwa akusambira asonu aku Yesu.

Pa ofesi ya nthambi yeyosi, paja Ofesi Yakuwonere Ateŵeti aku Filudi yo ye pasi pa Dipatimenti ya Uteŵeti. Ofesi yeniyi yigwira ntchitu limoza ndi Komiti ya Nthambi pakuphwere amishonale. Mwakuyeruzgiyapu, yitiŵasaniriya nyumba zamampha, yitiŵapasa chovyu chakuchipatala kweniso yitiŵapasa ndalama yimanavi yakuti aguliyengi vinthu vinyaki vakukhumbika. Mu chaka cha uteŵeti cha 2020, Akaboni aku Yehova angugwiriskiya ntchitu pafufupi madola 27 miliyoni nga ku America pakuphwere amishonale ŵenaŵa. Chifukwa cha chovyu chenichi, amishonale aŵika mtima wawu kweniso nthazi zawu pa uteŵeti kweniso kuchiska mipingu.

Kumbi amishonale wo ŵe ku filudi atovya wuli pa ntchitu yakupharazga? Mubali Frank Madsen yo wateŵete mu Komiti ya Nthambi ku Malawi wangukamba kuti: “Chifukwa cha chiganga kweniso malusu ngo ŵenangu, amishonale awovya ukongwa kuti mipingu yiyambi kupharazga kumalu ko nkhwakusuzga kufikaku, nge ku nyumba zo ze ndi mpanda ndipuso ko ŵanthu alongoro chineneru chachilendu. Kweniso phamphu lawu pakusambira chineneru kweniso midawuku ya mucharu cho atumizika, kwawovya ŵanthu ukongwa. Yiwu achiska achinyamata kuti ayambi kuchita uteŵeti wa nyengu zosi. Titimuwonga ukongwa Yehova pakutipaska amishonale.”

Mubali munyaki wa mu Komiti ya Nthambi mucharu chinyaki wangukamba kuti: “Amishonale ntchakuwoniyapu chamampha ukongwa, ndipu apereka ukaboni wakuti ŵanthu aku Yehova pacharu chosi mbakukoliyana. Chinanga mbanthu wo Mbakaboni cha atijiwone ŵija kuti vo Bayibolu lisambiza vititiwovya kuti tikoliyanengi.”

Kumbi amishonale wo ŵe ku filudi atovya wuli apharazgi? Mubali Paulo wa ku Timor-Leste,watiŵawonga ukongwa amishonale wo akutumizgika mu mpingu wawu. Iyu wangukamba kuti: “Kunu kwidu kufunda ukongwa. Chinanga kuti amishonale anandi atuwa ku malu ngakuzizira, kweni kufunda kutiŵatondekesa cha kupharazga. Mlenji wewosi achita unganu wakunozgeke uteŵeti. Kanandi ndi msana lumwi le gee, ndipuso kumazulu, nditiŵawona achiweriyaku ku ŵanthu wo anguŵapharazgiya. Yiwu awovya ŵanthu anandi kusambira uneneska kusazgapu ini. Yiwu achita phamphu pakuteŵete Yehova ndi umoyu wawu wosi ndipu venivi vitovya kuti abali ndi azichi mumpingu nawu achitengi vinandi pakuteŵete Yehova.”

Mzichi Ketti yo wachita upayiniya wa nyengu zosi ku Malawi, wangukonkhoska mo banja linyaki la amishonale linguwovye banja laki. Iyu wanguti: “Pa nyengu yo banja linyaki lo lachitanga umishonale lingutumizgika mu mpingu widu, mu banja lidu ndengamu ndija Kaboni waku Yehova. Kweni amishonale yaŵa angundiwovya ukongwa ndipu anguja mabwezi nga banja lidu. Chakuyeruzgiyapu chawu chamampha chikuwovya ŵana ŵangu kuwona likondwa lo munthu wasaniya asani wateŵete Yehova. Chifukwa cha chovyu cha amishonale yaŵa, ŵana ŵangu ŵaŵi anthukazi pasonu panu mbapayiniya a nyengu zosi ndipu mulumu wangu wakwamba kuwungana.”

Kumbi ndalama zakovye amishonale zituwa pani? Ndalama zaki zituwa pa ndalama zo ŵanthu apereka pa ntchitu ya pacharu chosi ndipu pakupereka ndalama izi anandi agwiriskiya ntchitu nthowa zo zisanirika pa donate.pr418.com. Titikuwongani ukongwa chifukwa cha vawanangwa vo mupereka.