Mazuŵa nganu, Akaboni aku Yehova alonde chakurya chauzimu chinandi kuziya pa vipangizu va mazuŵa nganu. Kweni muvigaŵa vinandi va charu chapasi, abali ŵidu alivi mwaŵi wakusaniya Intaneti. Anyaki aja muvigaŵa vo kanandi kuŵavi Intaneti, ko nthazi ya Intaneti njimana pamwenga ko kulivi nkhani Intaneti.

 Chinanga kuti ve viyo, sonu abali ndi azichi anandi angapanga dawunilodi mabuku ndi mavidiyo chinanga kungaŵavi Intaneti. Kumbi venivi vichitika wuli?

 Ku mipingu yo Intaneti njimana kutumizika kachipangizu kamana ko kadanika kuti JW Box. JW Box yija ndi kabokosi ka wayifayi ko tigula kumakampani ngo ngapanga venivi ndipu abali a mu Dipatimenti ya makompyuta ku Beteli awikamu pulogilamu yinyaki. Pavuli paki, aŵikamu mabuku ndi mavidiyo kweniso vinthu vinyaki vo ve pa jw.org. Ka JW box kamoza kagulika madola pafufupi 75 nga ku America.

 Ku Nyumba ya Ufumu, abali ndi azichi alumikiza mafoni ndi matabuleti ngawu ku JW Box ndipu apanga dawunilodi mabuku ndi mavidiyo. Chinanga ndi wo chipangizu chawu ntchakali pamwenga ntchakudula ukongwa cha, nawu angalumikiza. Kweni kumbi ku mipingu yo Intaneti njakusuzga, yichita wuli kuti mu JW Box musanirikengi vinthu vasonu? Mwezi wewosi, ofesi ya nthambi yitumiza mafulashi (USB) ngo aŵikamu vinthu vasonu vo ve pa jw.org ndipu atingalumikiza ku JW Box. Ndipu fulashi yimoza yigulika madola pafufupi nganayi nga ku America.

 Kumbi JW Box yaŵawovya wuli abali ŵidu? Nathan Adruandra, yo waja ku Democratic Republic of Congo, wangukamba kuti: “Ndingwesesa kwa nyengu yitali kuti ndipangi dawunilodi seŵeru lakuti: ‘A Yehova, . . . Ndigomeza Imwi’ kweniso lakuti, “Kumbukani Muwolu Waku Loti.” Kweni ndingutondeka ndipu venivi vingundiguŵiska. Sonu ndingapanga dawunilodi mavidiyo ngenanga pafoni yangu ndipu venivi vititiwovya isi nge apapi kuŵasambiza umampha ŵana ŵidu.”

 Mubali munyaki ku Nigeria yo watovya mipingu kuziŵa mo yingagwiriskiya ntchitu JW Box wangukamba kuti: “Abali awona kuti JW Box ndi mphasu yakutuliya kwaku Yehova. Yiwu akondwa ukongwa kuti sonu asuzgika cha kupanga dawunilodi mabuku ndi mavidiyo ngo nge pa JW layibulare, pachigaŵa chakuti Vidya Vakusambiziya.”

 Tivipangizu ta JW Box takujumpha 1,700, tikutumizika kwa abali ŵidu ku Africa, Oceania, ndi ku South America ndipu abali akhumba so kuti tivipangizu tinandi teniti titumiziki ku mipingu yinandi. Kumbi ndalama zakuchitiya venivi zituwa pani? Zituliya pa ndalama zo ziperekeka kuti ziwovyi pa ntchitu yidu ya pacharu chosi ndipu anandi apereka ndalama zenizi kuziya pa donate.pr418.com. Titikuwongani ukongwa chifukwa cha mtima winu wakupaska.