Mu chaka cha 2020 munguchitika masoka nganandi ngachilengedu kusazgiyapu pa mulili wa COVID-19 wo wakwaska charu chosi. Kumbi Akaboni aku Yehova achita wuli kuti awovyi ŵanthu wo akwaskika?

 Mu chaka cha uteŵeti cha 2020, a Komiti ya Akukumaniska ya Wupu Wakulongozga yikuzomereza kuti ndalama zakukwana madola 28 miliyoni b zigwiriskikiyi ntchitu pakovya ŵanthu wo akwaskika. Ndipu ndalama izi zingugwiriskikiya ntchitu pakovya ŵanthu wo angukwaskika ndi masoka ngachilengedu ngakujumpha 200 ngo nganguchitika, vo visazgapu mulili wa COVID-19, vimphepu vanthazi, kusapaliya kwa maji ku Africa, kusoŵa kwa chakurya ku Venezuela ndipuso chilala ku Zimbabwe. Ndalama zo ŵanthu apereka mwakukhumba kwawu, zinguwovya pakugula chakurya, maji, malu ngakugona, vakuvwala, kulipira mabilu ngakuchipatala kweniso kuguliya vinthu vinyaki vakugwiriskiya ntchitu pakutowesa malu, kunozga kweniso kuzenga nyumba zo zingunangika. Tiyeni tiwonepu waka vakuyeruzgiyapu vimanavi waka.

 COVID-19. Pacharu chosi, abali ndi azichi ŵidu anandi akwaskika ndi mulili uwu mu nthowa zakupambanapambana. Pakukhumba kuŵawovya, pangupangika Makomiti Ngakovya pa Masoka ngakujumpha 800 pacharu chosi. Abali wo ŵenga mu makomiti yanga afufuzanga vinthu vo abali ndi azichi wo angukwaskika ndi mulili uwu akhumbikanga, ndipu asani aziŵa, aziŵisanga Komiti ya Akukumaniska mwaliŵi kuti yiziŵi chovyu chakwenere cho chikhumbika kuperekeka.

 Kwa chaka chosi, Makomiti Ngakovya pa Masoka nganguwovya ŵanthu anandi kusaniya chakurya, maji, munkhwala kweniso vinthu vinyaki vakukhumbika kuti aje akuvikilirika. Mu vigaŵa vinyaki, makomiti yanga ngagwiranga ntchitu limoza ndi ŵara mumpingu wa muchigaŵa cho chakwaskika ukongwa kuti awovyi abali ndi azichi kusaniya chovyu cha boma.

 Ŵanthu anyaki wo Mbakaboni cha anguzizwa ukongwa ndi ntchitu yakupereka chovyu yeniyi. Mwakuyeruzgiyapu, DC wa mu boma la Nakonde ku Zambia, zina laki Field Simwinga wangukambiya abali ŵidu kuti: “Tawonga ukongwa chifukwa cha chovyu cha panyengu yaki cho mwapereka ku ŵanthu wo akwaskika ndi mulili uwu.”

 Kusoŵa kwa Chakurya ku Angola. Mulili wa COVID-19 ukuchitiska kuti chakurya chiŵi chimana kweniso chakudula ukongwa ku Angola. Mwakuti abali ndi azichi ŵidu anandi atondekanga kuti aguli chakurya.

 Ofesi ya nthambi ku Brazil yingupempheka kuti yiwovyi abali ŵidu ku Angola ndipu yiŵatumiziyi vakurya vakupambanapambana. Kuti agwiriskiyi ntchitu umampha ndalama zo ŵanthu apereka, abali angufufuza umamphaumampha kuti aziŵi mo angaguliya chakurya chinandi kweniso mo angachitumiziya. Chakurya cha munthu yumoza cho agulanga chaŵanga cha ndalama zakukwana madola 22 ndipu uzitu waki wakwananga pafufupi makilogilamu 20. Munthu weyosi wapaskikanga vinthu nge mpunga, ntchunga ndipuso mafuta ngakubikiya. Kufika sonu, chakurya chakukwana ŵanthu 33,544 cho chikwana matani 654 chikutumizika ku Angola. Asani tingasazga chakurya ichi cho chingutumizika, ndi cho chingusanirika mu charu ichi chosi pamoza chingukwana ŵanthu akujumpha 50,000!

 Kumbi abali ŵidu atuvwa wuli ndi chovyu cho angulonde? Alexandre yo waja kuchigaŵa chakutali cha ku Angola wangukamba kuti: “Ndawona ukaboni wakuti Yehova watindiyanja kweniso kuti nde ndija cha. Gulu laku Yehova lindiwona kuti nde wakuzirwa ukongwa!” Mariza, yo walera yija ŵana wangukamba kuti: “Yehova wanguvwa pempheru langu. Nditimuwonga ukongwa Yehova kweniso gulu laki!”

 Kovya Ŵanthu wo Angukwaskika ndi chilala ku Zimbabwe. Mu chaka cha uteŵeti cha 2020, ku Zimbabwe kunguwa chilala ndipu venivi vinguchitiska kuti ŵanthu mamiliyoni nganandi kusazgiyapu Akaboni aku Yehova akwaskiki ndi nja.

 Pangupangika Makomiti 5 Ngakovya pa Masoka kuti ngawovyi pakupereka chakurya kwa abali ndi azichi ŵidu. Apharazgi anandi angovya abali a mu makomiti yanga kupakira chakurya kweniso vinthu vinyaki vakukhumbika ndipu anyaki anguzomereza kuti magalimotu c ngawu ngagwiriskikiyi ntchitu. Mu chaka cha uteŵeti cha 2020, ndalama zakukwana madola 691,561 ndizu zingugwiriskikiya ntchitu pakugula chakurya cha ŵanthu 22,700.

 Mu vigaŵa vinyaki, abali ndi azichi anyaki ŵengavi nkhani chakurya pa nyengu chovyu ichi chatumizikanga. Kweni chakurya ichi chati chafika, yiwu anguwonga Yehova. Anyaki angwamba kumba sumu za Ufumu.

 Mu chigaŵa chinyaki, azichi ŵaŵi wo ndi vyoko anguluta ku unganu unyaki wo unguchitika muchigaŵa chawu. Unganu uwu ungunozgeka kuti akambiskani vakukwaskana ndi chovyu cho wupu unyaki wakuti ngwa boma cha wakhumbanga kupereka muchigaŵa ichi. Kweni pa unganu uwu pangwamba kuchitika vinthu vakukwaskana ndi ndali, mwakuti azichi yaŵa angusankha kuti aleki kuchitaku nawu vinthu vo akhumbikanga kuchita kuti alonde chovyu. Pa nyengu yo atuwangapu pa unganu uwu, ŵanthu anyaki angwamba kuŵanyoza ndikuŵakambiya kuti, “Mungachizanga so kwaku isi cha kuzipempha chovyu!” Chinanga kuti venga viyo, pati pajumpha ŵaka sabata ziŵi, abali wo angupinga chovyu anguza muchigaŵa ichi ndipu angupereka chakurya kwa azichi ŵidu. Pa nyengu iyi wupu wuwa ungukamba kuti uzengi ndi chovyu wenga wechendazi nachu!

 Ntchitu yakupereka chovyu ku ŵanthu wo angukwaskika ndi chilala ku Zimbabwe yawovya so ukongwa pa ntchitu yakupharazga. Mwakuyeruzgiyapu, ŵanaŵaniyani va mzichi munyaki zina laki Prisca, yo waja mu muzi unyaki mu charu ichi. Chinanga kuti penga masuzgu nganandi chifukwa cha chilala, kweni pa Chitatu ndi pa Chinkhondi peposi, mzichi uyu walutanga mbwenu kuchipharazga chinanga mungaŵa munyengu yakulima. Ŵanthu mumuzi wo waja amunenanga ndipu akambanga kuti: “Usuzgisengi waka banja laku ndi nja chifukwa cha kupharazga kwinu ko.” Kweni Prisca waŵamukanga kuti: “Yehova wakutayapu cha ŵanthu ŵaki.” Pati pajumpha waka mazuŵa ngamanavi waka, iyu wangulonde chovyu kutuliya ku gulu lidu. Venivi vinguziziswa ŵanthu wo aja pafupi ndi mzichi uyu ndipu angumukambiya kuti: “Chiuta wakutayapu nadi cha, sonu nasi tikhumba kusambira vinandi vakukwaskana ndi Chiuta.” Pasonu panu, 7 mwa ŵanthu ŵenaŵa avwisiya maunganu ngidu ngo ngapharazgika pa wayilesi.

 Po umaliru wepafupi, tikakumananga mbwenu ndi masoka nga chilengedu. (Mateyu 24:3, 7) Tiwonga ukongwa ndalama zo mupereka mwakukhumba kwinu pakugwiriskiya ntchitu nthowa zakupambanapambana zo ze pa donate.pr418.com. Ndalama izi zigwiriskikiya ntchitu pakovya ŵanthu wo akhumbika chovyu.