Magulu ngakujumpha 60 peresenti nga ŵanthu wo agwira ntchitu yakufwatuliya, agwiriya pa ofesi ya nthambi cha, kweni ku maofesi ngakufwatuliyaku mabuku (RTO). Ntchifukwa wuli ndondomeku yeniyi njakovya? Kumbi wo agwira ntchitu yakufwatuliya akhumbikanji kuti agwiri umampha ntchitu yawu pa RTO? Nanga chigaŵa cho akufwatuliya agwiriyaku ntchitu chitovya wuli pa ntchitu yawu yakufwatuliya?

 Maofesi ngakufwatuliyaku mabuku, ngatovya kuti akufwatuliya ajengi ku chigaŵa cho ŵanthu anandi alongoro chineneru cho yiwu afwatuliya. Karin, yo njumoza wa ku wo afwatuliya Chijeremani Chinyaki (Low German), wangukamba kuti: “Kutuliya waka po tikusamiya ku RTO yo ye ku Cuauhtémoc, mutawuni ya Chihuahua, ku Mexico, nyengu zosi tilongoro chineneru chenichi asani te ndi akufwatuliya anyidu, te mu uteŵeti kweniso asani tiluta kuchigula vinthu. Tingakamba waka kuti pasonu panu tija ndi ŵanthu wo alongoro chineneru chidu. Tituvwa ŵanthu achilongoro mazu ngo tikungavwapu ndikali ukongwa kweniso tituvwa mo alongolore mazuŵa nganu.”

 James, yo njumoza wa ku wo afwatuliya mu chineneru cha Chifrafra ku Ghana, wangukamba kuti nyengu zinyaki watiŵasoŵa ukongwa anyaki wo wenga nawu limoza ku ofesi ya nthambi. Kweni wangukamba so kuti: “Ndikondwa ukongwa kugwira ntchitu pa RTO. Kupharazga mu chineneru changu ndipuso kuwona mo ŵanthu achitiya asani avwa uthenga wamampha, kutindikondwesa ukongwa.”

 Kumbi abali achita wuli kuti asankhi malu ngamampha ngo angazengapu ofesi yakufwatuliyapu mabuku? Joseph yo wateŵete mu Dipatimenti ya Pacharu Chosi Yakupanga Mapulani ndi Kuzenga yo ye ku Warwick, New York, ku U.S.A wangukamba kuti: “Suzgu yimoza yo tikumana nayu njakuti ku vigaŵa vinyaki magesi ngakugomezgeka cha, maji kulivi pamwenga intaneti njakusuzga kuti abali alondiyengi vinthu vo vikhumbika kufwatuliya. Mwaviyo, asani tisankha malu ngakuti pazengeki RTO, tiŵanaŵaniya kweniso kufufuza vigaŵa vakupambanapambana vo kukambika chineneru cho.”

 Kukamba uneneska, kugwiriskiya ntchitu Malu nga Unganu, Nyumba ya Ufumu pamwenga nyumba za amishonale kuja RTO ndiyu nthowa yipusu kweniso yakutchipa ukongwa. Wo agwira ntchitu yakufwatuliya achita kwende kuluta kuchigwira ntchitu ku malu yanga. Kweni asani vosi ivi palivi, nyengu zinyaki abali azomerezeka kugula maofesi pamwenga nyumba zo zikuzengeka kali kuti abali ndi azichi wo agwira ntchitu yakufwatuliya ajengemu ndipuso kuti agwiriyengemu ntchitu. Asani vinthu vasintha, paja pambula kusuzga kugulisa nyumba kweniso maofesi vo akufwatuliya agwiriskiyanga ntchitu ndipu ndalama zaki zingagwira ntchitu pa vinthu vinyaki vakukhumbika ukongwa.

 Mu chaka cha uteŵeti cha 2020, tingugwiriskiya ntchitu ndalama zakukwana madola 13 miliyoni nga ku America kuti maofesi ngakufwatuliyaku mabuku ngalutirizgi kugwira ntchitu. Abali ndi azichi wo agwira ntchitu yakufwatuliya akhumbika makompyuta, mapulogilamu nganyaki ngapade, vipangizu vakujambuliya mazu, intaneti ndipuso vinthu vinyaki vakukhumbika ukongwa. Mwakuyeruzgiyapu, pakhumbika ndalama pafufupi madola 750 nga ku America, kuti munthu yumoza waje ndi kompyuta yaki ndi mapulogilamu ngosi ngakwenere. Mu makompyuta ngenanga, muŵikika pulogilamu yinyaki yo tichita kugula kweniso yinyaki yo yidanika kuti Watchtower Translation System. Pulogilamu yeniyi yitovya akufwatuliya kuti agwirengi umampha ntchitu yawu kweniso kuti vo apenja pa ntchitu yawu avisaniyi mwambula kusuzga.

 Wo agwira ntchitu yakufwatuliya apaskika so vinthu vakujambuliya mazu mu maofesi ngawu. Vinthu venivi, vinguwovya ukongwa pa nyengu yo mulili wa COVID-19 wayambanga waka. Ve viyo chifukwa akufwatuliya anandi angupingiya kunyumba kwawu vinthu venivi ndi kulutirizga kujambula mavidiyo ndipuso vinthu vakuvwisiya ŵe kunyumba kwawu.

 Kanandi, abali ndi azichi akujipereka wo aja muchigaŵa cho mwe RTO, atovya ukongwa pa ntchitu yakuweriyamu mu vo afwatuliya kali kuti asimikiziyi kuti vivwika umampha kweniso atovya pa ntchitu yakuphwere vinthu vinyaki pa RTO. Cirstin yo wateŵete pa ofesi yakufwatuliyaku mabuku ya chineneru cha Chiafrikana ku Cape Town, ku South Africa wangukamba kuti: “Apharazgi anandi kweniso apayiniya a nyengu zosi ŵe ndi mwaŵi wakuzigwiraku ntchitu kunu.”

 Abali ndi azichi ŵenaŵa wo atijipereka, akondwa ukongwa kugwiraku ntchitu. Mzichi munyaki yo watovya pa ntchitu zinyaki pa RTO, wangukamba kuti kugwiraku ntchitu pa malu yanga, ntchinthu chakukondwesa ukongwa. Abali ndi azichi anyaki nawu atijipereka kuziŵerenga mazu nga mu mavidiyo kweniso vinthu vakuvwisiya. Juana, yo wagwiraku ntchitu yakufwatuliya mabuku ngidu mu Chitotonaki muchigaŵa cha Veracruz, ku Mexico, wangukamba kuti: “Chifukwa chakuti pasonu panu, te pafupi ndi vigaŵa vo ŵanthu alongoro chineneru chidu, ntchipusu kusaniya abali ndi azichi anandi wo angajipereka kuziŵerenga mazu nga mu mavidiyo ndipuso vinthu vakuvwisiya.”

 Kweni kumbi maofesi ngakufwatuliyaku mabuku ngatovya nadi kuti abali ndi azichi wo afwatuliya, afwatuliyengi vinthu vakuvwika umampha? Ŵanthu anandi wo aŵerenga mabuku ngidu akamba kuti maofesi yanga ngatovya nadi. Mwakuyeruzgiyapu, Cédric yo wagwira ntchitu yakufwatuliya mabuku muchineneru cha Chikongo ku Democratic Republic of Congo, wangukamba kuti: “Pakwamba abali ndi azichi anyaki akambanga kuti asani tifwatuliya, tifwatuliya mu ‘Chikongo cha mu mabuku nga Watch Tower,’ chifukwa chenga chakupambana ukongwa ndi Chikongo cho ŵanthu alongoro. Kweni pasonu panu, abali ndi azichi yaŵa akamba kuti tifwatuliya mabuku ngidu mu Chikongo cha mazuŵa nganu cho ŵanthu alongoro.”

 Andile, yo wagwira ntchitu yakufwatuliya mabuku ngidu mu Chityosa ku South Africa, nayu wanguvwa ŵanthu achikamba vakuyanana waka ndi vo ŵanthu wo alongoro Chikongo angukamba. Iyu wangukamba kuti: “Ŵanthu anandi atitikambiya kuti vo tifwatuliya vivwika umampha ukongwa. Chinanga mbana wo kali ayanjanga kuŵerenga Chigongwi cha Alinda cha Chingelezi, pasonu panu aŵerenga Chityosa. Atiliyanja so ukongwa Bayibolu la Charu Chifya lakunozgeka so chifukwa livwika umampha asani atiliŵerenga.”

 Ndalama zo ŵanthu apereka mwakukhumba kwawu kuti ziwovyi pa ntchitu yapacharu chosi, ndizu zigwiriskikiya ntchitu pa kuzenga ndi kunozga maofesi ngakufwatuliyaku mabuku kweniso kuphwere abali ndi azichi wo ateŵete ku malu ngenanga. Ndalama zenizi zisazgapu zo ŵanthu apereka kuziya pa donate.pr418.com.