Akaboni aku Yehova atiŵaphwere ukongwa abali ndi azichi ŵawu. (1 Peturo 2:17) Tanandi mwaku isi tituvwa nge mo mzichi Tannis, wa ku Kenya wavwiya. Iyu wangukamba kuti: “Nditanja ukongwa kuti ndiziŵengi vo vichitikiya abali ndi azichi ŵidu akwanjiwa pacharu chosi.” Kumbi Tannis ndi Akaboni mamiliyoni nganyaki achita wuli kuti aziŵi vo vichitikiya abali ndi azichi? Kwamba mu 2013, taja tichichita venivi kuziya pa chigaŵa cha Malu nga Nkhani cho che pa webusayi yidu ya jw.org.

 Pa Malu nga Nkhani pasanirika nkhani zauneneska zakukwaskana ndi Akaboni aku Yehova nge kutuzgika kwa Bayibolu, kovya pamasoka ngachilengedu, ntchitu zakuzenga ndi vinthu vinyaki. Pa Malu nga Nkhani ngenanga patitiwovya kuziŵa vakukwaskana ndi abali ndi azichi wo akumangika chifukwa cha chivwanu chawu. Kweniso pasanirika vakuwoniyapu vakuchiska vakukwaskana ndi upharazgi wapade ndipuso mwambu wa Chikumbusu. Kumbi mbayani wo afufuza nkhani zenizi, nanga atizinozga wuli?

 Abali a mu Ofesi Yakuwona Vakupharazga Nkhani (OPI) ndiwu anozga nkhani za pa Malu nga Nkhani. Ofesi iyi ye ku likulu lidu ndipu yilongozgeka ndi Komiti ya Akukumaniska ya Wupu Wakulongozga. Ofesi ya OPI ye ndi abali ndi azichi akujumpha 100 ndipu anandi mwaku yiwu atende kusazgapu wo alemba, wo afufuza, akujambula kweniso akufwatuliya. Anyaki akambiskana ndi arara a boma, mapulofesa ndi asambizi ndipuso atola nkhani. Ofesi ya OPI yitovyeka ndi Madipatimenti Ngakuwona Vakupharazga Nkhani (PID) ngakujumpha 80 ku nthambi pacharu chosi

 Kuti anozgi nkhani, ofesi ya OPI yigwiriya ntchitu limoza ndi madipatimenti nga PID. Asani abali ŵidu asaniya nkhani yakuti alembi, atiyifufuza umampha ndipu alemba fundu zosi zakukwaskana ndi nkhani yo. Venivi visazgapu kufumba mafumbu kweniso kukambiskana ndi akaswiri. Asani asaniya fundu zauneneska, atamba kulemba nkhani, kuyinozga, kuyiŵerenga, kuyikamu vithuzi ndipu atiyitumiza ku Komiti ya Akukumaniska kuti ayiwoni.

 Kumbi abali ndi azichi atuvwa wuli asani aŵerenga nkhani zo zisanirika pa Malu nga Nkhani? Cheryl, mzichi waku Philippines, wangukamba kuti: “Pa zuŵa nditanja kuŵerenga nkhani zakukwaskana ndi gulu laku Yehova ndipuso ŵanthu ŵaki.”

 Akuŵerenga anandi akamba kuti nkhani za pa jw.org zo zisanirika pa Malu nga Nkhani zipambana ukongwa ndi nkhani zo ŵanthu anyaki atuzga. Tatiana wa ku Kazakhstan, wangukamba kuti: “Ndiwonga ukongwa kuti ndingazigomezga nkhani za pa jw.org. Zauneneska kweniso zinozge weyosi.” Mzichi munyaki wa ku Mexico zina laki Alma wangukamba kuti: “Mwakupambana ndi nkhani ziheni zo tituvwa, nkhani zo zisanirika pa Malu nga Nkhani zakuchiska ukongwa.”

 Nkhani zo zisanirika pa Malu nga Nkhani zauneneska kweniso zitovya kuti tije ndi chivwanu chakukho. Bernard wa ku Kenya, wangukamba kuti: “Nkhani zo zisanirika pa Malu nga Nkhani zingundiwovya kuti ndiwonengi abali ndi azichi pacharu chosi nge ŵanthu a mubanja langu mwambula kutole kuti atuliya pani. Ndifiska kuzumbuwa mazina ngawu ndipuso kukamba vo vitiŵachitikiya asani ndipemphera.” Mzichi munyaki zina laki Bybron, yo waja so ku Kenya, wangukamba kuti: “Nyengu zosi ndikondwa asani ndawona nkhani yakukwaskana ndikutuzgika kwa Bayibolu mu chineneru chinyaki! Nkhani zenizi zitindikumbuska kuti Yehova walivi sankhu.”

 Chinanga ndi nkhani zakukwaskana ndi mo abali ndi azichi atombozgeke nazu so zingatichiska. Jackline, wa ku Kenya wangukamba kuti: “Kuŵanaŵaniya mo abali ndi azichi alongole chiganga kutindiwovya kuja ndi chivwanu chakukho. Nyengu zosi nditesesa kuziŵa vo vitiŵawovya kuti akunthiyepu. Ndasambira mo vinthu vo ŵanthu ativiwona kuti ‘vipusu’ nge pempheru, kuŵerenga Bayibolu ndipuso kumba sumu, vitovye abali ndi azichi ŵidu kulutirizga kuja akukho.”

 Mzichi munyaki wa ku Costa Rica zina laki Beatriz wawona kuti nkhani zakukwaskana ndi masoka ngachilengedu zakukhumbika ukongwa. Iyu wangukamba kuti: “Nkhani zo ze pa Malu nga Nkhani zitindiwovya kuwona mo gulu lidu liphwere abali ndi azichi mwaliŵi, mwandondomeku kweniso mwachanju. Venivi vitindisimikiziya kuti lenili ndi gulu laku Yehova.”

 Tikondwa ukongwa chifukwa cha nkhani za pa nyengu yaki zakukwaskana ndi abali ndi azichi ŵidu pacharu chosi! Venivi vatingi vichitikengi cha kwambula ndalama zo mupereka pakovya ntchitu ya pacharu chosi, ndipu kanandi ziperekeka kuziya pa donate.pr418.com. Titikuwongani chifukwa cha ndalama zo mupereka ndi mtima wosi.