Mu July ndi August 2020, kenga kakwamba kuti abali pacharu chosi chapasi awonere pulogilamu ya unganu wa chigaŵa pa nyengu yimoza. Kuti pulogilamu yeniyi yijambuliki, pakhumbikanga kuti vineneru vakujumpha 500 vifwatuliki. Ntchitu yeniyi yatingi yitongi chaka kuti yimali. Kweni chifukwa cha mlili wa corona abali ndi azichi akhumbikanga kufwatuliya Unganu Wachigaŵa wa 2020 wamutu wakuti “Mukondwengi Nyengu Zosi”! kwa myezi yinayi pe.

 Dipatimenti Yakovya pa Ntchitu Yakufwatuliya ndipuso Dipatimenti Yakugula Vinthu Pacharu Chosi ku Likulu Lapacharu Chosi la Akaboni aku Yehova yawovya ukongwa pa ntchitu yikulu yeniyi. Dipatimenti Yakovya pa Ntchitu Yakufwatuliya yinguwona kuti akufwatuliya akhumbikanga vinthu vinandi kuti viŵawovyi kuti amalizi ntchitu yakufwatuliya, ukongwa mamayikulofoni. Dipatimenti Yakugula Vinthu Pacharu Chosi yingunozga kuti yiguli mamayikulofoni 1,000 ndipu angungapereka mumalu pafufupi 200 pacharu chosi.

 Kuti aleki kunanga ndalama zinandi, Dipatimenti Yakugula Vinthu yingugula mamayikulofoni nganandi panyengu yimoza ndipu yinguchingaŵika dankha kumalu ngamoza, pavuli paki, ngangutumizika ku maofesi ngakufwatuliya pa charu chosi. Chifukwa chakuti mamayikulofoni ngenanga ngangugulika nganandi nyengu yimoza, vinguchitiska kuti mayikulofoni yimoza yiguliki pa mtengu wa madora 170 nga ku America kusazgiyapu ndi yakutumiziya katundu mwenuyu. Venivi vinguwovya kuti mamayikulofoni ngenanga ngaguliki mwakutchipa.

 Dipatimenti Yakugula Vinthu pa Charu Chosi yingunozga kuti yiguli ndi kutumiza mamayikulofoni ngenanga mu April ndi May 2020. Pa nyengu iyi ndipu mabizinesi nganandi ngaleka kwenda umampha chifukwa cha mlili wa corona. Chinanga kuti venga viyo, chakukumaliya kwa mwezi wa May, vipangizu venivi vingufika mbwenu mumalu nganandi ngakufwatuliya mabuku mumaofesi nga nthambi, muma RTO kweniso mumalu nganyaki.

 Jay Swinney wakuwonere Dipatimenti Yakugula Vinthu Pacharu Chosi wangukamba kuti: “Penga kukambiskana kwamampha pakati pa madipatimenti nga pa Beteli ndi ŵanthu wo agulisanga vipangizu venivi. Mzimu waku Yehova wija ndiwu ungotiwovya kuti tifiski kuchita venivi mwaliŵi kuti tiwovyi abali ndi azichi ŵidu.”

 Nicholas Ahladis, yo wateŵete mu Dipatimenti Yakovya pa Ntchitu Yakufwatuliya wangukamba kuti: “Akufwatuliya wo ŵenga pa lokudawuni anguchiskika ukongwa chifukwa chakulonde mamayikulofoni ngenanga. Chinanga kuti akufwatuliya yaŵa agwiriya ntchitu ofesi yimoza cha sonu, kweni alutirizga mbwenu kugwira ntchitu limoza mwakukoliyana. Yiwu afwatuliya ndi kujambula nkhani, maseŵeru kweniso sumu muvineneru vakujumpha 500.”

 Unganu Wachigaŵa wa pacharu chosi wakuti “Mukondwengi Nyengu Zosi”! ngumoza mwa ntchitu zo zingugwirika mu 2020. Ndalama zo mupereka mwakukhumba kwinu pa jw.org kweniso munthowa zinyaki zawovya kuti tiguliyi vipangizu vakunoze unganu wenuwu.