Chifukwa chakuti ŵanthu anandi abatizika chaka chechosi, pakhumbika kusazgiyapu malu ngakusopiyamu. Pa chifukwa chenichi, Dipatimenti Yakupanga Mapulani ndi Kuzenga pacharu chosi yingunozga kuti yizengi pamwenga kunozga malu ngakukwana 2,700 mu chaka cha uteŵeti cha 2020. a

 Mwasoka ndondomeku yeniyi yingutimbanyizgika ndi mulili wa COVID-19. Kuti tivikiriyi abali ndi azichi ŵidu ndipuso kukoliyana ndi ulongozgi wa boma, Wupu Wakulongozga kuziya mu Komiti Yakuwonere Ntchitu Yakusindikiza Mabuku, yingumika dankha ntchitu yakuzenga pacharu chosi. Kweni mu chaka cha uteŵeti cha 2020, malu ngakusopiyamu ngakujumpha 1,700 nganguzengeka ndipuso kunozgeka mulili wechendayambi. Kusazgapu yapa, ntchitu zikuluzikulu zakujumpha 100 zo maofesi nga nthambi ngangwiranga zingumalizika kuzengeka. Wonani mo abali ŵidu ayanduliya ndi maofesi ngaŵi nga nthambi ngo ngakumala kuzengeka.

 Ofesi ya Nthambi ya ku Cameroon. Ofesi ya Nthambi yakali, yo yenga ku Douala yenga yimana ukongwa ndipu yakhumbikanga kuyisazgiyaku. Komiti Yakuwonere Ntchitu Yakusindikiza Mabuku yingunozga kuti ofesi ya nthambi yeniyi yinozgeki kweni pakhumbikanga ndalama zinandi kuphara mo yawonekiyanga. Anguŵanaŵana so kuti azengi ofesi ya nthambi yifya pamwenga kuti aguli ndi kunozga nyumba zo zengapu kali. Kweni chifukwa cha mo vinthu venge, palivi cho chingwenda.

 Mukuluta kwanyengu abali anguziŵa kuti kunkhondi kwa Douala, boma lanozga kuti alimi msewu pafupi ndi malu ngidu nga Unganu. Msewu wenuwu unguwovya kuti katundu wafikengi umampha kumalu ko. Venivi ndivu ofesi ya nthambi yakhumbanga. So Wupu Wakulongozga unguzomerezga kuti ntchitu yakuzenga ofesi ya nthambi yifya kuchigaŵa chinyaki cha Malu nga Unganu yiyambi.

 Akaboni kweniso ŵanthu wo anguŵapanga hayala agwiriyanga limoza ntchitu yeniyi ndipu venivi vinguwovya kuti nyengu kweniso ndalama zileki kuluta zinandi. Ndipu tingugwiriskiya ntchitu ndalama zakujumpha madola 2 miliyoni nga ku America. Ndalama zenizi zenga zimana ukongwa kuphara mo taŵanaŵaniyanga. Banja la Beteli lingusamiya mu ofesi ya nthambi yasonu kwati kwaja kamanavi kuti mulili wa COVID-19 ubuki.

 Abali ndi azichi a pabeteli ku Cameroon ayanduwa ukongwa ndi malu ngakujaku ngamampha kweniso malu ngamampha ngakugwiriyaku ntchitu ndipu awona kuti ofesi ya nthambi yifya yeniyi ndi mphasu yakutuliya kwaku Yehova. Banja linyaki lingukamba kuti, “Tikhumba waka kugwira ntchitu mwaphamphu ndikulongo kuti mphasu yeniyi njakuzirwa.”

 Ofesi Yakufwatuliyaku Mabuku (RTO) ya Chitojolabo ku Mexico. Kwa vyaka vinandi, abali ndi azichi wo afwatuliya Chitojolabo agwiriyanga ntchitu ku ofesi ya nthambi ya ku Central America, yo ye kufupi ndi tawuni ya Mexico. Kweni chineneru cha Chitojolabo chikambika ukongwa ku Altamirano ndi ku Las Margaritas, mtunda wa makilomita pafufupi 1,000. Venivi vachitiskanga akufwatuliya kuti asuzgikengi kuja ndi lusu la chineneru cha Chitojolabo. Ndipu abali a ku ofesi ya nthambi asuzgikanga kusaniya abali ndi azichi wo atichiziŵa umampha Chitojolabo kuti awovyi pantchitu yakufwatuliya ndipuso kujambula vinthu vakuvwisiya.

 Pa vifukwa venivi, Wupu Wakulongozga kuziya mu Komiti Yakuwonere Ntchitu Yakulemba Mabuku, yakhumbanga kusamusa akufwatuliya ndi kuŵalutisa muchigaŵa cho ŵanthu akamba Chitojolabo. Kuti afiski kuchita venivi, ofesi ya nthambi yingunozga kuti yiguli ndipuso kunozga nyumba. Kuchita venivi kwatingi kutongi ndalama zimanavi kuphara kuzenga pamwenga kupanga lenti nyumba.

 Yumoza mwa akufwatuliya ŵenaŵa wangukonkhoska mo wanguyanduliya. Iyu wanguti: “Pa vyaka 10 vo ndaja ndichigwira ntchitu yakufwatuliya ku ofesi ya nthambi, ndechendakumanepu ndi banja lo lilongoro chineneru changu. Sonu ofesi yidu yekufupi ndi chigaŵa cho ŵanthu alongoro Chitojolabo. Zuŵa lelosi ndikumana ndi ŵanthu wo alongoro Chitojolabo. Venivi vandiwovya kuti ndichiziŵengi umampha chitojolabo ndipuso kuti vo ndifwatuliya vivwikengi umampha.”

 Mu chaka cha uteŵeti cha 2021, pe ntchitu yakunozga ma RTO 75 ndipuso masukulu ngakusambiriyaku Bayibolu, asani vinthu vingaŵa umampha. Ntchitu yakuzenga maofesi nga nthambi 8 yilutirizgengi, kusazgapu ntchitu yo ye ku likulu lidu ku Ramapo, New York kweniso kusamusa maofesi nga nthambi ku Argentina ndi ku Italy. Kusazgapu yapa, pakhumbika so Nyumba za Ufumu zakujumpha 1,000 zasonu, malu ngakujumpha 6,000 ngakuchitiyaku maunganu ngakhumbika kunganozga, ndipuso Nyumba za Ufumu zinyaki 4,000 zikhumbika kuzinozga.

 Kumbi ndalama zakuzenge kweniso kunozge malu ngakusopiyamu zituliya pani? Mubali Lázaro González, wa mu Komiti ya Nthambi ya ku Central America, wangumuka fumbu lenili po wakonkhoskanga vakukwaskana ndi ntchitu yakuzenga Ofesi Yakufwatuliyaku Mabuku mu Chitojolabo. Iyu wangukamba kuti: “Mu chigaŵa cha nthambi yidu, te ndi vinthu vimanavi waka. So kwambula chovyu chakutuliya kwa abali ndi azichi, vatingi viŵengi vakusuzga kuzenga ofesi yakufwatuliyaku mabuku. Ndalama zo abali ndi azichi pacharu chosi apereka zachitiska kuti viŵi vambula kusuzga kuti akufwatuliya azi muchigaŵa cho chineneru chawu chikambika. Titiŵawonga ukongwa abali ndi azichi pacharu chosi chifukwa cha mtima wawu wakupaska.” Hinya, ntchitu zakuzenga zenizi ndiviwongu pa vo muchita pakupereka ndalama kuti zigwiri ntchitu pacharu chosi, ndipu ndalama zinyaki ndi zo mupereka kuziya pa donate.pr418.com.