Nkhani ya mu Chigongwi cha Mlinda ya June 1, 1912, yingukamba kuti: “Ŵanthu anandi wo aŵerenga mabuku ngidu, atiŵaziŵa umampha ŵanthu ambula kuwona. Yiwu angaŵerenga mabuku ngenanga kwawezi. . . . Magazini iyi ayipulinta muvilembu vo ŵanthu ambula kuwona angaŵerenga umampha.” Chigongwi cha Mlinda chenichi chingukamba so kuti: “Ŵanthu anandi ambula kuwona awonga ukongwa kuvwa uthenga wakuti vitumbiku vamampha ukongwa vituza.”

 Pa nyengu yo mazu ngenanga ngalembekanga, vyaru vakupambanapambana vo viŵereŵeta chingelezi venga ndi nthowa zakupambanapambana zo angalembe mabuku nga ŵanthu ambula kuwona. Chinanga kuti venga viyo, Akaboni aku Yehova ndipu achitiska kali kuti uneneska wa mu Bayibolu usaniriki “muvilembu va ŵanthu ambula kuwona” kuziya mu mabuku nga ŵanthu ambula kuwona. Ndipu mpaka sonu ndivu tichita. Pasonu panu te ndi mabuku nga ŵanthu ambula kuwona mu vineneru vakujumpha 50. Kumbi ntchinthu wuli chichitika kuti mabuku ngenanga ngapangiki?

 Kuti apangi mabuku nga ŵanthu ambula kuwona chakwamba asintha chiganizu ndikuchilemba mu vilembu va ŵanthu ambula kuwona. Michael Millen, yo wateŵete mu dipatiment yakulemba nkhani (Text Processing Services) ku Patterson, New York, wangukamba kuti: “Pakwamba, tagwiriskiyanga ntchitu pulogilamu yo yikupangika ndi ŵanthu anyaki kuti tipangi mabuku nga ŵanthu ambula kuwona, kweni yagwiranga ntchitu ku vineneru vosi cha nge mo takhumbiyanga. Kweni sonu tigwiriskiya ntchitu pulogilamu ya Watchtower Translation System, yo yitovya kupanga mabuku nga ŵanthu ambula kuwona mu vineneru pafufupi va pacharu chosi. Ndigomezga kuti palivi pulogilamu yinyaki yakuyanana ndi yeniyi.

 Mabuku nga ŵanthu ambula kuwona ngasazgapu nkhani kweniso mazu ngakukonkhoska vithuzi. Mwakuyeruzgiyapu, chithuzi cha pa chikonkhombi cha buku la ŵanthu ambula kuwona lakuti Kondwani ndi Umoyu Kwamuyaya! akuchikonkhoska kuti: “Munthulumi watenda munthowa yakukhwetakhweta yo yazingilizika ndi vimiti kweniso maluŵa ngakutowa, mapiri ngamanangamana ndipuso ngakulungakulu.” Jamshed, yo ndi mteŵeti wakovya ndipuso mpayiniya wachibulumutiya, wangukamba kuti: “Mazu ngakukonkhoska vithuzi ngenanga ngakuzirwa ukongwa kwaku ini.”

 Asani amaliza kusintha vilembu, atumiza mafayelu ku ofesi ya nthambi kuti akapangi mabuku nga ŵanthu ambula kuwona. Kwenuku vilembu va ŵanthu ambula kuwona atividinda pa mapepala ngo ngangatoloka cha pamwenga kusintha kawonekeru kaki asani atingagwiriskiya ntchitu mwakuwerezawereza. Pavuli paki mapeji ngosi atingasazga pamoza, kuti lije buku ndi kutumiza ku mpingu pamoza ndi mabuku nganyaki pamwenga “kungatumiza waka pakungija” asani ku positi ofesi achita viyo. Asani maofesi nga nthambi ngangafiska, ngangatumiza mabuku nganandi kwa abali ndi azichi ambula kuwona pamwenga kutumiziya abali ndi azichi wo asuzgika kuwona, mabuku ngo angangagwiriskiya ntchitu pa maunganu.

 Ntchitu yosi yeniyi yikhumbika nyengu ndipuso ndalama zinandi. Kweni makina nga kupulintiya ngo nge ku Wallkill, New York, ngapulinta Mabayibolu 50,000 pa nyengu yakuyanana ndi nyengu yo Mabayibolu ngaŵi nga ŵanthu ambula kuwona ngapangikiya. Pe vigaŵa 25 mu Bayibolu lelosi la Chingelezi la ŵanthu ambula kuwona ndipu vinthu vakupangiya vigaŵa venivi vidula ukongwa kuphara vipangizu vo angagwiriskiya ntchitu pakupanga Mabayibolu. Chikonkhombi chimoza pe chakupangiya vigaŵa 25, agulisa ndalama zakukwana madola 150 nga ku America.

 Kumbi ŵanthu wo agwiraku ntchitu yakupanga mabuku nga ŵanthu ambula kuwona, atuvwa wuli asani agwira ntchitu yeniyi? Nadia, yo wateŵete ku ofesi ya nthambi ya ku South Africa wangukamba kuti: “Abali ndi azichi ŵidu ambula kuwona pamwenga wo asuzgika kuwona, akumana ndi masuzgu nganandi. So ndiwona kuti ndi vitumbiku vikulu ukongwa kuŵapangiya chinthu cho chingaŵawovya. Venivi vilongo kuti Yehova watiŵayanja ukongwa.”

 Wuli asani munthu wambula kuwona waziŵa cha kuŵerenga mabuku nga ŵanthu ambula kuwona? Kwa vyaka vimanavi vo vajumpha, tingutuzga kabuku kakuti Sambirani Kuŵerenga Mabuku nga Ŵanthu Ambula Kuwona, ko ke ndi vilembu va ŵanthu ambula kuwona ndipuso kakulembeka mazu. Kabuku kenaka kulembeka munthowa yakuti munthu yo wawona umampha kweniso wambula kuwona wakagwiriskiyengi ntchitu. Kabuku kenaka ke ndi chigaŵa cho munthu wambula kuwona wangagwiriskiya ntchitu pakulemba vilembu va ŵanthu ambula kuwona. Venivi vitovya munthu yo wasambira vilembu va ŵanthu ambula kuwona kuti wakumbukiyengi vilembu vo kweniso kuti waviziŵi umampha.

 Kumbi abali ndi azichi ŵidu wo ambula kuwona pamwenga wo asuzgika kuwona ayanduwa wuli ndi mabuku ngenanga? Ernst yo waja ku Haiti wazanga ku maunganu nga mpingu kwambula buku lelosi la ŵanthu ambula kuwona. Chifukwa cha venivi, iyu wathembanga ukongwa zeru zo wenazu kuti wakumbukengi vo wakhumba kulongoro asani wapaskika nkhani ndipuso pa nyengu ya mafumbu ndi kwamuka. Iyu wangukamba kuti: “Kweni sonu, ndingasosa janja ndikupereka ndemanga nyengu yeyosi. Kukamba uneneska nditijivwa kuti ndemubanja lakukoliyana la abali ndi azichi ŵangu. Tosi tilonde fundu zakuyanana zakutuliya kwaku Yehova!”

 Jan yo ndi mura ku Austria, wasuzgika kuwona. Iyu ndiyu wachitiska Sambiru la Chigongwi cha Mlinda ndipuso Sambiru la Bayibolu la Mpingu. Jan wangukamba kuti: “Mabuku ngidu ngavwika umampha ukongwa kuluska mabuku nganyaki nga ŵanthu ambula kuwona ngo ndaja ndichiŵerenga. Mwakuyeruzgiyapu, mabuku ngidu nge ndi manambala nga mapeji, mazu ngamumphata ngambula kusuzga kungasaniya ndipuso nge ndi mazu ngo ngakonkhoska vithuzi.”

 Seon-ok yo ndi mpayiniya ku South Korea, ngwambula kuwona ndipuso ngwambula kuvwa. Kali wathembanga waka chineneru chamanja chakuchita kukwaskana pa maunganu kweni pasonu panu wafiska kuŵerenga yija Bayibolu la ŵanthu ambula kuwona. Iyu wangukamba kuti: “Mabuku nganyaki nga muvilembu va ŵanthu ambula kuwona ngakusuzga ukongwa kungaŵerenga chifukwa vilembu vinyaki muŵavi, mizeri yiseleriyana waka pamwenga pepala lija lambula kulama. Kweni Akaboni aku Yehova agwiriskiya ntchitu mapepala ngamampha ukongwa ndipu vilembu vaki vija vikuluvikulu. Venivi vichitiska kuti ndilekengi kusuzgika kuŵerenga. Iyu wangulutirizga kuti: “Kali, ndasambiranga mabuku ngo ngakamba vakukwaskana ndi Bayibolu mwakuwovyeka ndi ŵanthu anyaki. Kweni pa sonu panu ndingaŵerenga mabuku yanga pakundija. Venivi vitindikondwesa ukongwa chifukwa pakundija, ndifiska kunozgeke maunganu nga Mpingu ndipuso kumukapu mwakukwana. Ndiŵerenga mabuku ngidu ngosi nga vilembu va ŵanthu ambula kuwona. Mabuku yanga ‘ndangaziŵiliya ukongwa’ mwakuti ndingafiska cha kuja waka kwambula kungaŵerenga.”

 Nge mo ngaliri mabuku ngidu ngosi, mabuku nga ŵanthu ambula kuwona nangu nge ndi mazu yanga: “Magazini iyi njakugulisa cha, kweni yitovya pa ntchitu yapacharu chosi yakusambiza ŵanthu Bayibolu. Ndipu ndalama zo ŵanthu apereka mwakukhumba kwawu ndizu zitovya pa ntchitu iyi.” Titikuwongani ukongwa chifukwa cha chovyu cho mupereka mwakugwiriskiya ntchitu nthowa zo ze pa donate.pr418.com. Chifukwa cha mtima winu wakupaska vitovya kuti tije ndi chakurya chauzimu ku ŵanthu wosi, kusazgapu ambula kuwona kweniso wo asuzgika kuwona.