Po chaka cha 2023 chitamba, tosi tilindizga kuti vinthu vamampha vitichitikiyengi kweniso vichitikiyengi mabanja ngidu. Ntchifukwa wuli te ndi chilindizga kuti vinthu vitiyendiyengi umampha?

 Bayibolu le ndi uthenga wamampha wakuti masuzgu ngo tikumana nangu ngakanyengu kamanavi kweniso ngamalengi pambula kuswera yapa. Kweniso, Bayibolu ‘likulembeka kuti litisambizi, ndi chilatu chakuti tije ndi chilindizga chifukwa cha . . . kupembuzgika ndi Malemba.’—Aroma 15:4.

•    Kuti muziŵi vinandi vakukwaskana ndi vo Bayibolu lilayizga, ŵerengani nkhani ya mutu wakuti “Tiziyembekezera Kuti Zinthu Zidzakhala Bwino M’tsogolo.”

 Chilindizga cho Bayibolu lipereka che nge “ndondowa ya umoyu widu.” (Aheberi 6:19) Chilindizga chenichi chingatiwovya kuti tikunthiyepu masuzgu ngo tikumana nangu, kuti tiwonengi vinthu mwakwenere, kweniso kuti tije ndi likondwa chayilu. Mwakuyeruzgiyapu:

•    Wonani mo chilindizga cha mu Bayibolu chinguwovye munthu yo wenga ndi chiziŵirizga chakumwa ukongwa moŵa. Woneriyani vidiyo ya mutu wakuti Umoyu Wangu Ungunangika Ukongwa.

•    Wonani mo chilindizga cha mu Bayibolu chingatiwovye asani munthu yo tamuyanjanga watayika. Woneriyani vidiyo ya mutu wakuti Kupembuzga wo Aliya.

 Ŵanthu anandi alindizga kuti vinthu vamampha vichitikengi, kweni asimikiza cha kuti vo yiwu alindizga vazamuchitika nadi pamwenga cha. Kweni vo Bayibolu lilayizga vipambana ndi vo yiwu alindizga. Chifukwa wuli tikamba viyo? Chifukwa malayizgu nga mu Bayibolu ngatuliya kwaku Yehova Chiuta a, “yo wangapusika cha.” (Tito 1:2) Ndi Yehova pe yo we ndi nthazi zakufiska malayizgu ngaki ngosi; iyu wangachita “chechosi cho wakhumba kuchita.”—Salimo 135:5, 6.

 Titikupemphani kuti muyanduwi ndi chilindizga chakuthembeka cha mu Bayibolu. Mungaligomezga ukongwa Bayibolu asani ‘mufufuza Malemba mwakuphwere.’ (Machitidu 17:11) Wonani mo chilindizga chenichi chingakuwovyiyani mwakusambira Bayibolu kwawezi. Yambani chaka cha 2023 ndi chilindizga chamampha cha vinthu vo vichitikengi kunthazi!