Kumbi ntchinthu wuli cho chituza mu maŵanaŵanu mwinu asani mwavwa mazu ngakuti “kumala kwa charu”? Panyaki mungaŵanaŵana kuti ndi zuŵa likulu lenilo chamoyu chechosi pacharu chapasi chazamubwangandulikiya. Ŵanthu anyaki agomezga kuti venivi ndivu vichitikiyengi charu asani aŵerenga nkhani nge izi:

•   “Vingachitika kuti kwazamukuŵa nkhondu ya nyukiliya. Nkhondu yeniyi, yingaziyamba waka mwamabuchibuchi, mwangozi pamwenga chifukwa chakuleka kukoliyana kwa ŵanthu.”—Bulletin of the Atomic Scientists.

•   “Kwa vyaka 10 vo vajumpha, pacharu paja pachichitika vimphepu vakofya, motu wakofya, vimaba vamotu kweniso kusapaliya kwa maji.”—National Geographic.

•   “Mu vyaka vo vajumpha ku Africa, kunguwa azombi anandi ukongwa ndipu angunanga vinthu ukongwa kuphara vyaka vosi.”—The Associated Press.

 Kumbi charu cho tijamu chazamubwangandulikiya limu ndipu chazamuŵaku so cha? Kumbi Bayibolu likambanji pa nkhani iyi?

 Awa. Mazu ngaku Chiuta, Bayibolu, ngatitisimikiya kuti charu chapasi cho tijamu chazamuŵapu mpaka muyaya. (Wakutawula 1:4) Mumalu mwakuzinanga charu chayichu cho wakulenga, Chiuta wazamunanga “wo ananga charu chapasi.”—Chivumbuzi 11:18.

 Mwakukoliyana ndi vo Bayibolu likamba, “charu” cho che pafupi kumala, ching’anamuwa ŵanthu ambula kuvwiya Chiuta ndipu achita vo yiwu ŵeneku akhumba. Nge mo Chiuta wanguchitiya mu mazuŵa ngaku Nowa, pa nyengu iyi napu wazamunanga “ŵanthu ambula kopa Chiuta.”—2 Peturo 2:5; 3:7.

 Lemba la 1 Yohane 2:17 likamba kuti, “charu ndi khumbiru laki viluta.” Lemba ili lilongo kuti Chiuta wazamunanga charu chayichu cho tijamu cha, kweni wazamunanga ŵanthu ŵeniwo alutirizga kuchita vinthu viheni.

 Bayibolu likamba cha zuŵa chayilu lo umaliru uziyengi. (Mateyu 24:36) Kweni lilongo waka kuti wepafupi ukongwa. Wonani vinthu vinyaki vo Bayibolu likukambiya limu kuti vichitikengi:

•   Vinthu nge nkhondu, kusoŵa kwa chakurya, milili ndipuso vidilirisi vakofya vazamuchitika “mumalu ngakupambanapambana.”—Mateyu 24:3, 7, 14; Luka 21:10, 11; Chivumbuzi 6:1-8.

•   Ŵanthu anandi azamuchitanga vinthu vakujikondwesa ŵija. Mwakuyeruzgiyapu, azamuja “akwanja ndalama,” “ambula kuwonga,” ndipuso “ambula kujiko.”—2 Timote 3:1-5.

 Ŵanthu anandi azomereza kuti kwambiya waka mu 1914, vinthu mu charu vichitika ndendende nge mo Bayibolu lingukambiya limu ndipuso kuti umaliru we pafupi. Kuti muziŵi vinandi, ŵerengani nkhani ya mutu wakuti, “Kodi Ulosi wa M’Baibulo Umatiuza Zotani pa Nkhani ya Chaka cha 1914?” kweniso yakuti, “Kumbi Chisimikizu cha “Mazuŵa Ngakumaliya”pamwenga kuti “Nyengu Yakumaliya” Ntchinthu Wuli?”

 Buku la Chivumbuzi lo ndi buku lakumaliya la mu Bayibolu, likamba va nyengu “yo Ambuya Yesu azamuvumbulikiya.” Venivi vazamuchitika asani Yesu waziza ndi nthazi zakutuzgiyapu vinthu vosi viheni ndipuso kuzipereka mphotu kwaku wo asopa Chiuta.—2 Atesalonika 1:6, 7; 1 Peturo 1:7, 13.

 Buku lakumaliya lenili, livumbuwa vinthu vo vichitikengi kunthazi. (Chivumbuzi 1:1) Mu buku la Chivumbuzi mwe uthenga wamampha kweniso wakupaska chilindizga. (Chivumbuzi 1:3) Buku lenili lilongo kuti Chiuta wazamutuzgapu vinthu vosi vambula urunji ndipu wazamusintha charu kuja paradayisu. Pa nyengu yeniyi, kwazamuŵavi kupweteka, kuvwa urwirwi kweniso chinanga ndi nyifwa.—Chivumbuzi 21:3, 4.

 Kumbi mukhumba kuvwa vinandi vakukwaskana ndi vinthu vakukondwesa vo Bayibolu likulayizga? Asani ndi viyo, Akaboni aku Yehova asambira Bayibolu ndi ŵanthu kwawezi ndipu yiwu angakuwovyani. Mungachita umampha kukambiskana nawu.