Ndi mlenjilenji pa 24 February 2022, asilikali a charu cha Russia angusere mucharu cha Ukraine ndi kwamba kuchita nachu nkhondu chinanga kuti alongozgi a muvyaru vinandi ayesesa kutondekesa kuti nkhondu iyi yingachitikanga cha. Kumbi nkhondu yeniyi yichitiskengi kuti vinthu viŵi wuli pacharu? Mazuŵa ngamanavi ngo ngajumpha, mlembi mura wa wupu wa United Nations zina laki António Guterres, wangukamba kuti: “Nkhondu yeniyi yazamuchitiska kuti ŵanthu asuzgiki kasaza cha ndipu vinthu vinandi vinangikengi ukongwa. Ndipuso ŵanthu a ku Europe kweniso pacharu chosi, ajengi ambula kuvikilirika.”

•  ● Yesu Khristu wangukambiya limu vakukwaskana ndi nyengu yo “mtundu wazamuyukiyana ndi mtundu unyaki, ufumu ndi ufumu unyaki.” (Mateyu 24:7) Kuti muziŵi mo Bayibolu lilongore kuti nkhondu zo zichitika mazuŵa nganu zifiska uchimi waku Yesu, ŵerengani nkhani ya mutu wakuti, “Kumbi Chisimikizu cha ‘Mazuŵa Ngakumaliya’ pamwenga kuti ‘Nyengu Yakumaliya’ Ntchinthu Wuli?”

•  ● Mu Bayibolu, buku la Chivumbuzi lilongo kuti munthu yo wakwera pa ‘hachi yiyera’ ndipu watuzgapu “chimangu pacharu chapasi,” wamiya nkhondu zo zichitika. (Chivumbuzi 6:4) Kuti muziŵi mo nkhondu zo zichitika mazuŵa nganu zifiskiya uchimi wenuwu, ŵerengani nkhani ya mutu wakuti, “Kumbi Ŵanthu Anayi wo Akwera Pamahachi Amiyanji?”

•  ● Buku la Daniyeli likukambiya limu va kulimbana ko kulipu pakati pa “fumu ya kunkhondi” ndi “fumu ya kumwera.” (Daniyeli 11:25-45) Kuti muziŵi chifukwa cho tikambiya kuti charu cha Russia ndi vyaru vo vikoliyana nachu ndivu vimiya fumu ya kunkhondi, woneriyani vidiyo ya mutu wakuti, Uchimi wo Ufiskika—Daniyeli Chaputala 11. a

•  ● Buku la Chivumbuzi likonkhoska so vakukwaskana ndi “nkhondu ya zuŵa likulu laku Chiuta Wanthazizosi.” (Chivumbuzi 16:14, 16) Kweni nkhondu yeniyi yazamukuŵa ya pakati pa vyaru cha, nge yo tiwona pasonu panu. Kuti muziŵi vinandi vakukwaskana ndi nkhondu yeniyi yo yichitikengi kunthazi uku, ŵerengani nkhani ya mutu wakuti, “Kumbi Nkhondu ya Aramagedoni ndi Nkhondu Wuli?”

•  ● Bayibolu likamba kuti Chiuta wazamumalisa “nkhondu pacharu chosi chapasi.” (Salimo 46:9) Kuti muziŵi vinandi pa nkhani ya vo Chiuta watitilayizga kunthazi, ŵerengani nkhani ya Chichewa ya mutu wakuti, “Tiziyembekezera Kuti Zinthu Zidzakhala Bwino M’tsogolo.”

•  ● Yesu wangusambiza akusambira ŵaki kuti apempherengi kuti Ufumu waku Chiuta uzi. (Mateyu 6:9, 10) Ufumu wenuwu ndi boma lakuchanya lo lazamufiska khumbu laku Chiuta lakukwaskana ndi charu chapasi, ndipu khumbu laku Chiuta lisazgapu kuzisa chimangu pacharu chosi chapasi. Kuti muziŵi mo Ufumu wenuwu wazakukuwovyiyani, woneriyani vidiyo ya mutu wakuti, Kumbi Ufumu Waku Chiuta Ntchinthu Wuli?

 Ku Ukraine kwe Akaboni aku Yehova akujumpha 129,000. Nge mo viŵiya ndi Akaboni a muvyaru vinyaki vosi, nawu ayezga Yesu ndipu akana kuseleriyamu mu vakuchitika va charu kweniso kuchitaku nkhondu. (Yohane 18:36) Akaboni aku Yehova alutirizga kupharazga ‘uthenga wamampha wa Ufumu’ pacharu chosi chapasi chifukwa Ufumu wenuwu ndiwu wazamumalisa masuzgu ngosi ngo taŵanthu tikumana nangu, kusazgiyapu nkhondu. (Mateyu 24:14) Titikupemphani kuti mukambiskani nasi kuti musambiri vinandi vakukwaskana ndi uthenga wakupaska chilindizga wo we mu Bayibolu.