Ŵanthu pacharu chosi akunthiyapu kufunda ko chijaliyi kwechendachitikepu kweniso vinthu vinyaki vo vachitika chifukwa cha kufunda kwenuku. Wonani malipoti yanga:

•   Wupu unyaki ungukamba kuti, “Pa vyaka 174 vajumpha, mwezi wa June wachaka chinu, charu chapasi chafunda mwakujumphisa.”—National Oceanic and Atmospheric Administration, U.S. Department of Commerce, July 13, 2023.

•   Wupu unyaki so ungukamba kuti, ku “Italy, Spain, France, Germany ndi Poland kwafunda ukongwa ndipu viwoneka kuti pa chirwa cha Sicily ndi Sardinia kufunda kwenuku kufikengi madigiri 48°C [118°F]. Tingakamba kuti kufunda kwaviyo uku kwechendachitikepu mu vyaru va ku Europe.”—European Space Agency, July 13, 2023.

•   Pa unganu wo wupu wakuwona va nyengu, mphepu ndipuso mo vuwa yiwiya, Stefan uhlenbrook yo walongozga wupu wenuwu wangukamba kuti, “Asani kufunda kulutiriyengi tiwonengi vinthu vinandi vakofya, vinthu venivi vichitikengi pafupipafupi ukongwa, kuŵengi vuwa yinandi vo vingachitisa kuti maji ngasapaliyi.”—Stefan Uhlenbrook, director of hydrology, water and cryosphere at the World Meteorological Organization, July 17, 2023.

 Kumbi mufipa mtima chifukwa cha unandi wa malipoti ngo ngakamba va kufunda kwakofya kwenuku? Wonani vo Bayibolu likamba pa nkhani yeniyi.

 Hinya. Kufunda ukongwa ko kuchitika pacharu chapasi ndipuso mitundu yinyaki ya mphepu zikuluzikulu zo zichitika, vikoliyana ndi vinthu vo Bayibolu likukamba kuti vazamuchitika mu nyengu yidu yinu. Mwakuyeruzgiyapu, Yesu wangukambiya limu kuti tazamuwona “vinthu vakofya” pamwenga kuti ‘vakuziziswa ndipuso vakuchitiska mantha.’ (Luka 21:11; Good News Translation) Chifukwa chakuti kotcha kwenuku kulutiriya mbwenu, vachitisa kuti ŵanthu anandi aŵi ndi mantha ngakuti charu chinangikengi ukongwa

 Awa. Chiuta wakulenga charu kuti ngaje malu ngidu ngakujamu mpaka muyaya; Iyu wazomerezengi cha kuti ŵanthu anangi charu. (Salimo 115:16; Wakutawula 1:4) Chiuta wakulayizga kuti ‘wanangengi wo ananga charu chapasi.’—Chivumbuzi 11:18.

 Bayibolu likamba kuti Chiuta wavikiliya ndipu walutirizgengi kuvikiriya charu kuti chileki kunangiya limu.

•   “[Chiuta] wachetamisa chimphepu; ndipu mayiŵa nga nyanja ngaja cheti.” (Salimo 107:29) Chiuta we ndi nthazi zakwendese vinthu vachilengedu. Ndiyu ngwakwenere kumalisa masuzgu nga muchilengedu ngo panyengu yinu ngachitiska ŵanthu kuti asuzgikengi ndi kufunda ukongwa.

•   “Yimwi muphwere charu chapasi, mutichichitiska kuti chije ndi vipasu vinandi.” (Salimo 65:9) Charu chazamuja paradayisu chifukwa Chiuta wachitumbikengi.

 Asani mukhumba kuziŵa vinandi vo Bayibolu lilayizga, pa nkhani ya kuweriyamu kwa vinthu vo vikunangika muchilengedu, wonani nkhani yakuti “Kumbi Ndiyani yo Wazamutaska Charu?”