“Matenda ngakusuzgika maŵanaŵanu ku ŵana achinyamata ngachilendu cha ndipu chinthu chikulu cho chichitiska suzgu lenili ndi malu ngakucheziyapu nga pa intaneti.”—Dr. Vivek Murthy, U.S. surgeon general, New York Times, June 17, 2024.

 Kumbi apapi angavikiliya wuli ŵana ŵawu pa nkhani yakugwiriskiya ntchitu malu ngakucheziyapu nga pa intaneti? Bayibolu le ndi ulongozgi wakovya ukongwa.

 Ŵanaŵaniyani fundu za mu Bayibolu.

 “Munthu wakuchenje waŵanaŵaniya mo watende.”—Nthanthi 14:15.

 Chifukwa chakuŵanaŵaniya mo malu ngakucheziyapu nga pa Intaneti nganangiya ŵana, mungazomerezanga cha kuti mwana winu wangagwiriskiyengi ntchitu mwakujumphisa. Mwechendamuzomerezi kuti wagwiriskiyengi ntchitu malu ngakucheziyapu nga pa intaneti, muwonesesengi kuti walondo marangu ngo mukumukambiya ngakukwaskana ndi nyengu yo wangamaliyapu, mo wangachitiya kuti walutirizgi kuja ndi mabwezi ngamampha kweniso mo wangakhweche nkhani zambula fundu.

•    Kuti muziŵi vinandi ŵerengani nkhani izi “Kumbi Mwana Wangu Watenere Kugwiriskiya Ntchitu Intaneti?” ndipuso “Sambizani Ŵana Ŵinu Achinyamata mo Angayigwiriskiya Ntchitu Umampha Intaneti.”

 “[Nyengu] yinu muyigwiriskiyengi ntchitu mwakwenere.”—Aefeso 5:16.

 Asani mukhumba kuti mwana winu wagwiriskiyengi ntchitu malu ngakucheziyapu nga pa intaneti, muŵikiyeni marangu nga mo watenere kugwiriskiya ntchitu malu ngenanga ndipu mukonkhoskiyeni mo venivi vingamuwovye kuti waje wakuvikilirika. Nyengu zosi mujengi masu kuti muziŵengi asani mwana winu wayamba kusintha nkharu yaki ndipu venivi vingakuwovyani kuti mumuŵikiyi mphaka.

•    Gwiriskiyani ntchitu vidiyo ya vithuzi vakujambula ya mutu wakuti Malu Ngakucheziyapu nga pa Intaneti kuti muwovyi mwana winu kuziŵa chifukwa cho wakhumbikiya kujaliya ndi mphaka pa mo wangagwiriskiya ntchitu malu ngakucheziyapu nga pa intaneti.

 Bayibolu likamba kuti tija “mu nyengu zakusuzga ukongwa.” (2 Timote 3:1-5) Ndipu lititipaska ulongozgi wa vo tingachita kuti timalani ndi masuzgu ngo tikumana nangu. NKhani zakujumpha 20 zo zikonkhoska fundu za mu Bayibolu zakovya apapi ndi ŵana zingasanirika mu nkhani yakuti Achinyamata Asuzgika Maŵanaŵanu Ukongwa Mazuŵa Nganu.