Nkhondu ya ku Ukraine, kweniso kusintha kwa nyengu vichitiska kuti pacharu chapasi paŵevi chakurya chakukwana. Suzgu yeniyi yakuwa ukongwa mu vyaru vikavu ndipu ŵanthu anandi asuzgika kusaniya chakurya chakukwana.

•   “Kupanga kweniso kusanirika kwa chakurya vatimbanyizgika chifukwa cha nkhondu, kusintha kwa nyengu, kukwera mitengu kwa mafuta kweniso vinthu vinyaki.”—António Guterres, UN secretary-general, July 17, 2023.

•   “Akaswiri aŵanaŵana kuti chifukwa chakuti charu cha Russia chaleka kwende phanganu la kugulisa vakurya ku vyaru vinyaki, vichitiskengi kuti chakurya chisuzgi ukongwa pacharu chosi kweniso chiduli ukongwa mu vyaru vikavu, ukongwa va ku North Africa ndi ku Middle East.”—Atalayar.com, July 23, 2023.

 Ziŵani vo Bayibolu likamba pa nkhani ya kusoŵa kwa chakurya kweniso vo vichitikengi kunthazi.

•   Yesu wangukambiya limu kuti: “Mtundu wazamuyukiyana ndi mtundu unyaki, ufumu ndi ufumu unyaki, ndipu kwazamuja nja.”—Mateyu 24:7.

•   Buku la Chivumbuzi likonkhoska vakukwaskana ndi ŵanthu anayi wo akwera pamahachi. Yumoza mwa ŵanthu wo akwera pamahachi ngenanga wamiya nkhondu. Pavuli paki patuza munyaki yo wamiya nja, nyengu yo chakurya chazamusoŵa kweniso chazamugulisika mwakudula ukongwa. Buku la Chivumbuzi likamba kuti: “Ndinguwona hachi yifipa, yo wangukwerapu wenga ndi sikelu mujanja laki. Sonu ndinguvwa vo vavwikanga nge mazu . . . Mazu ngo ngenga ngakuti: ‘Tirigu wakukwana mwesu umoza wa kwati mtengu waki ndi dinari a yimoza, ndipu balire wakukwana miyesu yitatu ya kwati mtengu waki ndi dinari yimoza.’”—Chivumbuzi 6:5, 6.

 Mauchimi ngenanga ngafiskika pasonu panu mu nyengu yinu yo Bayibolu litiyikamba kuti “mazuŵa ngakumaliya.” (2 Timote 3:1) Kuti muziŵi vinandi vakukwaskana ndi “mazuŵa ngakumaliya” kweniso ŵanthu anayi wo akwera pa mahachi wo azumbulika mubuku la Chivumbuzi, woneriyani vidiyo yakuti Charu Chikusintha Ukongwa Kutuliya mu 1914 ndipuso ŵerengani nkhani yakuti “Kumbi Ŵanthu Anayi wo Akwera Pamahachi Amiyanji?”

•   Bayibolu le ndi ulongozgi wo ungatiwovya kumalana ndi masuzgu nge kukwera mitengu kwa chakurya pamwenga nja. Wonani masachizgu nganyaki mu nkhani yakuti “Vo Mungachita Asani Musaniya Ndalama Zimana.”

•   Bayibolu lititiwovya so kuziŵa kuti vinthu viŵengi umampha ukongwa kunthazi. Lilayizga kuti “pacharu chapasi pazamuja chakurya chinandi” ndipu munthu weyosi wazamukuŵa ndi chakurya chinandi. (Salimo 72:16) Kuti muziŵi vinandi vakukwaskana ndi venivi kweniso chifukwa cho mungavigomezge, ŵerengani nkhani ya Chichewa yakuti “Tiziyembekezera Kuti Zinthu Zidzakhala Bwino M’tsogolo.”