Pa 9 October 2024, wupu wa World Wildlife Fund ungutuzga lipoti lakukwaskana ndi mo ŵanthu amaliya nyama zamudondu. Lipoti ili lingulongo kuti mu vyaka 50 vo vajumpha (1970-2020), Nyama zamudondu zaja zimana ndipu zasika ndi ma peresenti 73.”Lipoti ili lingutcheŵeska so kuti: “Mphakuvwika kukamba kuti vo vichitikengi mu vyaka 5 vo vituza kunthazi ndivu vazamulongo mo umoyu wazamuŵiya pacharu chapasi.”

 Mphaki kuti ŵanthu anandi azizwa ndi malipoti ngange yanga. Titichiyanja charu chidu chakutowa ndipu tikhumba cha kuwona nyama zichisuzgika. Veviyo chifukwa Chiuta wakutilenga kuti tiphweriyengi nyama.—Genezesi 1:27, 28; Nthanthi 12:10.

 Mungajifumba kuti, Kumbi tingafiska kuvikiliya vamoyu pacharu chapasi? Kumbi Bayibolu likambanji?’

 Chinanga tingayesesa wuli kuti tivikiliyi nyama kweni ndi Chiuta pe yo wangazivikiliya. Pa Chivumbuzi 11:18, Bayibolu likukambiya limu kuti Chiuta ‘wazamunanga wo ananga charu chapasi.’ Lemba ili lititisambiza vinthu viŵi:

1.  1. Chiuta wakanizengi ŵanthu kuti aleki kuchinangiya limu charu.

2.  2. Chiuta wachitengepu kanthu pambula kuswera. Kumbi tiziŵa wuli venivi? Mu mbiri yosi ya ŵanthu, sonu ndipu vinthu vafika paheni ukongwa mwakuti ŵanthu angananga ukongwa vamoyu

 Kumbi Chiuta wazamuchitanji kuti wamalani ndi suzgu ili? Wazamugwiriskiya ntchitu boma laki lakuchanya pamwenga Ufumu waki kuti ulamuliyi charu chosi chapasi. (Mateyu 6:10) Boma ili lazamusambiza ŵanthu akuvwiya kuti aziphweriyengi kweniso kuvikiliya vamoyu pacharu chapasi.—Yesaya 11:9.