Asani kwachitika vinthu vauchigeŵenga, mungayamba kujifumba kuti: “Kumbi Chiuta wawona viyo? Ntchifukwa wuli venivi vichitika? Kumbi uchigeŵenga  awazamumala? Kumbi ndingachita wuli kuti mantha ngo ndenangu ngamali?’ Bayibolu lingakuwovyani kuziŵa kwamuka kwakukhorweska kwa mafumbu ngenanga.

 Chiuta watinkha viwawa kweniso uchigeŵenga. (Salimo 11:5; Nthanthi 6:16, 17) Ndipu Yesu, yo wamiya Chiuta, wanguchenya akusambira ŵaki pa nyengu yo yumoza waku yiwu wangusolo lipanga ndi kukhata gutu la munthu munyaki. (Mateyu 26:50-52) Chinanga kuti anyaki akamba kuti achita vachiwawa mu zina laku Chiuta, iyu wakuŵapaska mazaza ngakuchitiya venivi cha. Kukamba uneneska, wavwisiya ndi kuvwisiya cha mapempheru ngawu.—Yesaya 1:15.

 Chiuta watiŵaŵanaŵaniya ukongwa ŵanthu wosi wo asuzgika, kusazgapu wo akwaskika ndi vauchigeŵenga. (Salimo 31:7; 1 Peturo 5:7) Kweniso Bayibolu lilongo kuti Chiuta wachitengepu kanthu kuti wamalisi vinthu vachiwawa.—Yesaya 60:18.

 Bayibolu livumbuwa chifukwa cho chichitiska kuti kuchitikengi vauchigeŵenga. Likamba kuti: “Munthu wapweteka munthu munyaki pakumulamuliya.” (Wakutawula 8:9) Kwamba kali, ŵanthu wo ŵe ndi nthazi agwiriskiya ntchitu nthowa ziheni pakukandirizga anyawu. Chifukwa cha venivi, ŵanthu wo akandirizgika achita vauchigeŵenga pakukhumba kuweze.—Wakutawula 7:7.

 Chiuta walayizga kuti wazamumalisa vinthu vosi vachiwawa kweniso vakuchitiska mantha ndipu wazamujalikisa chimangu pacharu chapasi. (Yesaya 32:18; Mika 4:3, 4) Iyu wazamutuzgapu:

•   Vo vichitiska kuti ŵanthu achitengi vauchigeŵenga. Chiuta wazamutuzgapu maboma ngosi nga ŵanthu ndipu boma laki ndilu lazamukwamba kulamuliya charu chapasi. Wakulamuliya wa boma lenili ndi Yesu Khristu, ndipu munthu weyosi wazakumuchitiya vinthu mwaurunji ndipuso wazamumalisa kukandirizgika kweniso vinthu vachiwawa. (Salimo 72:2, 14) Pa nyengu yeniyo, palivi yo wazamuchitanga vauchigeŵenga. Ŵanthu “azamukondwa ukongwa ndi chimangu chikulu.”—Salimo 37:10, 11.

•   Masuzgu ngosi ngo ŵanthu akumana nangu chifukwa cha uchigeŵenga. Chiuta wazamuchizga ŵanthu wo asuzgika chifukwa cha uchigeŵenga, kwali akupwetekeka paliŵavu pamwenga asuzgika maŵanaŵanu. (Yesaya 65:17; Chivumbuzi 21:3, 4) Ndipu walayizga so kuti wazamuyuska ŵanthu wo akufwa kuti azije ndi umoyu mucharu cha chimangu.—Yohane 5:28, 29.

 Bayibolu lititikonkhoske vifukwa vakuvwika umampha vakutiwovya kuti tigomezgengi kuti pambula kuswera, Chiuta wazamuchitapu kanthu. Kweni, panyaki mungajifumba kuti, ‘Ntchifukwa wuli Chiuta wamalisa cha uchigeŵenga?’ Kuti musaniyi kwamuka, woneriyani vidiyo yakuti Ntchifukwa Wuli Chiuta Wazomereza Kuti Tisuzgikengi?