JANI MASU!
Viwawa vo Vichitika Chifukwa cha Ndali—Kumbi Bayibolu Likambanji?
Ŵanthu pacharu chosi afipa mtima chifukwa cha viwawa vo vichitika chifukwa cha ndali.
Ku Mexico, ŵanthu 39 akumiya vipani akubayika, kweniso kwenuku kwachitikanga so viwawa vinyaki mu nyengu ya visankhu kwambiya mu 2023 mpaka 2024. Chiŵerengeru ichi chakwera ukongwa kuyeruzgiya ndi kuvuli ndipu venivi vachitiska kuti ŵanthu afipengi mtima ukongwa.
Pambula kuswera yapa ku Europe kwachitika viwawa vinandi chifukwa cha ndali kusazgapu chiŵembu cho angunozga kuti abayi nduna yira ya ku Slovakia pa 15 May 2024.
Ŵanthu ku United States achita mantha ukongwa chifukwa chakuti pa 13 July 2024 ŵanthu anyaki akhumbanga kubaya Donald Trump yo ndi pulezidenti wakali.
Ntchifukwa wuli kuchitika viwawa vinandi chifukwa cha ndali? Kumbi vazamumala nadi? Kumbi Bayibolu likambanji?
Bayibolu lingukambiya limu kuti ŵanthu azamugaŵikana chifukwa cha ndali
Bayibolu lingukambiya limu kuti nyengu yinu, kung’anamuwa “mazuŵa ngakumaliya,” anandi azamuja ndi mijalidu yo yazamuchitiska kuti ŵanthu aje achiwawa kweniso kuleka kukoliyana.
“Mu mazuŵa ngakumaliya, kuŵengi nyengu zakusuzga ukongwa. Pakuti ŵanthu azamuja . . . ambula kuwonga, ambula kugomezgeka, . . . ambula kukoliyana ndi anyawu, . . . akofya, . . . akupereka anyawu, ambula kuvwa va anyawu, akujitukumuwa.”—2 Timote 3:1-4.
Bayibolu lingukambiya so limu kuti vinthu nge kugarukiya boma kweniso viwawa vo vichitika chifukwa cha ndali vazamukuŵa visimikizu va nyengu yinu. (Luka 21:9) Kweni viwawa vo vichitika chifukwa cha ndali kweniso kugaŵikana vazamumala.
Mo viwawa vo vichitika chifukwa cha ndali vazamumaliya
Bayibolu likamba kuti boma laku Chiuta lakuchanya lazamusere mumalu mwa maboma ngosi nga ŵanthu.
“Chiuta wakuchanya wazamujalikiska ufumu wo. . . Wazamuphwanya ndi kutuzgapu maufumu [nganyaki] ngosi ngenanga, ndipu ufumu wenuwu pe ndiwu wazamuŵaku mpaka muyaya.”—Daniyeli 2:44.
Ufumu waku Chiuta ndiwu wazamuchitiska kuti ŵanthu akoliyanengi kweniso kuti pacharu chosi pazije chimangu.
Wakulamuliya ndi Yesu Khristu yo wadanika kuti “Mulongozgi Wachimangu,” ndipu wazamuwoneseska kuti ‘chimangu, chimala cha.’—Yesaya 9:6, 7.
Chinanga mphasonu panu ŵanthu wo alamulika ndi Ufumu wenuwu asambira mo angajaliya mwachimangu. Lekani Bayibolu likamba kuti: “Yiwu azamusula malipanga ngawu kuti ngaje mayembi nga pulawu ndipuso azamusula mikondu yawu kuti yije vidya vakuphatiya vimiti. Mtundu wazamunyamuwa lipanga cha kuti uyukiyi mtundu unyaki, ndipu ŵanthu azamusambira so nkhondu cha.”—Yesaya 2:3, 4.
Kuti muziŵi vinandi ŵerengani nkhani ya mutu wakuti “Kumbi ndi Vinthu Wuli vo Ufumu Waku Chiuta Ufiskengi?” kweniso woneriyani vidiyo yakuti Kumbi Ufumu Waku Chiuta Ntchinthu Wuli?