•  Mazu Ngakwamba 2

•  Chuma Chakutuliya mu Mazu Ngaku Chiuta 3-5

  •  Nkhani 3

  •  Fundu Zakuzirwa za mu Bayibolu 4

  •  Kuŵerenga Bayibolu 5

•  Kusazgiyaku Lusu Lidu mu Uteŵeti 6-14

  •  Mo Mungayambiya Kukambiskana ndi Ŵanthu 7

  •  Muchitengi Maulendu Ngakuweriyaku 8

  •  Musambizengi Ŵanthu Kuti aje Akusambira 9

  •  Kukonkhosa vo Mugomezga 10

  •  Nkhani 11

  •  Mo Mungapharazgiya 12

  •  Chakuchitika 13

  •  Kugwiriskiya Ntchitu Mavidiyo Ndipuso Mabuku 14

•  Tichitengi Vinthu nge Akhristu 15-16

  •  Sambiru la Bayibolu la Mpingu 16

•  Mazu Ngakumaliya 17

•  Kuwonga Ndipuso Kupereka Ulongozgi 18

•  Kusunga Nyengu 19

•  Asani Wakuwonere Dera Wacheze Mpingu 20

•  Sabata ya Unganu Wadera Pamwenga Wachigaŵa 21

•  Sabata ya Chikumbusu 22

•  Wakuwonere Unganu wa Umoyu Widu Wachikhristu Ndipuso Uteŵeti 23

•  Cheyamani wa Unganu wa Umoyu Widu Wachikhristu Ndipuso Uteŵeti 24

•  Wakovya Kupereka Ulongozgi 25

•  Makilasi Nganyaki 26

•  Mavidiyo 27

1. Ulongozgi wo we mufomu iyi uwovyengi wosi wo apaskika nkhani mu Unganu wa Umoyu Widu Wachikhristu Ndipuso Uteŵeti. Wo apaskika nkhani atenere kuweriyamu mu ulongozgi wa nkhani yawu wo we mu Kabuku ka Unganu wa Umoyu Wachikhristu Ndipuso Uteŵeti ndipuso mu fomu iyi ŵechendanozgeke nkhani yawu. Apharazgi wosi atenere kuchiskika kuti apaskikengi nkhani za akusambira. Ŵanthu anyaki wo awungana mwaphamphu ndi mpingu nawu angapaskika nkhani zenizi asani vakuchita vawu vikoliyana ndi vo Bayibolu lisambiza ndipuso nkharu yawu yikoliyana ndi fundu zachikhristu. Wakuwonere Unganu wa Umoyu Widu Wachikhristu Ndipuso Uteŵeti, watenere kukambiskana ndi weyosi yo ndi mupharazgi cha kweni wakhumba kuti wapaskikengi nkhani, vo vikhumbika kuti waje wakwenere ndipu pavuli paki wamukambiyi asani ngwakwenere. Ivi vitenere kuchitika pamasu pa munthu yo wasambira nayu Bayibolu (pamwenga pamasu pa apapi ŵaki achikhristu). Vo munthu yo ndi mupharazgi cha wakhumbika kufiska viyanana ŵaka ndi vo munthu yo wakhumba kuja mupharazgi wambula kubatizika wakhumbika kufiska.—od mutu 8 ndimi 8.

2. 1 miniti. Sabata yeyosi, pavuli pa sumu yakwamba ndi pempheru, Cheyamani wa Unganu wa Umoyu Widu Wachikhristu Ndipuso Uteŵeti watenere kukonkhoska mwakudumuwa vo tisambirengi. Iyu wakambengi ŵaka fundu zo ziwovyengi mpingu.

 3. Nkhani: 10 minisi. Mu Kabuku ka Unganu wa Umoyu Wachikhristu Ndipuso Uteŵeti mulembeka mutu wa nkhani kweniso fundu zikuluzikulu ziŵi pamwenga zitatu pachigaŵa chenichi. Nkhani iyi yitenere kukambika ndi mura pamwenga mteŵeti wakovya wakwenere. Sabata yeyosi yo tiyambengi kusambira buku lasonu la mu Bayibolu tiwoneriyengi vidiyo yakukonkhoska buku lo. Wakukamba nkhani iyi wakambengi kukoliyana kwa vidiyo ndi mutu wa nkhani. Kweni watenere kuwonesesa kuti wakonkhoska so fundu za mukabuku ka unganu. Asani nyengu yeche ŵaka watenere so kugwiriskiya ntchitu vithuzi vo vanozgeka kuti vitiwovyi kuvwisa vo tisambira. Wangagwiriskiya so ntchitu malifalensi kuti wavwikisi umampha fundu zo ze munkhani yaki.

 4. Fundu Zakuzirwa za mu Bayibolu: 10 minisi. Nkhani iyi nja mafumbu ndi kumuka kweni yilivi mazu ngakwamba ndi ngakumaliya. Yitenere kukambika ndi mura pamwenga mteŵeti wakovya wakwenere. Iyu watenere kuwonesesa kuti wafumba akuvwisiya mafumbu ngosi ngaŵi. Wangasankha so kuŵerenga mavesi ngosi ngo ngaŵikika pamwenga cha. Wo apempheka kuti amuki, angajumphanga cha masekondi 30.

 5. Kuŵerenga Bayibolu: 4 minisi. Mubali ndiyu wapaskikengi nkhani iyi. Kweni watenere cha kukamba mazu ngakwamba pamwenga ngakumaliya. Cheyamani wa unganu watenere kuwovya wakusambira kuti waŵerengi mwakulondo, mwakuvwika umampha, kwambula kugotagota, kudidimiza mazu mumalu ngakwenere, kusinthasintha mazu, kuma mumalu ngakwenere ndipuso kuŵerenga nge mo walongolore nyengu zosi. Chifukwa chakuti nyengu zinyaki chigaŵa chakuŵerenga Bayibolu chija chitali ndipu nyengu zinyaki chija chifupi, wakuwonere Unganu wa Umoyu Wachikhristu Ndipuso Uteŵeti watenere kuwona dankha lusu la munthu wechendamugaŵiyi nkhani iyi.

6. 15 minisi. Chigaŵa ichi chikunozgeka kuti chiwovyi munthu weyosi kuyesere vo wangachita mu uteŵeti ndipuso kusazgiyaku lusu laki pakupharazga ndi kusambiza. Asani mphakwenere kuchita viyo, ŵara nawu angapasika nkhani za akusambira. Wakusambira weyosi watenere kugwiriyapu ntchitu pa fundu za sambiru lo wapasika kutuliya mu kabuku ka Kusambiza pamwenga Muyanjengi Ŵanthu lo lazamuwonekiyanga mumphata mwa nkhani yo mwapasika mu Kabuku ka Unganu wa Umoyu Wachikhristu Ndipuso Uteŵeti. Nyengu zinyaki, pa chigaŵa ichi paŵikikengi nkhani zakukambiskana. Nkhani izi zitenere kukambika ndi ŵara pamwenga ateŵeti akovya akwenere.—Wonani  ndimi 15 pa nkhani ya mo mungakambiya nkhani zakukambiskana.

 7. Mo Mungayambiya Kukambiskana ndi Ŵanthu: Nkhani ya wakusambira iyi yitenere kukambika ndi mubali pamwenga mzichi. Asani mubali ndiyu wapaskika nkhani iyi, wakovyana nayu waje so mubali ndipu asani ndi mzichi wakovyana nayu waje so mzichi pamwenga munthu munyaki wa mu banja laki. Wakukamba nkhani ndipuso wakovyana nayu angaja pasi pamwenga kumawima.—Kuti muziŵi vinandi pa mo mungapharazgiya ndipuso chakuchitika, wonani  ndimi 12 ndi  13.

 8. Muchitengi Maulendu Ngakuweriyaku: Nkhani ya wakusambira iyi yitenere kukambika ndi mubali pamwenga mzichi. Asani mubali ndiyu wapaskika nkhani iyi, wakovyana nayu waje so mubali ndipu asani ndi mzichi wakovyana nayu waje so mzichi. (km 5/97 peji 2) Wakukamba nkhani ndipuso wakovyana nayu angaja pasi pamwenga kumawima. Wakusambira watenere kulongo vo tingakamba asani taweriyaku ku munthu yo tingumupharazgiya.—Kuti muziŵi vinandi pa mo mungapharazgiya ndipuso chakuchitika, wonani  ndimi 12 ndi  13.

 9. Musambizengi Ŵanthu Kuti aje Akusambira: Nkhani ya wakusambira iyi yitenere kukambika ndi mubali pamwenga mzichi. Asani mubali ndiyu wapaskika nkhani iyi, wakovyana nayu waje so mubali ndipu asani ndi mzichi wakovyana nayu waje so mzichi. (km 5/97 peji 2) Wakukamba nkhani ndipuso wakovyana nayu angaja pasi pamwenga kumawima. Nkhani iyi yitenere kuja chakuyeruzgiyapu cha sambiru la Bayibolu lo layamba kali kuchitika. Chakuyeruzgiyapu ichi chikhumbika cha kuja ndi mazu ngakwamba pamwenga ngakumaliya pijapija fundu ya musambiru lo mwapasika yakamba viyo. Pakhumbika cha kuŵerenga ndimi zosi zo mwapasika mu nkhani yinu, mungachita viyo asani mupenja kuvwikisa fundu yinyaki.

 10. Kukonkhoska vo Mugomezga: Asani ndi nkhani, yipasikengi ku mubali. Asani ntchakuyeruzgiyapu, yingapasika kwa mubali pamwenga mzichi. Asani mubali ndiyu wapaskika nkhani iyi, wakovyana nayu waje so mubali ndipu asani ndi mzichi wakovyana nayu waje so mzichi pamwenga munthu munyaki wa mu banja laki. Wakusambira watenere kumuka mwakuvwika umampha ndipuso mwazeru kuti vikoliyani ndi mutu wa nkhani yaki mwakukoliyana ndi malifalensi ngo wapasika. Wakusambira wangasankha kugwiriskiya ntchitu malifalensi pamwenga cha panyengu ya nkhani yaki.

 11. Nkhani: Nkhani ya wakusambira iyi yitenere kupasika kwa mubali ndipu wayikambi nge nkhani ku mpingu. Asani nkhani iyi yatuliya mu fundu zakukumaliya A mu kabuku kakuti Muyanjengi Ŵanthu, wakusambira watenere kukonkhoska mo tingagwiriskiya ntchitu mavesi ngo mu uteŵeti. Mwakuyeruzgiyangu, watenere kukonkhosa nyengu yo titenere kugwiriskiya ntchitu vesi lo, vo ling’anamuwa ndipuso mo tingasambiziya munthu. Asani nkhani yo yatuliya mu sambiru lelosi mu kabuku kakuti Muyanjengi Ŵanthu, wakusambira yo watenere kukonkhoska mo tingagwiriskiya ntchitu fundu yo mu uteŵeti. Watenere so kukonkhoska chakuyeruzgiyapu cho che mu fundu yakwamba mu sambiru lo pamwenga wangakonkhoska mavesi nganyaki ngo nge mu sambiru lo, asani wawona kuti ngangawovya.

   12. Mo Mungapharazgiya: Ndimi iyi ndipuso yakulondopu zikamba ukongwa vakukwaskana ndi nkhani ya “Mo Mungayambiya Kukambiskana ndi Ŵanthu” ndipuso “Muchitengi Maulendu Ngakuweriyaku.” Pijapija asani pe kusintha, kweni chilatu cha wakusambira chiŵengi kupharazga uneneska upusu wa mu Bayibolu wakwenere ku munthu yo walongoro nayu ndipuso wasiyi pakwambiya kuzikambiskana nyengu yinyaki. Wakusambira watenere kusankha nkhani yakwenere ndipuso yo yingafika ŵanthu pa mtima muchigaŵa chawu. Wangasankha so kuzumbuwa buku pamwenga vidiyo kutuliya pa Vidya Vakusambiziya. Mumalu mwa kukamba nkhani mwakuchita kuloŵeza, wakusambira watenere kulongo lusu la mo tingakambiskiyana ndi ŵanthu nge kukamba nkhani zo zingaŵakondwesa ndipuso kulongoro nge mo tilongolore nyengu zosi.

   13. Chakuchitika: Wakusambira wangagwiriskiya ntchitu nthowa yeyosi ya upharazgi mwakukoliyana ndi chigaŵa chidu. Mwakuyeruzgiyapu:

1.  (1) Kupharazga ku Nyumba ndi Nyumba: Chakuchitika ichi chisazgapu kupharazga khomu ndi khomu—kaya pamasu ndi pamasu, pa foni pamwenga kugwiriskiya ntchitu kalata—ndipuso kuchita ulendu wakuweliyaku ku munthu yo mungukambiskanapu nayu kuvuli pa upharazgi waku nyumba ndi nyumba.

2.  (2) Kupharazga Mwamwaŵi: Chakuchitika ichi chikonkhosa za kusaniriyapu mwaŵi po mukambiskana nkhani wamba ndi kuyisintha kuja upharazgi. Visazgapu kupharazgiya ŵanthu vo malemba ngakamba ku ntchitu, ku sukulu, ŵanthu wo muja nawu pafupi, asani mwe mu galimotu pamwenga kwekosi ko mungaŵa pa vakuchitika vinu va zuŵa ndi zuŵa.

3.  (3) Kupharazga Kumalu ko Kusanirika Ŵanthu Anandi: Chakuchitika ichi chisazgapu upharazgi wa kashelufu, malu nga bizinesi, mumusewu, ku paki, mwakumika magalimotu pamwenga kwekosi ko ŵanthu angasanirika.

 14. Kugwiriskiya Ntchitu Mavidiyo Ndipuso Mabuku: Mwakukoliyana ndi mo vinthu viliri, wakusambira wangasankha kugwiriskiya ntchitu vidiyo pamwenga buku. Asani nkhani yo wakusambira wapasika ye ndi vidiyo pamwenga asani wasankha kugwiriskiya ntchitu vidiyo, wangayiwonesanga cha, mumalu mwaki watenere kuyizumbuwa ŵaka ndipuso kuyikonkhosa.

15. Asani sumu yamala, pachigaŵa ichi pakambika nkhani yimoza pamwenga ziŵi kwa maminisi 15. Nkhani zenizi zitovya akuvwisiya kuti agwiriskiyengi ntchitu vo asambira mu Mazu ngaku Chiuta. Asani palivi ulongozgi wakuti nkhani iyi yikambiki ndi mura pe, ndikuti yingakambika so ndi mteŵeti wakovya wakwenere. Kweni asani ndi nkhani yakovya mpingu, yitenere kukambika ndi mura pe. Asani nkhani njakukambiskana, wakukamba nkhani watenere kufumba mafumbu nyengu yosi ya nkhani yaki kusazgiyapu pa mafumbu ngo ngaŵikika mu nkhani yaki. Iyu watenere kukonkhoska mazu ngakwamba mwakudumuwa, kuti nyengu yikulu yije yakukambiya fundu zikulu za mu nkhani yo ndipuso kukambiskana ndi akuvwisiya. Asani nkhani yo ye ndi kufumba, vingaŵa umampha kuti yo wafumbikengi asani wangafiska wakamukiyengi pa pulatifomu mumalu mwakumukiya po waja.

  16. Sambiru la Bayibolu la Mpingu: 30 minisi. Mura wakwenere ndiyu watenere kuchitiska Sambiru la Bayibolu la Mpingu. (Asani mpingu we ndi ŵara amana, ateŵeti akovya akwenere angachitiska Sambiru la Bayibolu la Mpingu asani pangakhumbika nadi kuchita viyo.) Wupu wa ŵara utenere kusankha ŵara akwenere wo angachitiska Sambiru la Bayibolu la Mpingu. Ŵara wo asankhika atenere kuchitiska sambiru lenili mwalusu kuti aleki kurya nyengu. Kweniso atenere kukonkhoska malemba ngo nge ndi fundu zikuluzikulu ndipuso kuwovya akuvwisiya kuti amukengi fundu zo zingawovya abali ndi azichi pa umoyu wawu. Wosi wo asankhika kuti achitisengi Sambiru la Bayibolu la Mpingu atenere kuŵerenga ndipuso kugwiriskiya ntchitu ulongozgi wa nkhani ya mafumbu ndi kumuka. (w23.04 peji 24, bokosi) Asani fundu zosi zakukhumbika zakonkhoskeka kali, palivi chifukwa cha kuliguziya sambiru lo. Vingaŵa so umampha kugwiriskiya ntchitu abali akupambanapambana sabata yeyosi kuti achitiskengi ndi kuŵerenga pa Sambiru la Bayibolu la Mpingu. Asani cheyamani wa Unganu wa Umoyu Wachikhristu wakamba kuti sambiru lichitiki mwakudumuwa, mubali yo wachitiska wangasankha yija mo wangachitiskiya. Iyu wangasankha kuŵerengaku ndimi zinyaki, zinyaki kuzisiya.

17. 3 minisi. Cheyamani wa Unganu wa Umoyu Wachikhristu Ndipuso Uteŵeti, watenere kukamba fundu zakovya zo tasambira. Iyu wangakamba so vo tazamusambira sabata yamawa. Wakambi mazina nga ŵanthu wo apasika nkhani za akusambira sabata ya mawa. Pijapija asani pe ulongozgi unyaki, kweni vipharazgu vosi vakukhumbikiya ndipuso makalata ngosi vitenere kuŵerengeka ku mpingu ndi cheyamani pa nyengu ya mazu ngakumaliya. Vipharazgu va nyengu zosi vakukwaskana ndi kupharazga ndipuso kutowesa Nyumba ya Ufumu, vingapharazgikanga cha kweni viŵikikengi pabolodi la mpingu. Asani cheyamani wawona kuti wafiskengi cha kukamba vipharazgu pamwenga kuŵerenga makalata pa nyengu yo wakambiya mazu ngakumaliya, wangapempha wo akambengi nkhani pa chigaŵa chakuti Tichitengi Vinthu Nge Akhristu kuti ayesesi kukamba nkhani zawu mwakudumuwa. (wonani  ndimi 16 ndi  19.) Maunganu ngatenere kumala ndi sumu ndipuso pempheru.

18. Kwa miniti yimoza, cheyamani wa Unganu wa Umoyu Wachikhristu Ndipuso Uteŵeti wakhumbika kupereka ulongozgi kweniso kuwonga wakusambira weyosi asani wamaliza kukamba nkhani yaki mwakugwiriskiya ntchitu fundu za musambiru lo wapasika. Asani cheyamani wadana wakusambira kuti wakambi nkhani, wangakambanga cha sambiru lo wakusambira wagwiriskiyengi ntchitu pakukamba nkhani yaki. Kweni asani wamaliza kukamba nkhani yaki ndipuso asani wamuwonga, cheyamani wangakamba sambiru lo wakusambira wagwiriskiya ntchitu. Ndipuso wakambi chifukwa cho wakambiya kuti wachita umampha pamwenga wangakamba mwaulemu chifukwa cho wakusambira wakhumbikiya kugwiriyapu ntchitu pa ulongozgi wo wangupaskika. Cheyamani wangakamba so vinthu vinyaki vo wakusambira wachita umampha mu nkhani yaki asani wawona kuti vingawovya wakusambira yo pamwenga akuvwisiya. Asani cheyamani wawona kuti wakusambira wakhumbika kupaskika ulongozgi wakusazgiyapu wa mu kabuku kakuti Muyanjengi Ŵanthu, ka Jiperekeni pamwenga buku la Sukulu ya Utumiki, watenere kumukambiya pakuyija mwaulemu asani maunganu ngamala pamwenga nyengu yinyaki.—Kuti muziŵi vinandi vakukwaskana ndi cheyamani wa Unganu wa Umoyu Wachikhristu Ndipuso Uteŵeti kweniso udindu wa mubali wakovya kupereka ulongozgi,  wonani ndimi 19,  24, ndipuso  25.

19. Wakukamba nkhani weyosi kweniso cheyamani wa Unganu wa Umoyu Wachikhristu Ndipuso Uteŵeti, atenere cha kurya nyengu. Chinanga kuti Kabuku ka Unganu wa Umoyu Wachikhristu Ndipuso Uteŵeti kalongo nyengu pa nkhani yeyosi, kweni asani fundu za mu nkhani yidu takamba zosi kweni nyengu yecheŵaka, palivi chifukwa chakusazgiyaku fundu zinyaki ndi chilatu chakuti tikwanisi nyengu yo tapasika. Asani akukamba nkhani anyaki arya nyengu, cheyamani wa Unganu wa Umoyu Ndipuso uteŵeti pamwenga wakovya kupereka ulongozgi wakhumbika kuŵawovya pakuŵija. (Wonani  ndimi 24 ndi  25.) Unganu wosi, kusazgiyapu sumu ndi pempheru, utenere kuchitika kwa ora limoza ndi maminisi 45.

20. Asani wakuwonere dera wacheze mpingu winu, maunganu ngachitikengi mwakulondo ndondomeku ya mu Kabuku ka Unganu wa Umoyu Wachikhristu Ndipuso Uteŵeti. Kweni wakuwonere dera wakambengi nkhani ya uteŵeti ya maminisi 30 mumalu mwa Sambiru la Bayibolu la Mpingu. Nkhani ya uteŵeti yechendayambi, cheyamani wa Unganu wa Umoyu Wachikhristu Ndipuso Uteŵeti wakonkhoskengi mwakudumuwa fundu zo tasambira, vo tazamusambira sabata yamawa, vipharazgu asani vilipu kweniso kuŵerenga makalata. Ndipu pavuli paki, wangadana wakuwonere dera. Asani wakuwonere dera wamaliza nkhani yaki, maunganu ngatenere kumala ndi sumu yo wasankha. Pakumaliya, iyu wangadana mubali munyaki kuti ndiyu wazipereki pempheru lakumaliya. Makilasi nganyaki nga chineneru cha mpingu wo, ngatenere cha kuchitika pa sabata yo wakuwonere dera wacheze mpingu. Kweni kagulu ka chineneru chinyaki kangachita maunganu ngosi chinanga mphanyengu yo wakuwonere dera wacheze mpingu wo uwonere kagulu ko. Kweni asani kagulu ko kamaliza kuchita maunganu ngaki nge mo kachitiya nyengu zosi, katenere kuvwisiya nkhani ya uteŵeti ya wakuwonere dera pamoza ndi mpingu wo uwonere kagulu ko.

21. Mungachitanga cha maunganu nga mpingu asani mwe ndi unganu wadera pamwenga wachigaŵa. Weyosi wangasambira nkhani za sabata yo pakuyija pamwenga nge banja.

22. Asani Chikumbusu chichitikengi mukati mwa sabata, mungachitanga cha Unganu wa Umoyu Wachikhristu Ndipuso Uteŵeti.

23. Wupu wa ŵara usankha mura yo wajengi wakuwonere Unganu wa Umoyu Wachikhristu Ndipuso Uteŵeti. Iyu wakhumbika kuwonesesa kuti unganu uwu uchitika mwandondomeku kweniso mwakukoliyana ndi ulongozgi uwu. Watenere kukambiskana kaŵikaŵi ndi wakovya kupereka ulongozgi. Asani Kabuku ka Unganu wa Umoyu Wachikhristu Ndipuso Uteŵeti kaza ŵaka, wakuwonere Unganu wa Umoyu Wachikhristu Ndipuso Uteŵeti watenere kugaŵiya limu nkhani zosi za mu kabuku ko. Venivi visazgapu kugaŵa nkhani zosi ndi za akusambira kweniso kusankha abali wo angaja macheyamani kutuliya pa abali wo akusankhika ndi wupu wa ŵara. (Wonani  ndimi 3-16 ndi  24.) Asani wagaŵa nkhani za akusambira watenere kuŵanaŵaniya msinkhu, lusu ndipuso wanangwa wakulongoro wo wakusambira yo wenawu pa nkhani yo wakhumba kumugaŵiya. Watenere so kugwiriskiya ntchitu fundu zenizi asani wagawa nkhani zinyaki za mu unganu. Wakuwonere unganu uwu watenere kupereka nkhani zosi asani kwaja masabata ngatatu kuti munthu wakambi nkhani yo. Fomu ya Nkhani ya mu Unganu wa Umoyu Widu Wachikhristu Ndipuso Uteweti (S-89) yitenere kukgwiriskiya ntchitu pa nkhani za akusambira. Iyu watenere kuwonesesa kuti ndondomeku ya ŵanthu akukamba nkhani yaŵikika pa bolodi la mpingu. Wupu wa ŵara ungasankha mura munyaki pamwenga mteŵeti wakovya kuti wamuwovyengi. Chinanga wuli veviyo, ateŵeti akovya atenere kugaŵa nkhani za akusambira pe.

24. Sabata yeyosi, mura yumoza waja cheyamani wa Unganu wa Umoyu Wachikhristu Ndipuso Uteŵeti. (Asani mpingu we ndi ŵara amana, mungagwiriskiya ntchitu ateŵeti akovya akwenere.) Mura mwenuyu ndiyu wakambengi mazu ngakwamba ndi ngakumaliya. Iyu ndiyu wadanengi wakukamba nkhani weyosi, vingathemba ndi unandi wa ŵara iyu we ndi udindu wakuti wangakamba nkhani zinyaki pa unganu uwu, ukongwa nkhani zo zikhumba kuwonesa vidiyo pe kwambula kukambiskana. Wangakambanga mazu nganandi cha asani tituwa pankhani yinyaki kuluta pankhani yinyaki. Wupu wa ŵara ndiwu usankhengi ŵara akwenere wo angaja macheyamani. Ŵara wo asankhika akhumbika kusinthana pakuchita ucheyamani sabata yeyosi. Mwakukoliyana ndi mo vinthu viliri mu mpingu winu, wakuwonere Unganu wa Umoyu Wachikhristu Ndipuso Uteŵeti wangagwiriskikiya ntchitu nge cheyamani pafupipafupi kuphara ŵara anyaki. Asani mura wakuzomerezeka kuti wachitiskengi Sambiru la Bayibolu la Mpingu ndikuti wangaja so cheyamani wa unganu uwu. Kweni ziŵani kuti mura yo wajengi cheyamani wakhumbika kuwonga kweniso kupereka ulongozgi mwachanju kwa abali pamwenga azichi wo apaskika nkhani za akusambira. Cheyamani wakhumbika so kuwonesesa kuti unganu wamala pa nyengu yaki. (Wonani  ndimi 17 ndi  19.) Asani cheyamani wangayanja kweniso asani papulatifomu pe malu ngakukwana, pangaŵikika ma mayikulofoni ngaŵi kuti yimoza cheyamani wayigwiriskiyengi ntchitu pakudana wakukamba nkhani weyosi. Ndipu yo wakambengi nkhani watenere kuma pa mayikulofoni yinyaki. Kweniso, asani cheyamani wangayanja, wangaja pasi kupulatifomu ndi thebulu laki pa nyengu yo wakusambira waŵerenga Bayibolu kweniso asani akusambira akamba nkhani pachigaŵa cha Kusazgiyaku Lusu Lidu mu Uteŵeti. Ivi vingawovya kuti asungi nyengu.

25. Asani vingachitika, mura yo wakamba umampha nkhani ndiyu watenere kuja wakovya kupereka ulongozgi. Iyu wakhumbika kupaska munthu ulongozgi kwakuyija asani mphakwenere. Wangapereka ulongozgi ku mteŵeti wakovya pamwenga mura pa nkhani yeyosi yo wangakamba nge, nkhani za Unganu wa Umoyu Wachikhristu Ndipuso Uteŵeti, nkhani zachisanisani, kuchitiska pamwenga kuŵerenga Chigongwi cha Mlinda ndi Sambiru la Bayibolu la Mpingu. (Wonani  ndimi 19.) Asani mpingu winu we ndi ŵara anandi wo akamba nkhani ndi kusambiza umampha, mutenere kusintha wakovya kupereka ulongozgi chaka chechosi. Iyu watenere cha kupereka ulongozgi pa nkhani yeyosi yo abali akamba, kweni wangachita viyo pijapija asani wawona kuti mphakwenere nadi.

26. Mpingu ungaja ndi makilasi nganyaki asani wo alembesa kuti akambengi nkhani za akusambira mbanandi. Vingaja umampha kuti kilasi lelosi lije ndi mura wakwenere yo wangaja cheyamani wa kilasi lo. Asani mphakwenere, mteŵeti wakovya wakwenere wangaja cheyamani wa kilasi linyaki. Wupu wa ŵara ndiwu utenere kusankha yo wangaja cheyamani wa kilasi linyaki ndipuso ukhumbika kuwona asani pangakhumbika kusinthasintha. Cheyamani wa kilasi linyaki watenere kulondo fundu zo ze mu  ndimi 18. Asani muŵengi ndi kilasi linyaki, mukhumbika kupempha akusambira kuti aluti ku kilasi lawu pavuli pa nkhani ya Fundu Zakuzirwa za mu Bayibolu mu chigaŵa chakuti Chuma Chakutuliya mu Mazu Ngaku Chiuta. Yiwu atenere kuwere ko kwe mpingu asani nkhani za akusambira zamala.

27. Mavidiyo ngo ngasankhika ndingu tiwoneriyengi pa unganu wenuwu. Mavidiyo nga mu unganu wa mkati mwasabata ngasanirikengi pa JW Library® ndipu mungapanga dawunilodi pa vipangizu vakupambanapambana.

© 2023 Watch Tower Bible and Tract Society of Pennsylvania

S-38-CT 11/23