Chaka cha 2022 ndi chaka cho Akaboni aku Yehova ku Albania, akumbukiya kuti akwanisa vyaka 100.

Nasho Idrizi wenga yumoza mwa ŵanthu akwamba kuja Akaboni aku Yehova ku Albania. Pa nyengu yo wenga ku United States cha mu ma 1920, iyu wangusambira Bayibolu ndi Akusambira Bayibolu, wo pavuli paki angwamba kudanika kuti Akaboni aku Yehova.

Nasho wanguwere ku Albania mu 1922. Mukuluta kwanyengu, ŵanthu anyaki a ku Albania wo anguja Akusambira Bayibolu pa nyengu yo ajanga ku United States, anguwere kwawu kuti akakambiyeku anyawu vo angusambira.

Thanas Duli wenga yumoza mwa Akusambira Bayibolu akwamba ku Albania. Iyu wangukamba kuti: “Mu 1925, ku Albania kwenga mipingu yitatu kusazgapu kagulu kakutali ka Akusambira Bayibolu kweniso ŵanthu alinweka.”

Mu vyaka vakwambiriya venivi, mabuku nganandi ngafwatulikanga muchineneru cha Chialbaniya, nge ngakuti The Harp of God ndi A Desirable Government. Chigongwi cha Mlinda cha December 1 1925, chingukamba kuti “ŵanthu anandi a ku Albania angulonde mabuku nga Chialbaniya ndipu anandi akondwanga kusambira uneneska.”

Ŵanthu angwamba kudana Akaboni kuti mba ungjillorë, kung‘anamuwa “apharazgi,” chifukwa cha phamphu lo ŵenga nalu pa ntchitu yakupharazga. Nasho Dori, yo wakubatizika mu 1930, wangukamba kuti: “Mu 1935, gulu lidu lingupanga hayala basi ndipu tinguluta mutawuni ya Këlcyrë kuchipharazga. Pavuli paki, tingunozga kuti tikawoni malu ngakupambanapambana mu Albania, ndipu tinguluta mutawuni ya Përmet, Leskovik, Ersekë, Korçë, Pogradec, ndi Elbasan. Tingumaliza kuwona malu ku Tirana pa nyengu yaki, kuti tikachiti Mwambu Wakukumbukiya Nyifwa yaku Yesu.”

Mu 1939, boma la Italy lavwanga va munthu cha, ndipu lalamuliyanga charu cha Albania kweniso lingukaniza Akaboni aku Yehova. Chifukwa chakuti abali ndi azichi ŵidu angukana kuseleriyamu mu ndali kweniso kuchitaku nkhondu ya pakati pa charu cha Greece ndi Italy, yiwu angutombozgeka ukongwa. a Mu vyaka venivo, abali 15 anguŵalutisa kujeri. Mubali Nikodhim Shyti angumutumiza kumsasa wakutombozgiyaku ŵanthu ndipu wanguziŵika so cha kuti ngwamoyu pamwenga cha.

Kukumaliya kwa Nkhondu Yachiŵi ya Pacharu Chosi, chipani cha Communist chingwamba kulamuliya ku Albania in 1944. Kutombozgeka kungulutiriya. Abali ŵidu anandi anguŵajaliya mujeri ndipuso kuŵatombozga. Anyaki anguŵatumiza ku misasa yakutali ndi mabanja ngawu, kuti akagwirengi ntchitu. Mu vyaka venivo, charu cha Albania chatinkhikanga pacharu chosi. Buku Lapachaka la Akaboni aku Yehova la 1959 lingukamba kuti: “Chinanga kuti charu cha Albania chingafiska kupatuska abali ku gulu la New World Society, kweni chingatondekesa cha mzimu wakupatulika waku Chiuta kuti uŵawovyi.” Mu 1967 charu cha Albania chenga chakwamba kupharazga pakweru kuti chigomezga cha kuti Chiuta waliku. Kagulu ka Akaboni wo anguja mucharu cho angulutirizga mwakuphwere kuchita vo agomezga.

Pa 22 May 1992, chipani cha Communism, chati chaluza, Akaboni aku Yehova anguja chisopa chakuzomerezeka mwadangu, ntchitu yawu yati yakanizika ndi boma kwa vyaka vakujumpha 50.

Pasonu panu, ku Albania kwe Akaboni akukwana 5,550 wo ateŵete mu mipingu 89. Tikondwa limoza ndi abali ndi azichi ŵidu chifukwa chakuti “mazu ngaku Yehova ngangulutirizga kuwanda ndi kuja nganthazi” chinanga kuti atombozgekanga ukongwa.—Machitidu 19:20.