Pa 13 January, 2024, Mubali Jeffrey Winder wa mu Wupu Wakulongozga wangutuzga Bayibolu la Charu Chifya la Malemba nga Chigiriki Ngachikhristu mu Chichokwe. Bayibolu ili lingutuzgika pa unganu wapade wo unguchitikiya pa ofesi ya nthambi mutawuni yikulu ya Luanda, ku Angola. Abali ndi azichi 187 anguwonere unganu wenuwu pamasu ndi pamasu ndipu anyaki 353,427 angulumikiza kuziya pa vidiyokoniferensi. Pa gulu lenili penga abali ndi azichi 1,644 wo alongoro Chichokwe. Abali ndi azichi anandi wo angusanirika pa unganu wenuwu angulonde Bayibolu la Malemba nga Chigiriki Ngachikhristu lakuchita kupulinta. Ndipu la pavipangizu va mazuŵa nganu nalu, angulichita dawunilodi lati latuzgika ŵaka.

Pafufupi ŵanthu 3 miliyoni alongoro Chichokwe ku Angola, Democratic Republic of the Congo ndipuso ku Zambia. Pasonu panu, abali ndi azichi 462 awungana mu mipingu 10 ya Chichokwe ku Angola. Kusazgapu yapa, abali ndi azichi 734 awungana mu mipingu 21 ya Chichokwe ku Democratic Republic of the Congo.

Mu nkhani yo wangukamba wachituzga Bayibolu lenili, Mubali Winder wangukamba kuti mu Bayibolu la Charu Chifya la Malemba nga Chigiriki Ngachikhristu zina laku Chiuta lakuti Yehova lisanirika maulendu 237. Mubali munyaki wangukamba kuti: “Pa Aroma 10:13 pakamba kuti ‘weyosi yo wadaniya pa zina laku Yehova wazamutaskika.’ Kweni Mabayibolu nganyaki nga Chichokwe ngakonkhoska mwakuvwika umampha cha vo lemba ili ling’anamuwa. Mwaviyo, ndamugwiriskiyanga ntchitu ukongwa Bayibolu la Malemba nga Chigiriki Ngachikhristu kuti ndiwovyi ŵanthu kuvwisa kukoliyana ko kulipu, pakati pa zina laku Yehova ndi kutaskika. Iyi ndi mphasu yapade limu!”

Tigomezga kuti Bayibolu la Charu Chifya la Malemba nga Chigiriki Ngachikhristu la Chichokwe liwovyengi ŵanthu anandi kusambira vakukwaskana ndi Yehova kweniso kuti amuyanjengi ndi mtima wawu wosi ndipuso nthazi zawu zosi.—Mariko 12:33.