Pa Sabata, pa 21 November 2021, Mubali Eric Raffaeli, wa mu Komiti ya Nthambi ku Angola, wangutuzga Bayibolu la Charu Chifya la Malemba nga Chigiriki Ngachikhristu la chineneru cha Chikimbundu lakuŵerenge pa vipangizu va mazuŵa nganu. Mabayibolu ngakupulinta ngayambengi kusanirika mu 2022. Ŵanthu pafufupi 11,000 anguwonere pulogilamu yo yinguchita kujambulika.

Cha mu ma 1920, boma la Portuguese lingukaniza kuti angasambiranga cha chineneru cha Chikimbundu ku sukulu, kusazgapu vineneru vinyaki va ku Africa. Mazuŵa nganu, Chikimbundu chikambika ndi ŵanthu pafufupi 1.7 miliyoni ku Angola, kusazgapu ŵanthu wo aja mutawuni ya Luanda. Chineneru chenichi, ntchimoza mwa vineneru vikuluvikulu ku Angola.

Mabuku nga Akaboni aku Yehova ngaja ngachisanirika muchineneru cha Chikimbundu kwambiya cha mu ma 1990. Kweni mpingu wakwamba wa Chikimbundu ungujalikiskika cha mpaka mu 2008. Pasonu panu, kwe mipingu 55 ya chineneru cha Chikimbundu yo ye ndi apharazgi 2,614.

Kwa akuŵerenga anandi, Bayibolu lenili ndambula kusuzga kuvwisa kuphara Bayibolu lakali. Mwakuyeruzgiyapu, mu Bayibolu lakali, lemba la Mateyu 5:3 akufwatuliya kuti: “Mbakutumbikika wo mbakavu mu mzimu.” Kweni mu Bayibolu la Charu Chifya, lemba ili akulifwatuliya kuti: “Mbakukondwa wo aziŵa kuti akhumbika Chiuta.”

Wakufwatuliya munyaki wangukamba kuti: “Ndisimikiza kuti Bayibolu lenili liŵengi vitumbiku kwa abali ndi azichi ŵidu wo alongoro Chikimbundu. Yiwu angaligwiriskiya ntchitu pakusambira pakuŵija kweniso muuteŵeti ndipu liŵawovyengi kuja paubwezi wakukho ndi Yehova. Ndiwona kuti Bayibolu lenili ntchanju chaku Yehova.”

Tiziŵa kuti Bayibolu la Chikimbundu lenili liwovyengi abali ndi azichi ŵidu wo alongoro chineneru chenichi kuti awovyi ŵanthu amtima wamampha ‘kuvwisa visisi vakupaturika va Ufumu waku Chiuta.’—Luka 8:10.