Pa pulogilamu yapade yo yinguchitika pa September 23, 2023, Mubali Johannes De Jager, wa mu Komiti ya Nthambi ya ku Angola wangupharazga kuti mabuku nga mu Bayibolu nga Mateyu ndi Machitidu ngatuzgika mu Chineneru Chamanja cha ku Angola. Ŵanthu pafufupi 1,881 angusanirikapu pa pulogilamu yeniyi yo yinguchitikiya ku Malu Ngakuchitiyapu Unganu mu tawuni ya Luanda, ku Angola. Mabuku ngenanga ngati ngatuzgika ŵaka ngangwamba kusanirika pa jw.org ndipuso pa JW Library Sign Language kuti ŵanthu achiti dawunilodi.

Ku Angola kuja ŵanthu pafufupi 360,000, ambula kuvwa ndi kulongoro. Mpingu wakwamba wa Chineneru Chamanja cha ku Angola ungujalikiskika mu 2010. Pasonu panu ku Angola kwe apharazgi akujumpha 1,000, wo ateŵete mu mipingu 37 ya Chineneru Chamanja cha ku Angola, magulu 7 ndipuso kagulu kamoza.

Yaka nkhakwamba kuti mabuku nga mu Bayibolu ngafwatuliki mu Chineneru Chamanja cha ku Angola. Wati wawonere buku la Machitidu, mubali munyaki wangukamba kuti: “Lemba la Machitidu 8:26-30, lo likonkhoska kuti Filipu watchimbiyanga kuti wakumani ndi nduna ya ku Ifiyopiya likufwatulika umampha ukongwa. Lemba lenili lingundiwovya ukongwa kuti ndivwisi chifukwa cho ndikhumbika kuchita phamphu mu uteŵeti.”

Tikayika cha kuti mabuku nga mu Bayibolu ngenanga ngo nge mu Chineneru Chamanja cha ku Angola, ngawovyengi ŵanthu anandi kuziŵa kuti Yehova watiŵayanja po ‘watiŵaŵalisiya chisku chaki.’—Numeri 6:25.