Pa 3 December 2022, Mubali Samuel Campos, wa mu Komiti ya Nthambi ku Angola, wangutuzga mabuku nga mu Bayibolu nga Mateyu ndi Machitidu mu Chichokwe ndi Chiibinda. Mabuku ngenanga ngangutuzgika ngakuŵerenge pa foni pa pulogilamu yo anguchita kujambula, yo anguvwisiya ŵanthu pafufupi 2,000.

Mbiri ya Akaboni aku Yehova yilongo kuti kagulu kakwamba cha Chichokwe kangwamba mu 2007. Pasonu panu pe mipingu 10 ya Chichokwe ku Angola ndipu mipingu 23 ye ku Democratic Republic of the Congo.

Yumoza mwa ŵanthu wo afwatuliya mabuku mu Chichokwe wangukamba kuti: “Pe Mabayibolu ngakupambanapambana ngo ngasanirika mu Chichokwe. Mu Bayibolu limoza akugwiriskiya ntchitu mazu ngapusu, kweni viganizu vaki vivwika umampha cha. Linyaki likufwatulika umampha ukongwa, kweni le ndi mazu ngakusuzga kungavwisa. Ndati ndaŵerenga mabuku ngasonu yanga ndinguwona kuti Yehova walongoro nani mwachindunji.”

Mpingu wakwamba wa chineneru cha Chiibinda ungujalikiskika mu 2014. Pasonu panu kwe mipingu 13. Ŵechendatuzgi buku la Mateyu ndi Machitidu mu Chiibinda, kwengavi kachigaŵa kekosi ka Bayibolu mu chineneru chenichi, mwaviyo apharazgi agwiriskiyanga ntchitu Bayibolu la Charu Chifya la Chiphwitikizi. Yumoza wa ŵanthu wo afwatuliyanga mabuku ngenanga nga Chiibinda wangukamba kuti: “Mavesi nganyaki mu Bayibolu ndangaŵerengapu mwakuwerezawereza, kweni sonu ndipu nditingavwisa umampha ukongwa. Ndi mwaŵi ukulu kugwiraku ntchitu yeniyi. Yandiwovya kuja ndi chivwanu chakukho.”

Tigomezga kuti kutuzgika kwa mabuku ngenanga nga mu Bayibolu nga Chichokwe ndi Chiibinda kuwovyengi abali ndi azichi kuti andere kufupi ndi Yehova.—Yakobe 4:8.