Pa 6 April 2024, Mubali Jeffrey Winder wa mu Wupu Wakulongozga wangupatuliya ofesi ya nthambi ya sonu yo ye ku Buenos Aires ku Argentina. Pafufupi abali ndi azichi 500 wengapu pa mwambu wakupatuliya ndipu anguja mu vipinda vitatu va munyumba yasonu ya pa Beteli. Abali ndi azichi anyaki akukwana 5,844 anguvwisiya pulogilamu yeniyi kuziya pa vidiyokoniferensi ku Malu Ngakuchitiyapu Unganu kufupi ndi tawuni ya Ezeiza. Zuŵa lakulondopu, nkhani yapade yingukambika pa Malu Ngakuchitiyapu Unganu ndipu mipingu yosi ya ku Argentina ndi Uruguay yinguchita kuvwisiya ndipu chiŵerengeru chosi pamoza chingukwana 181,643.

Ndondomeku yingunozgeka kuti ŵanthu ŵazi kuziwona malu ku nthambi yasonu, kuzicheze limoza ndi anyawu kweniso kuti azisanirikepu pavakuchitika vinyaki vapade. Anandi mwaku yiwu ŵenga abali ndi azichi 230 akutuliya muvyaru 25. Mubali Sergio Spaccasassi, yo sonu wateŵete ku Ecuador nayu wanguwovyaku kugwira ntchitu yakuzenga Nthambi yasonu ku Argentina. Iyu wangukamba kuti gulu linandi la abali ndi azichi wo anguza kutuliya muvyaru vakupambapambana kuzipatuliya nthambi yasonu, vingulongo kuti: “Yehova wangugwiriskiya ntchitu nyengu yapade iyi kuti tije paubwezi wakukho nge banja limoza lo lisopa iyu.”

Mubali Juan Carlos Nigro, wa mu Komiti ya Nthambi ku Argentina wangukamba kuti: “Pa ntchitu yeyosi yo yachitikanga tinguwona mo Yehova walongozge kweniso kutumbika ntchitu iyi. Iyu ndiyu wangutiwovya pakuzenga ofesi ya nthambi yakutowa yo yitumbika zina laki.”

Tosi limoza ndi abali ndi azichi ŵidu ku Argentina, tiwonga Yehova chifukwa iyu ndiyu ‘wapanga chechosi chakutowa ndipuso pa nyengu yaki,’ nge mo yiliri Nthambi yasonu.—Wakutawula 3:11.