Kwambiya pa 20 May mpaka pa 11 June, 2023, mu matawuni ngakulungakulu nganayi nga ku Argentina anguchitiyaku maphara nga FIFA U-20 World Cup. Viwoneka kuti ŵanthu pafufupi 400,000 akutuliya ku Argentina kweniso vyaru vinyaki anguwonere masaza ngenanga ngo nganguchitika kwa masabata ngatatu. Timashelufu takupharazgiya tinguŵikika mumalu kweniso nyengu zakupambanapambana. Abali ndi azichi pafufupi 500 angugwiraku ntchitu yeniyi ndipu angugaŵiya mabuku ngakujumpha 500. Ŵanthu anandi wo anguŵapharazgiya anguŵalongo webusayiti ya jw.org kuti asaniyi kwamuka kwa mafumbu ngawu ngakukwaskana ndi Bayibolu.

Munthu munyaki yo waja muchigaŵa chenicho wangukambiya Akaboni wo apharazganga pashelufu kuti wangukondwa ukongwa kuvwisiya mabuku ngidu panyengu yo wachitanga ma ekisasayizi. Mubali munyaki wangumulongo webusayiti yidu ya jw.org ndipuso wangumukonkhoske mo wangapangiya dawunilodi mabuku ngidu ngakuvwisiya. Munthu yo wangukamba kuti wamuŵika mabuku ngidu pamundandanda wa vinthu vo watanja kuvwisiya.

Abali anguŵika mabuku nga muvineneru vakukwana 9 pa mashelufu ndipu venivi vinguwovya kuti ŵanthu anandi a muvyaru vakupambanapambana asaniyi mwaŵi wakutopu mabuku ngidu. Kusazgiyapu yapa, apharazgi anandi angusambira mo angatawuziya ŵanthu avineneru vakupambanapambana kuti akambiskanengi ndi ŵanthu wo aza kuzito mabuku pamashelufu. Mubali munyaki yo wangugwiraku ntchitu yakupharazga yeniyi, wangukamba kuti: “Kugwiraku ntchitu yakupharazgiya ŵanthu amitundu yakupambanapambana kungulongo kuti Yehova ngwalisungu kweniso walivi sankhu. Ndipu venivi vingundikondwesa ukongwa.”

Vakukondwesa ukongwa kuti wo achitiskanga masaza yanga anguzomereza Akaboni aku Yehova kuti aŵiki mashelufu mumalu ngakupambanapambana ngo ŵanthu anyaki azomerezekanga cha kuwunganamu. Pakukamba vakukwaskana ndi chifukwa cho anguzomereze Akaboni, yumoza mwa ŵanthu wo achitiskanga masaza wangukamba kuti: “Tiziŵa umampha kuti Akaboni aku Yehova aja mwachimangu ndipu achita cha vinthu vo vitambisa viwawa.” Ndipu alonda wo alondiyanga malu yanga angujiwone ŵija ukaboni wenuwu.

Vakuchiska ukongwa kuwona ateŵeti aku Yehova achichita vosi vo angafiska kuti afikiyi ŵanthu amitundu yosi kweniso kumija mbewu zauneneska pacharu chosi.—Wakutawula 11:6.