Mu chaka cha 2019, ku Australia kunguwotcha ukongwa kuphara vyaka vinyaki vosi ndipu kungubuka motu wakofya ukongwa. Kwambiya mu September 2019, motu ungulilima mu vigaŵa vinandi mu charu cha Australia. Chigaŵa cha Victoria ndipuso New South Wales vo ve kufupi ndi nyanja kweniso ve kumwera chakuvuma kwa charu ichi, ndivu vingukwaskika ukongwa ndi motu uwu.

Palivi mubali pamwenga mzichi yo wakupwetekeka pamwenga kufwa ndi motu uwu. Kweni nyumba zinandi zikunangika ndipu nyumba 9 zikufyiya limu. Pasonu panu, abali ndi azichi akujumpha 700 akusama mu nyumba zawu. Mabanja nganandi nga Akaboni aku Yehova ngo ngajanga muvigaŵa ivi, ngakusankha kusama chifukwa cha josi linandi lo latololokanga muvigaŵa ivi. Akaswiri anyaki akamba kuti mphepu yikunangika ukongwa chifukwa cha josi lenili ndipu ndakofya kwaku weyosi. Anandi mwa abali ndi azichi wo akusama muvigaŵa ivi aja ndi abali ŵawu, anyawu, pamwenga apharazgi a mumipingu yo ye kufupi ndi kwenuku ko kulivi motu.

Ofesi ya nthambi ku Australasia yingupanga makomiti ngaŵi ngakovya asani kwachitika masoka kuti ngakachiski abali ndi azichi mwauzimu kweniso kuchiŵapaska chovyu chakuliŵavu. Akuwonere madera ŵaŵi ndipuso abali a mu Komiti ya Nthambi achiskanga abali ndi azichi mu vigaŵa vosi vo vingukwaskika ndi motu. Chinanga kuti motu uwu ukuchitiska kuti abali ŵidu afipengi mtima kweniso kuti awonekengi akuvuka, kweni awonga mwakutuliya pasi pa mtima chanju cho abali ndi azichi alutirizga kuŵalongo.—1 Peturo 2:17.