Pa 24 September 2020, Khoti Lakuwona va Wanangwa wa Ŵanthu ku Europe likupereka vyeruzgu viŵi vakukhumbika ukongwa vakumiya Akaboni aku Yehova ku Azerbaijan. Cheruzgu chakwamba chakwaskanga mulandu waku Valiyev and Others v. Azerbaijan, ndipu chachiŵi chakwaskanga mulandu wa Religious Community of Jehovah’s Witnesses v. Azerbaijan. Vyeruzgu venivi vichiska wanangwa wo abali ŵidu ŵenawu wakuti achitengi maunganu mwakufwatuka.

Pa milandu yosi yeniyi, boma la ku Azerbaijan linguzomereza kuti linguphwanya wanangwa wa abali ŵidu. Boma ili linguzomera so kupereka ndalama kwa abali zakukwana madola 22,146 ngaku America. Vyeruzgu vo khoti la ECHR lingupereka vilongo kuti khoti lenili lingukoliyana ndi vo boma la Azerbaijan lingukamba kuti liphwanya wanangwa wa abali ŵidu.

Mulandu waku Valiyev and Others v. Azerbaijan, wo unguluta ku khoti la ECHR mu 2011, wakwaskanga abali ŵidu mutawuni ya Ganja. Kwa vyaka vinandi, arara a boma ku Ganja akananga kuti gulu lidu lije lakuzomerezeka ndi boma. Chifukwa cha venivi, apolisi atimbanyizanga maunganu ngidu ngo ngachitika mwachimangu, kumanga weyosi yo wasanilika pa maunganu ndipuso kulipilisa ndalama zinandi. Mubali munyaki amuyeruzganga mwakuwerezgawerezga kuti ngwakunanga ndipu ndalama zosi zo wangupereka zingukwana madola 11,375 ngaku America. Abali ndi azichi anyaki angumangika chifukwa ŵengavi ndalama zakuti apereki.

Mu 2013, abali anguluta ku khoti la ECHR ndi mulandu unyaki wa Religious Community of Jehovah’s Witnesses v. Azerbaijan, chifukwa chakuti charu cha Azerbaijan chingusisaku chiŵerengeru cha mabuku ngakuti ngasere mucharu.

Chinanga kuti boma lechendazomerezi kuti Akaboni aku Yehova akalembesi gulu lidu ku Ganja kweni vinthu vasinthaku. Mu vyaka va pambula kuswera yapa, abali ŵidu aja achiwungana mutimagulu timanatimana munyumba za abali kwambula kuŵatimbanyiza apolisi. Kusazgiyapu yapa, boma likuzomereza kuti abali ŵidu adanisengi mabuku ngakukwana chinanga kuti likhumba liwonengi dankha mabuku ngo ŵechendadanisi.

Mubali Kiril Stepanov, yo wagwira ntchitu mu Dipatimenti Yakuwona Vakupharazga Nkhani ku ofesi ya Akaboni aku Yehova ku Azerbaijan wangukamba kuti: “Tigomezga kuti cheruzgu cho khoti la ECHR lapereka, chiwovyengi gulu lidu kuti lilembesi ku boma mwaliŵi kuti lije lakuzomerezeka mutawuni ya Ganja kweniso mumatawuni nganyaki ku Azerbaijan. Tigomezga kuti munthazi boma lazamuleka kuwona dankha mabuku ngechendasere mucharu chidu.”

Titimuwonga ukongwa Yehova chifukwa chakutiwovya. Vyeruzgu vakutimiya venivi vilongo ukaboni wakuti ‘palivi chidya cho chapangikiya ŵanthu aku Chiuta cho chazamuchita kanthu.’—Yesaya 54:17.