Pa 26 April 2021, Komiti Yakuwona va Wanangwa wa Ŵanthu ya wupu wa United Nations yikuchita chinthu chakukhumbika ukongwa pa mulandu waku Aziz Aliyev and Others v. Azerbaijan. Yaka nkhachitatu kuti Komiti iyi yimiyi Akaboni aku Yehova ku Azerbaijan ndipuso kuvikiriya wanangwa wawu wakusopa mwachimangu.

Mulandu uwu ukwaskana ndi vo apolisi anguchita mwakuswa dangu, pakuchifufuza nyumba za Akaboni aku Yehova mu muzi wa Aliabad, wo we mu Chigaŵa cha Zagatala. Pa 21 September 2013, apolisi anguchisere munyumba ya Mubali Aziz Aliyev kuchifufuza. Pa nyengu iyi, munyumba yeniyi munguwungana Akaboni aku Yehova kuti achiti maunganu nga mpingu. Apolisi ŵenaŵa angufufuza nyumba yosi, anguwofyeza abali ndi azichi ŵidu, anguŵalonda mabuku ngawu, mapepala ngakuchipatala kweniso mapepala ngakukwaskana ndi marangu ndipuso ndalama. Ndipu weyosi angumutole ku polisi. Ŵe munthowa kuluta ku polisi, Mzichi Havva Azizova wangwamba nthenda ya vizilirisi ndipu wangufwa chipoyu. Apolisi ŵati awona venivi, anguluta dankha nayu kuchipatala. Wati wasisipuka, anguluta nayu mbwenu ku polisi kuti akamufumbi mafumbu.

Pati pajumpha nyengu, Khoti la mu Chigaŵa cha Zagatala, linguyeruzga kuti anandi mwa abali ndi azichi alipiri ndalama zakukwana 1,500  za ku Azerbaijani (pa nyengu yeniyo, zenga ndalama zakukwana madola 1,716 nga ku America). Khoti la Apilu la Sheki, lingukoliyana ndi cheruzgu chambula kulondo marangu cho khoti lakwamba lingupereka. Abali ndi azichi ŵidu ŵati aluza milandu yawu yosi ya apilu ku Azerbaijan, angupanga apilu ku Komiti Yakuwona va Wanangwa wa Ŵanthu ya wupu wa UN.

Komiti iyi yinguyeruzga kuti boma la Azerbaijan linguswa wanangwa wakusopa wa abali ndi azichi ŵidu ndipu lingunangisa kuŵamanga kweniso kuŵapaska chilangu. Komiti iyi yingukamba kuti apolisi kweniso ŵaraŵara a boma anguŵachitiya nkhaza Akaboni aku Yehova. Yiwu “anguŵawofyeza, kuŵapweteka ndipuso kususka chisopa chawu. Kweni akukonkhoska cha chifukwa cho akambiya kuti maunganu nga chisopa ichi kweniso mabuku ngawu vakofya ndipuso mo vingachitiskiya kuti ŵanthu anyaki apwetekeki.” Mwaviyo, Komiti iyi yingukambiya boma la Azerbaijan kuti liŵalipiri abali ndi azichi ŵidu ndipuso kuti “liwonesesi kuti lachita vosi vakwenere kweniso kujalikiska marangu ngakwenere ngo ngazamuwovya kuti va nge ivi vizileki so kuchitika kunthazi.”

Te akukondwa kuti abali ndi azichi ŵidu ku Azerbaijan azomerezeka kusopa kweniso kuwungana pamoza mwawanangwa. Tiwonga Chiuta widu, Yehova, kuti uneneska ujalikiskika mwadangu mu makhoti nga mazuŵa nganu.—Afilipi 1:7.