Ku Belgium, ŵanthu 49,040 angusanirika pa Mwambu Wakukumbukiya nyifwa yaku Khristu wa 2021. Mwambu uwu ngwapade ukongwa kwa Akaboni aku Yehova ndipu uchitika kamoza pachaka. Kutuwa waka mu 1995, ku Belgium kukusanirikapu ŵanthu anandi cha pa Chikumbusu kuphara mo venge chaka chinu. Ndipu chiŵerengeru ichi ntchikulu maulendu ngaŵi kuphara chiŵerengeru cha Akaboni wosi mucharu ichi.

Venivi vakukondwesa ukongwa chifukwa pasonu panu ku Belgium chiŵerengeru cha ŵanthu wo aleka kusopa chikwerekwere. Mwakuyeruzgiyapu mu 1970, ŵanthu akujumpha 90 peresenti ŵenga Akhristu ndipu wo alekanga kusopa ŵenga amanavi waka kujumpha 6 peresenti. Kweni pasonu panu, malipoti ngalongo kuti chiŵerengeru cha Akhristu ku Belgium chasika ndi 60 peresenti. Ndipu ŵanthu wo atijikamba kuti asopa cha mbanandi ukongwa kujumpha 40 peresenti.

Mu vyaka vapambula kuswera yapa, atolankhani ku Belgium aja achipharazga nkhani zaboza zakukwaskana ndi Akaboni aku Yehova. Chinanga kuti aja achipharazga nkhani zenizi, kweni ŵanthu anandi ku Belgium aja achifufuza uneneska wakukwaskana ndi Akaboni aku Yehova. Ŵanthu anandi akunweka awona kuti Akaboni aku Yehova atanjana ukongwa ndipuso kuti vinthu vitiŵayende umampha pa umoyu wawu chifukwa chakuti agwiriskiya fundu za mu Bayibolu.—Yohane 13:35.

Mu February 2021, ofesi ya nthambi ya Akaboni aku Yehova ku Belgium yingutumiza lipoti lakuti ŵanthu 11,804 asambira Bayibolu. Venivi vilongo kuti pasazgikiya ŵanthu akujumpha 1,000 kuyeruzgiya ndi chaka chamala cha uteŵeti. Chaka chechosi pa vyaka vinkhondi vo vajumpha, ŵanthu 450 pa avareji, akubatizika kuja Akaboni aku Yehova.

Lipoti lakukondwesa lenili lilongo kuti Akaboni aku Yehova pacharu chosi alutirizga kuwona kufiskika kwa uchimi wa mu Bayibolu wakuti: “Mumana ukongwa wazamuja ŵanthu 1,000 ndipu mumana wazamuja mtundu wanthazi.”—Yesaya 60:22.