JULY 1, 2021
BOLIVIA
Bayibolu la Charu Chifya Likutuzgika mu Chineneru cha Chiayimara
Pa 27 June 2021, Bayibolu la Charu Chifya la Malemba Ngakupaturika lakuŵerenge pa vipangizu va mazuŵa nganu likutuzgika mu chineneru cha Chiayimara. Pulogilamu yakutuzga Bayibolu lenili yinguchita kujambulika ndipu yinguwoneseka ku mipingu ndipuso magulu ngosi ku Bolivia. Mubali Nelvo Cavalieri, wa mu Komiti ya Nthambi ku Bolivia ndiyu wangutuzga Bayibolu lenili.
Fundu Zakukhumbika Zakukwaskana ndi Ntchitu Yakufwatuliya Bayibolu Lenili
Chiayimara chikambika ndi ŵanthu akujumpha 1.6 miliyoni, ukongwa muchigaŵa cha ku Nyanja ya Titicaca, yo ye ku Mapiri nga Andes
Pa vineneru 36 vo vikambika ku Bolivia, Chiayimara ntchineneru chachiŵi pa vineneru vo ŵanthu anandi alongoro
Apharazgi pafufupi 2,000 ateŵete mu mipingu yakujumpha 60 yo yilongoro Chiayimara ku Argentina, Bolivia, Brazil, Chile, ndi Peru
Akufwatuliya 6 ndiwu angugwira ntchitu yakufwatuliya Bayibolu lenili kwa vyaka vinayi
Wakufwatuliya munyaki wangukamba kuti: “Bayibolu lenili ndi mphasu yikulu ukongwa yakutuliya kwaku Yehova, ku ŵanthu wo alongoro Chiayimara. Pasonu panu, yiwu angaŵerenga Bayibolu mu chineneru cho atichigwiriskiya ntchitu ndipuso cho atichivwisa umampha. Ndipu po aŵerenga Bayibolu ili, ajivwengi kuti Yehova walongoro nawu.”
Mubali Mauricio Handal, wa mu Komiti ya Nthambi ku Bolivia wangukamba kuti: “Kutuwa po Bayibolu la Malemba nga Chigiriki Ngachikhristu lingutuzgikiya mu chineneru cha Chiayimara mu 2017, ŵanthu anandi angukamba kuti atiliwonga ukongwa Bayibolu lenili chifukwa litiŵafika pamtima. Sonu te ndi Bayibolu losi lamphumphu, lo livwika umampha kweniso lambula kusuzga. Tigomezga kuti Bayibolu ili liwovyengi kuti ŵanthu anandi avwisengi umampha uthenga wa mu Bayibolu, ndipu chakukhumbika ukongwa ntchakuti liŵawovyengi kuja paubwezi wakukho ndi yo Wakulilemba, Yehova.”
Tigomezga kuti Bayibolu lenili liwovyengi abali ndi azichi wo alongoro chineneru cha Chiayimara kujivwa nge mo wa masalimo wangukambiya kuti: “Ndikhumbisiska utaski winu, pakuti mazu nginu ntchilindizga changu.”—Salimo 119:81.