SEPTEMBER 19, 2023
BOLIVIA
Nkhani Yakukwaskana ndi Matenda Ngakusuzgika Maŵanaŵanu Yinguto Nambala 1 pa Chiwoneseru cha Mabuku cha Pacharu Chosi cho Chinguchitikiya ku Bolivia
Kwambiya pa 31 May mpaka pa 11 June 2023, ku Santa Cruz de la Sierra, ku Bolivia, kunguchitika chiwoneseru cha mabuku cha pacharu chosi. Ku chiwoneseru chenichi, kunguza alendu akujumpha 120,000. Pa mathebulu kweniso mashelufu ngo abali ŵidu anguŵika pa nyengu yeniyi, anguŵikapu Chigongwi cha Na. 1 2023, cha mutu wakuti “Bayibolu Lingakuwovyani Asani Mwe ndi Matenda Ngakusuzgika Maŵanaŵanu.”
Chigongwi cha Mlinda cha Na. 1 2023, cha mutu wakuti “Bayibolu Lingakuwovyani Asani Mwe ndi Matenda Ngakusuzgika Maŵanaŵanu” mu chineneru cha Chisipanishi
Abali ndi azichi pafufupi 200 ndiwu aphweriyanga mabuku ngo nganguŵikika mumalu ngenanga panyengu iyi ndipu angucheza ndi alendu akujumpha 20,000. Mu malu ngo munguŵikika mathebulu kweniso mashelufu, munguŵikika so masikilini ngo pawonesekanga mavidiyo nga pa webusayiti yidu ndipu alendu angusambira mo angafufuziya nkhani zakupambanapambana pa jw.org. Pa chiwoneseru chenichi, abali angugaŵiya mabuku pafufupi 5,500 ndipuso kuwonesa mavidiyo pafufupi 600. Kusazgiyapu yapa, ŵanthu akukwana 45 wo anguza po panguŵikika mabuku ngidu angupempha sambiru la Bayibolu mwakugwiriskiya ntchitu fomu yo ye pa jw.org.
Munthukazi munyaki wati waŵerenga mutu wakuti asani mwe ndi matenda ngakusuzgika maŵanaŵanu, wangufika po panguŵikika mabuku ngidu ndipu wangukambiya mzichi kuti anyina asuzgika ndi matenda ngakusuzgika maŵanaŵanu. Iyu wangukamba so kuti nayu wasuzgika ndi matenda ngenanga. Mzichi wanguwovya munthukazi uyu kupanga dawunilodi Chigongwi cha Mlinda cho chenga ndi nkhani yakukwaskana ndi matenda ngakusuzgika maŵanaŵanu kweniso kabuku ka Kondwani ndi Umoyu Kwamuyaya! pa foni yaki. Kusazgiyapu yapa, munthukazi mwenuyu wangusayina fomu ya pajw.org yakupempha munthu kuti wasambirengi nayu Bayibolu
Abali ndi azichi akupambanapambana ŵama pamalu po pe mashelufu kweniso mathebulu nga mabuku pa Chiwoneseru cha Mabuku cha Pacharu Chosi
Dokotala munyaki yo wangulondiyaku Chigongwi cha Mlinda wangukamba kuti: “Ndikhumba kuti ŵanthu wo atuza kuchipatala changu nawu nkhaŵapaseku magazini ngenanga, chifukwa vo vikonkhoskeka mkati umu kweniso mavesi ngo ngalimu ngakuŵawovya ukongwa.” Munthukazi munyaki yo anyina atayika pambula kuswera, wanguchiskika wati wawona nkhani yinyaki ya mutu wakuti “Asani Mpapi Watayika” pachigaŵa chakuti “Chimangu Ndipuso Likondwa” pa jw.org
Chifukwa chakuti pe ŵanthu anandi wo atama matenda ngakusuzgika maŵanaŵanu, abali ndi azichi ŵidu ku Bolivia angukondwa ukongwa kuwovya ŵanthu kuziŵa uthenga wakupembuzga wo Yehova wapereka kutuliya mu mazu ngaki, Bayibolu.—Salimo 34:18
Mungayanja Kuŵerenga so Nkhani Izi
CHIGONGWI CHA MLINDA
Bayibolu Lingakuwovyani Asani Mwe ndi Matenda Ngakusuzgika Maŵanaŵanu
Kumbi yimwi pamwenga munthu munyaki yo mutimuyanja watama matenda ngakusuzgika maŵanaŵanu? Mu magazini iyi ya Chigongwi cha Mlinda wonani mo Bayibolu lingakuwovyiyani.