Komiti ya nthambi ya ku Brazil yikujalikiska Makomiti 18 Ngakovya pa Masoka (DRCs), kuti ngawovyi apharazgi wo asuzgika kusaniya ndalama chifukwa cha mulili wa coronavirus. Makomiti ngenanga ngatovya mipingu yakukwana 12,000 mucharu chosi chenichi, kusazgapu abali ndi azichi ŵidu wo aja kuchigaŵa chakutali ukongwa ku Msinji wa Amazon. Kufika sonu, mabanja 131 ku Amazon ngalonde chovyu.

Abali a mukomiti ya DRC ku Manaus, tawuni yikulu ya ku Amazonas, angupakira vinthu vakukhumbikiya vo vingakwana banja lelosi kwa mwezi umoza. Vinthu venivi vasazgangapu chakurya nge, ntchunga, ufwa wavigawu, mpunga kweniso mkaka. Angupakiramu so sopu, matishu, miswaju kweniso kogeti. Abali anguluta ndi katundu mwenuyu pa sitima ndipu angufikiya ku dowoku la Manacapuru, kufupi ndi ku Amazon. Pavuli paki, anguchipereka katundu mwenuyu ku vigaŵa vakutali pa boti. Vigaŵa ivi visazgapu Membeca ndi Lago do Castanho.

Mzichi Marinelma yo waja mu chigaŵa cha Lago do Castanho, wati walonde chakurya wangukamba kuti: “Chakwamba, ndinguwonga Yehova chifukwa chakuti watitiphwere. Takhumbikiyanga nadi chovyu chifukwa tengavi ndalama zakuguliya chakurya. Kweniso nditiŵawonga ukongwa abali chifukwa cha chanju kweniso mtima wawu wakupaska. Mwana wangu munthulumi wa vyaka 6 wangundiwona ndichituzga vinthu vo tingulonde ndipu ndingusaniliyapu mwaŵi wakumukonkhoske kuti Yehova wagwiriskiya ntchitu abali kuti watiwovyi. Pavuli paki, iyu wangukamba kuti: Kumbi ‘Ama, tingapemphera cha kwaku Yehova kuti timuwongi?’”

Mubali Jonas Monteiro, yo waja mutawuni ya Caapiranga limoza ndi banja laki, wanguŵalembe kalata abali a mukomiti ya DRC. Mukalata yeniyi wangukambamu kuti: “Titikuwongani ukongwa chifukwa cha chovyu cho mwatipaska. Vo mwachita vatilongo kuti Yehova watitiyanja. Kukamba uneneska, ndi mwaŵi ukulu ukongwa kuja mubanja lenili la pacharu chosi.”

Abali a mukomiti ya DRC, nawu ayanduwa chifukwa chakugwiraku ntchitu yeniyi. Mura munyaki zina laki Isaac Emannuel Ramalho de Oliveira, yo wateŵete mukomiti yeniyi, wangukamba kuti: “Zuŵa lelosi asani ndigwira ntchitu limoza ndi abali a Mukomiti Yakovya pa Masoka, chivwanu changu chija chakukho. Ndikayika cha kuti ntchitu yeniyi yindiwovyengi ukongwa kuluska mo ini ndingawovye abali.”

Chivwanu chidu chikho ukongwa kuwona mo Yehova watovye ateŵeti ŵaki pa nyengu ya mulili yeniyi, mwambula kutoliyaku kanthu kuti aja pani.—Salimo 94:14.