Kutuwa pa 1 March mpaka pa 30 June, 2024, Akaboni aku Yehova akujumpha 1,000 angugwiraku ntchitu yakupharazga pa upharazgi wapade ku Brazil. Upharazgi uwu ungunozgeka kuti ukoliyani ndi kutuzgika kwa kabuku kasonu kamutu wakuti Kondwani ndi Umoyu kwa Muyaya! mu vineneru 11 vo ŵanthu akwenuku aŵereŵeta. Venivi vinguchitiska kuti ŵanthu pafufupi 300 apemphi kusambira Bayibolu.

Panyengu yo akambiskananga ndi munthukazi munyaki yo walongoro Chixavante ku Campinápolis, munthukazi yo wangufumba apharazgi wo kuti: “Kumbi ndimwi mujambula mavidiyo mu chineneru changu? Ndakupenjaningi kwa nyengu yitali. Sonu ndachita mwaŵi ndakusaniyani!” Iyu wangukonkhoska kuti wangusambirapu Bayibolu ndi Akaboni Aku Yehova kweni wakuleka chifukwa wavwisanga cha Chiportuguese. Wati waziŵa kuti sonu mabuku ngidu ngakukonkhoska Bayibolu ngasanirika mu Chixavante, wangwamba kupenja Akaboni. Iyu wangwamba so kusambira Bayibolu.

Ku chigaŵa cha Santa Maria de Jetibá, mzichi wangukambiskana maulendu ngatatu ndi munthukazi munyaki yo waŵereŵeta Chipomeraniya. Pa ulendu wachitatu po akambiskananga, munthukazi yo wangukamba kuti wangupemphera kwaku Chiuta zuŵa limoza kuvuli ŵechendakumani pa ulendu wakwamba, iyu wangupempha Chiuta kuti wamuwovyi kuziŵa mo wangamusope munthowa yakwenere. Mwakukondwa, wanguzomera kusambira Bayibolu.

Mu chigaŵa chinyaki chimana kumwera kwa Brazil, abali ŵidu angukumana ndi munthukazi munyaki yo waŵereŵeta Chikaingang yo wenga wechendakumanepu ndi Akaboni aku Yehova. Abali ŵenaŵa angumuŵerenge Masalimo 83:18 ndi kumukonkhoske kuti zina laku Chiuta ndi Yehova. Iyu wanguwoneke limu kuti wakwaskika ndipu wangukamba kuti palivi yo wakumusambizapu kuti Chiuta we ndi zina laki ndi laki. Mwaviyo, nyengu yeniyo wanguzomera kusambira Bayibolu.

Tosi tikondwe limoza ndi abali ndi azichi ku Brazil, chifukwa chakuti ŵanthu anandi asambira vinandi vakukwaskana ndi “uthenga wamampha wamuyaya” wo usanirika mu Mazu ngaku Chiuta kuti nawu akankhuskengi Yehova.—Chivumbuzi 14:6, 7.