Pa 10 November 2020 Khoti Lakuwona va Wanangwa wa Ŵanthu ku Europe likuyeruzga kuti boma la Bulgaria likuswa wanangwa wa kusopa wa abali ŵidu. Venivi ving’anamuwa kuti arara a boma akhumbika kuzomereza kuti ntchitu yakuzenga Nyumba ya Ufumu yilutiriyi mutawuni ya Varna ku Bulgaria. Abali atondekanga kumaliza ntchitu iyi chifukwa akususka aja achitimbanyizga ntchitu yeniyi kwa vyaka vakujumpha 10. Kusazgiyapu yapa, khoti la Khoti Lakuwona va Wanangwa wa Ŵanthu ku Europe lingukamba kuti boma la Bulgaria lilipiri abali ndalama zachipepesu zakukwana madola 11,500 nga ku America.

Mulandu wenuwu wakwaskanga kuzenga Nyumba ya Ufumu pamalu po abali angugula mu January 2006. Arara aboma ku Varna anguzomereza ntchitu yakuzenga mu May 2007, ndipu abali ŵidu angwamba kuzenga nyengu yeniyo. Kweni mu July chaka chenichi, meya wangukamba kuti abali azenga Nyumba ya Ufumu mwambula kwenere ndipu wangukaniza ntchitu yeniyi. Mu mwezi weniwo pe, ŵanthu a chipani chinyaki cha ndali ku Bulgaria anguŵika vikwangwani pamalu po tazenganga ndipu anguchitiska viwoneseru vakukaniza ntchitu yidu yakuzenga.

Mwakukoliyana ndi cheruzgu cho Khoti Lakuwona va Wanangwa wa Ŵanthu ku Europe lingupereka, arara a boma a ku Varna angupharazga pakweru vakukwaskana ndi kunyoza Akaboni aku Yehova ndipu “anguchiska ŵanthu kuti achiti viwoneseru.” Meya wangukambiya so atolankhani kuti wakoliyana so ndi viwoneseru venivi.

Chinanga kuti meya kweniso arara a boma anyaki angulongole limu kuti ŵe ndi sankhu pakukaniza ntchitu yakuzenga ya Akaboni aku Yehova, yiwu angukamba kuti akaniza ntchitu iyi chifukwa chakuti akandirizga chisopa cha kweni chifukwa chakuleka kukoliyana pankhani yakukwaskana ndi marangu ngakugaŵa malu.

Abali ŵidu anguchita maapilu nganandi ku makhoti nga ku Bulgaria kusazgapu khoti Likulu Ukongwa kweni anguŵazomereza cha kuti amalizi ntchitu ya kuzenga. Pa nyengu iyi, mipingu yachitanga lendi nyumba kuti apangengi maunganu.

Khoti Lakuwona va Wanangwa wa Ŵanthu ku Europe lingumaliza ndi mazu ngakuti, arara aboma achita vinthu mwambula urunji. Khoti lenili lati lavota, wakweruzga yumoza wangukana kweni akweruzga 6 anguzomereza kuti vo arara a boma ku Varna anguchita pakukaniza kuzenga Nyumba ya Ufumu, nkhuswa “wanangwa wakukamba maŵanaŵanu, wakuvwiya njuŵi ndipuso wakusopa” ndipu venivi visuskana ndi dangu la nambala 9 ndi 11 mu Phanganu Lakukwaskana ndi Wanangwa wa Ŵanthu ku Europe.

Abali ŵidu agomezga kuti sonu arara a boma avwiyengi cheruzgu cho Khoti Lakuwona va Wanangwa wa Ŵanthu ku Europe likupereka ndipu azomerezengi kuti amalizi kuzenga malu ngakusopiyamu ngo ngawovyengi ŵanthu kweniso kukankhuska zina laku Yehova mutawuni ya Varna. Titimuwonga ukongwa Yehova chifukwa cha chovyu chaki.—Salimo 54:4.