APRIL 6, 2020
CANADA
Chimangu Pa Nyengu Yakusuzga
Mubali Jean-Yves ndi muwolu waki Vasthie Mudaheranwa, atovya ŵanthu wo atama matenda nga koronavayilasi ku Montreal, mucharu cha Canada. Mubali Mudaheranwa ndi dokotala pachipatala chinyaki ndipu Mzichi Mudaheranwa ndi nesi pachipatala cho aŵikaku ŵanthu wo atama COVID-19. Pa nyengu yinu yo ŵanthu anandi asuzgika maŵanaŵanu chifukwa cha matenda ngenanga, yiwu athemba Yehova kuti waŵapasi nthazi kweniso ayanduwa ndi layizgu laku Yehova lakuti wazamupereka ‘likondwa la mumtima.’—Yesaya 65:14.
Mubali Mudaheranwa wangukamba kuti: “Anyangu anandi atopa ukongwa, ndipu ndechendaŵawonepu achichita mantha viyo.” Mzichi Mudaheranwa wanguti: “Kusambira Bayibolu ndiku kutitiwovya ukongwa. Tiŵanaŵaniya vinthu vo Bayibolu likukambiya limu kuti vazamuchitika mu mazuŵa ngakumaliya, ndipu titijikumbusa kuti Yehova wenasi kweniso watijowongi cha. Kupemphera kwaku Yehova naku so kutitiwovya ukongwa. Ndechendasoki kuluta kuntchitu kweniso ndechendayambi kugwira ntchitu, ndipemphera dankha ndipu ndija ndi chimangu cha m’mtima.”
Mubali ndi Mzichi Mudaheranwa avwisiya maunganu nga mpingu
Mubali Mudaheranwa wangukonkhoska so kuti: “Ini ndikutuliya ku Rwanda, ndipu ndengapu pa nyengu yo Ahutu ndi Atusi abayananga. Kunu ku Canada, techendawonepu va nge ivi vichichitika, ndipu nyengu zinyaki tingaluwa kuti tija mu mazuŵa ngakumaliya. Ndikambi uneneska, ini nani nyengu zinyaki ndaluwangaku kuti zuŵa laku Yehova lepafupi. Mulili uwu wachitiska kuti ndileki kukayika kuti tija mu mazuŵa ngakumaliya, kweniso wandiwovya kuti ndiligomezgengi ukongwa Bayibolu ndi mauchimi ngaki.”
Ŵanthu aku Yehova pacharu chosi nawu awona vinthu nge mo Mubali ndi Mzichi Mudaheranwa awone, ndipu alutirizga kuja ndi chimangu pa nyengu yakusuzga yinu.—Yesaya 48:18.