Mpingu wa Iqaluit wa Akaboni aku Yehova ku Iqaluit, Nunavut, Canada sonu we ndi Nyumba ya Ufumu yawu yakwamba. Abali wo angujipereka akumaliza kuzenga Nyumba ya Ufumu yakukwana mipandu 50 pa 14 October 2022. Nyumba ya Ufumu yasonu yeniyi ye kumpotu chayiku kwa charu cha Canada. Mpingu wa Iqaluit ukujalikiskika mu 2010 ndipu maunganu achitiyanga mu nyumba yakuchitiyamu masaza ngakulimbisa liŵavu pa sukulu yinyaki.

Ntchitu yakuzenga yeniyi yenga yakusuzga ukongwa ndipu yingutimbanyizgika kwa vyaka viŵi chifukwa cha mulili. Mazu ngakuti Iqaluit ngo ngang’anamuwa kuti “malu nga somba zinandi,” ngasanirika kuchigaŵa cha Frobisher Bay, pa Chilumba cha Baffin. Kuti munthu wafiki kwenuku wakhumbika kwenda pa ndegi pamwenga pa boti. Ndipuso vipangizu vakuzenge visanirikaku cha. Venivi ving’anamuwa kuti abali akhumbikanga kutumiza vinthu pa boti kuti vikafiki ko azenganga. Kusazgiyapu yapa, chifukwa cha nyengu ya kwenuku, Nyumba Ufumu yeniyi yakhumbikanga kuzengeka kwambiya mwezi wa August kufika October mbwenu.

Vipangizu vakuzenge vakukwana matani 127 vinguŵikika pa Malu Ngakuchitiyapu Unganu ku Ontario kulindizga kuti vitumiziki. Katundu mwenuyu angumupakira mu vimakontena 12 ndi mu vimabokosi vitatu vikuluvikulu ndipu pavuli paki angumutumiza. Katundu uyu wangufikiya pa dowoku linyaki pafupi ndi tawuni ya Montreal, ku Quebec. Kutuwa pa dowoku lenili, katundu uyu wangwenda pa sitima mu St. Lawrence Seaway, kujumpha nyanja yikulu ya Atlantic Ocean. Pakumaliya ndipu wafikanga ku Frobisher Bay. Chifukwa chakuti muchigaŵa ichi mulivi dowoku lakufikiyapu masitima ngakulungakulu, vimakontena ivi anguviŵika mu maboti ngakupinga katundu. Pavuli paki maboti nganyaki ngaguzanga maboti ngo ngapinganga katundu mwenuyu kufika nangu kufupi ndi kumtunda. Pakumaliya, asani afika kufupi ndi kumtunda ko kulivi mayiŵa nganandi, ŵanthu asisanga katundu mwenuyu ndipu alutanga nayu kumtunda.

Nyumba ya Ufumu iyi yikuzengeka munthowa yakuti yije ndi vinthu vo vitovya kuti yifundengi asani kwazizira ukongwa, kweniso kuti yizizirengi asani kwafunda ukongwa, chifukwa ku Iqaluit kanandi mu chipwepwi kuzizira ukongwa kufika pa -30 digirizi (-30ºC).

Ŵanthu pafufupi 40 wo angujipereka kugwiraku ntchitu yeniyi angutuliya muvigaŵa 6 vakupambanapambana. Mubali Jason McGregor, yumoza mwa ŵanthu akujipereka ŵenaŵa wangukamba kuti: “Chinanga kuti penga masuzgu nganandi kuti vipangizu vakuzenge vifiki kunu, kweniso takumananga ndi masuzgu nganyaki ngo ngazanga mwamabuchibuchi, kweni palivi cho chingamutondekesa Yehova kuchita vo wakhumba. Chivwanu chidu chakhonga ukongwa asani tiwona kuti ntchitu iyi yiluta panthazi zuŵa lelosi.”

Tikondwe limoza ndi abali ndi azichi a ku Canada chifukwa cha Nyumba ya Ufumu yawu yasonu yo ye ku “malu nga somba zinandi,” po alutirizga kugwira ntchitu yakukhumbika ukongwa yakuja “alovi a ŵanthu.”—Mateyu 4:19.