Pa 18 August , 2023, Mubali Giacomo Maffei wa Mukomiti ya Nthambi ya ku Colombia, wangutuzga Bayibolu la Charu Chifya la Malemba Ngachigiriki Ngachikhristu muchineneru cha Wayuunaiki, pa Unganu Wachigaŵa mutu wakuti “Zikirani”! wo unguchitikiya mutawuni ya Maicao, La Guajira ku Colombia. Pa unganu wenuwu penga ŵanthu akukwana 265. Ŵanthu ŵenga ndi mwaŵi wakupanga dawunilodi Bayibolu lenili pa vipangizu vawu va mazuŵa ngangu. Bayibolu lakuchita kusindikiza liyambengi kutumizika ku mipingu kukwambiriya kwa chaka cha 2024.

Chineneru cha Wayuunaiki chikambika ndi ŵanthu akujumpha 700,000 ndipu yiwu aziŵika kuti a Wayuu. Ŵanthu ŵenaŵa asanirika muchigaŵa cha La Guajira ku Colombia kweniso ku Venezuela kunkhondi kwa chigaŵa cha Zulia. Akaboni aku Yehova angwamba kufwatuliya mabuku muchineneru cha Wayuunaiki mu 1998. Ofesi yakufwatuliyaku mabuku ye mutawuni ya Riohacha muchigaŵa cha La Guajira. Apharazgi pafufupi 445 ateŵeti mumipingu 17 ya chineneru cha Wayuunaiki kweniso mu timagulu tinayi ku Colombia ndi Venezuela.

Mubali munyaki wachiwonga chifukwa cha kutuzgika kwa Bayibolu la Charu Chifya la Malemba Ngachigiriki Ngachikhristu muchineneru cha Wayuunaiki, wangukamba kuti: “Kulonde Bayibolu lakufwatulika mwakulondo muchineneru cha Wayuunaiki, ndi mphasu yakuzirwa ukongwa yakutuliya kwa Awusefwi akuchanya!” Mubali munyaki wangukamba so kuti: “Ndigomezga kuti Bayibolu lenili liwovyengi ŵanthu kuja pa ubwezi wakukho ndi Yehova.”

Tisimikiza kuti abali ndi azichi wo alongoro chineneru cha Wayuunaiki akondwengi ukongwa ndi Bayibolu lenili kweniso liwovyengi ŵanthu anandi kuti aziŵi Chiuta.—Mateyu 5:3.