Kwambiya waka kukumaliya kwa mwezi wa April 2021, ku Colombia kwaja kuchichitika viwawa. Palivi Kaboni waku Yehova weyosi yo wakubayika pamwenga kupwetekeka. Chinanga kuti veviyo, muvigaŵa vinyaki vakusuzga kuti abali aguli chakurya pamwenga mafuta. Abali ndi azichi ŵidu akunthiyapu masuzgu ngo ngaza chifukwa chakusoŵa chakurya, kusoŵa mafuta kweniso chifukwa cha mulili wa COVID-19.

Kuti awovyi abali ndi azichi panyengu yinu ya masuzgu, Komiti ya Nthambi ku Colombia yikusankha Makomiti Ngakovya pa Masoka (DRCs) ngakukwana ngankhondi. Makomiti ngenanga ngapereka chovyu chakwenere ndipu po achita venivi alondo ulongozgi wa mo angajivikiliya ku COVID-19. Abali ndi azichi atovyana, ukongwa pankhani yakupaskana chakurya. Ŵara kweniso akuwonere madera nawu achiska apharazgi mwakugwiriskiya ntchitu fundu za mu Bayibolu.

Mubali Almond Winklaar, yo watovya yimoza mwa Makomiti Ngakovya pa Masoka (DRCs), wangukamba kuti: “Tikumana ndi masuzgu ngakulu ukongwa. Nditimuwonga ukongwa Yehova pakovya ateŵeti ŵaki mwaliŵi panyengu yinu ya masuzgu.”

Mu mpingu wa La Loma Arena, apharazgi 18 ndipuso mabanja ngawu angulonde chakurya. Banja linyaki lo lichita upayiniya mu mpingu wenuwu lingukamba kuti: “Tingukondwa ukongwa tati talonde vinthu vo takhumbikiyanga kutuliya ku Komiti Yakovya pa Masoka. Tinguwona kuti kwenuku kwenga kumukika kwa mapempheru ngidu. Titiŵawonga ukongwa abali ndi azichi ŵidu wo angutipaska vinthu vo takhumbikiyanga ndipu titimuwonga ukongwa Yehova pakutipaska nthazi kweniso kutiwovya kuti tikunthiyepu.”

Ŵanthu wo agwira ntchitu mu shopu yinyaki yo abali a mu Makomiti Ngakovya pa Masoka agulamu vinthu vinandi, anguwonga ukongwa ntchitu yakupereka chovyu yo abali yaŵa agwira. Wakugwira ntchitu munyaki wangukamba kuti: “Ndiziŵa kuti Akaboni aku Yehova atuza kunyumba zidu kuti azitipharazgiyi uthenga wakutuliya mu Mazu ngaku Chiuta, kweni ndazizwa ukongwa kuwona kuti agwira so ntchitu yamampha ukongwa yakovya ŵanthu wo akhumbika chovyu.”

Chinanga kuti akumana ndi masuzgu, abali ndi azichi ŵidu nyengu zosi alutirizga kuteŵete Yehova. Tiziŵa kuti Yehova walutirizgengi kuŵapaska vinthu vakuliŵavu kweniso kuŵapembuzga abali ndi azichi ŵidu mwauzimu po alutirizga kuja ‘acharu cha.’—Yohane 17:16.