Kutuliya pa 10 mpaka pa 26 May 2024, ku Czech Republic kunguchitika chiwoneseru cha International Ice Hockey Federation. Ŵanthu pafufupi 800,000 anguza kuchakuchitika cho chinguchitikiya mumatawuni ngaŵi ku Ostrava ndi ku Prague. Akaboni aku Yehova anguŵika timashelufu kubwalu kwa sitediyamu panyengu yo kwenga vakuchitika. Wonani vinthu vinyaki vakuchiska vo vinguchitika.

Anthulumi ŵaŵi achinyamata angufika po penga kashelufu ndipu mwalisungu yiwu angufumba abali kuti ŵenga ayani kweniso achitanganji. Abali yaŵa anguŵakonkhoske ntchitu ya Akaboni aku Yehova kweniso mo tichitiya sambiru la Bayibolu. Yumoza wa anthulumi ŵenaŵa wangufumba zuŵa kweniso malu ngo sambiru la Bayibolu lenili lichitikiya. Abali angumukonkhoske kuti sambiru lichitika nyengu ndi malu ngo iyu wangayanja. Iyu wanguzomera kusambira Bayibolu.

Zuŵa linyaki, anthulumi atatu angukambiskana ndi abali ŵidu, yiwu anguzizwa kuziŵa kuti Akaboni aku Yehova alipirika ndalama yeyosi cha chifukwa cha ntchitu yakupharazga. Munthulumi munyaki wangufumba kuti: “Asani mulonde ndalama yeyosi cha, nanga muyanduwanji ndi ntchitu yeniyi?” Akaboni yaŵa angukonkhoska mo kusambira Bayibolu kukusinthiya umoyu wawu kweniso mo kukuŵawovye kuti aje ndichilindiza cha vinthu vo vichitikengi kunthazi. Chifukwa chakukondwa vo anguŵakonkhoske, yumoza mwa anthulumi ŵenaŵa wangukamba kuti wakhumba kuziŵa vinandi ndipu wangupempha kabuku ka Kondwani ndi Umoyu Kwamuyaya!

Munthulumi munyaki wangujumphapu maulendu nganandi pa timashelufu tidu. Zuŵa linyaki, wanguma ndipu wangufumba Akaboni kuti: “Kumbi vo mugomezga ndi vo tchalitchi langu lisambiza vipambana wuli?” Abali ŵidu angugwiriskiya ntchitu Bayibolu pakumukonkhoske mwakudumuwa vo Akaboni aku Yehova agomezga. Munthulumi uyu wanguvwisiya umampha ukongwa ndipu wangukondwa ndi mo angumukonkhoske. Akaboni angumulongo vinthu vinyaki vo visanirika pa jw.org kweniso mo wangagwiriskiya ntchitu webusayiti yeniyi kuti waziŵi vinandi vakukwaskana ndi Bayibolu kweniso vo lisambiza.

Titiŵawonga ukongwa abali ndi azichi ŵidu ku Czech Republic chifukwa cha phamphu pakupharazga “uthenga wamampha wa vinthu vamampha” ku ŵanthu wosi wo avwisiya.—Aroma 10:15.