Abali ndi azichi ŵidu muvigaŵa vinyaki va Democratic Republic of the Congo ndi Republic of the Congo asuzgika chifukwa cha mliri wa korona, kutola kwa maji ndipuso nkhondu. Ofesi ya nthambi ku Congo (Kinshasa) yo yiwonere ntchitu ya kupharazga muvigaŵa viŵi venivi, yikunozga ndondomeku kuti yiwovyi abali mwakuliŵavu kweniso mwauzimu. Ofesi ya nthambi yapanga makomiti 57 ngakovya ŵanthu ko kwachitika Masoka Ngachilengedu kuti awovyi abali ŵidu. Kufika pasonu panu abali ndi azichi akujumpha 90,000 awovyeka ndi komiti yeniyi.

Pa April 16 ndi 17, 2020 mu chigaŵa cha kuvuma kwa Democratic Republic of the Congo kunguwa chivuwa chikulu cho chinguchitiska kuti maji ngatoli ndi kusapaliya mumalu nganandi ndipu apharazgi akukwana 139 angusoŵa pakuja. Yiwu aja munyumba za abali ndi azichi. Komiti yakovya ko kwachitika masoka ngachilengedu yigwira ntchitu yakuzenga nyumba za ŵanthu wo asoŵa pakuja.

Abali ndi azichi nawu atijipereka kovya komiti yeniyi. Muchigaŵa chinyaki abali angupereka matochi ngakukwana 700 kilogiramu (1,543 lb), vingoma vakukwana 400 kilogiramu (882 lb), vigawu vakukwana 220 kilogiramu (485 lb) ndipuso mayani.

Kusazgiyapu yapa, apharazgi 60 a mumpingu wa Some 26 Km angujipereka kulondere abali 50 wo anguthawa nkhondu. Abali wo anguthaŵa nkhondu alondiyanga chakurya chechosi cho abali aperekanga mpaka po boma la DRC lingwambiya kupereka chovyu.

Mutu wa banja ku Brazzaville, mutawuni ya Republic of the Congo, wakonkhoska vo wangukuma navu wati wapasika chovyu ndi komiti yakuwona ko kwachitika masoka nga chilengedu: “Umoyu usintha mukanyengu kamanavi. Ndagwiranga ntchitu ndipu ndalondiyanga ndalama zimanavi, muwolu wangu nayu wagwira kaganyu ndipu ndalama zo talondiyanga tafiskanga kusaniya vakukhumbika pa umoyu widu. Kweni nthenda ya COVID-19 yati yayamba, tengavi so nthowa yeyosi yakuti tingasaniliya ndalama. Kweni chivwanu chidu mwaku Yehova chingudewezeka cha. Panyengu yo takambiskananga kuti tichitengi wuli kuti tisaniyengi vakukhumbika, Yehova wanguchita chinthu chinyaki kuti watiwovyi.”

Mzichi Mbuyi Ester, yo ndi choko mutawuni ya Kinshasa, wangukamba kuti: “Mulumu wangu wangutayika pati pajumpha myezi imanavi waka ndipu ndakhumbikanga kuwovyeka ukongwa. Ndigwira ntchitu cha ndipu ndakhumbikanga kuphwere ŵana atatu. Banja langu lechendajepu ndi chakurya chinandi kuti tifiski kurya kwa mazuŵa nganandi. Nditimuwonga ukongwa Yehova!”

Ndi pempheru lidu kuti Yehova walutirizgi kuphwere abali ndi azichi ŵidu ndi kutumbika ntchitu yakovya abali ko kwachitika masoka ngachilengedu. Tilindiza so nyengu yo weyosi wazamukondwa pacharu chapasi ndi chakurya chinandi.—Salimo 72:16.