Pa chiŵi August 29, 2023, Bayibolu la Charu Chifya lakunozgeka so likutuzgika mu chineneru cha Chilingala. Kusazgiyapu yapa, mabuku nganyaki nga mu Bayibolu la Charu Chifya ngakutuzgika mu Chialuri, Chinande, Chipende, Chisonge, Chituba ndi Chiurundi. Mubali Mark Sanderson, wa mu Wupu Wakulongozga, wangukamba nkhani pa Unganu Wachigaŵa wa mutu wakuti “Zikirani”! wo unguchitikiya mu sitediyamu ya Martyrs mutawuni ya Kinshasa, ku Democratic Republic of the Congo. Ndipu pa unganu wenuwu penga ŵanthu akukwana 75,715. Ŵanthu anyaki 219,457 anguwungana mu Malu nga Unganu ngakukwana 53 kweniso mu malu nganyaki ndipu angulumikiza kuziya pa video stream. Ŵanthu angulonde Bayibolu la Charu Chifya lakunozgeka so la Chilingala kweniso Bayibolu la Charu Chifya la Malemba nga Chigiriki Ngachikhristu la Chisonge. Mabayibolu ngakupulinta nga vineneru va Chialuri, Chinande, Chipende, Chituba ndi Chiurundi ngayambengi kusanirika kunthazi. Kweni Mabayibolu nga pa vipangizu va mazuŵa nganu ngangwamba kusanirika kuti ŵanthu achiti dawunilodi. Mabuku nga mu Bayibolu ngo ngakutuzgika ndi yanga:

• Ŵanthu pafufupi 1,750,000 alongoro Chialuri, ndipu aja muchigaŵa cha Mahagi

• Apharazgi 1,609 ateŵete mu mipingu 45 ya chineneru cha Chialuri

• Akaboni aku Yehova akwamba kufwatuliya mabuku mu chineneru cha Chialuri mu 2013

• Ofesi yakufwatuliyaku mabuku ye mutawuni ya Bunia

• Ŵanthu pafufupi 903,000 alongoro chineneru cha Chinande muchigaŵa cha Ituri ndipuso ku North Kivu

• Apharazgi 4,793 ateŵete mu mipingu 78 ya chineneru cha Chinande

• Akaboni aku Yehova akwamba kufwatuliya mabuku mu chineneru cha Chinande mu 1998

• Ofesi yakufwatuliyaku mabuku ye mutawuni ya Butembo

• Ŵanthu pafufupi 2 miliyoni alongoro Chipende muvigaŵa va Kasai, Kwango ndi Kwilu

• Apharazgi 3,349 ateŵete mu mipingu 88 ya chineneru cha Chipende

• Akaboni aku Yehova akwamba kufwatuliya mabuku mu chineneru cha Chipende mu 1996

• Ofesi yakufwatuliyaku mabuku ye mutawuni ya Kikwit

• Ŵanthu pafufupi 1 miliyoni alongoro chineneru cha Chisonge, ukongwa muchigaŵa cha Lomami

• Apharazgi 1,043 ateŵete mu mipingu 31 ya chineneru cha Chisonge

• Akaboni aku Yehova akwamba kufwatuliya mabuku mu chineneru cha Chisonge mu 2006

• Ofesi yakufwatuliyaku mabuku ye mutawuni ya Kinshasa

• Ŵanthu akujumpha 12 miliyoni alongoro Chituba kumwera kwa charu cha Republic of the Congo, Angola ndi ku Gabon

• Apharazgi 2,137 ateŵete mu mipingu 30 ya chineneru cha Chituba

• Ofesi yakufwatuliyaku mabuku mu chineneru cha Chituba yingwamba kugwira ntchitu ku Pointe-Noire mu 2019

• Ŵanthu akujumpha 40 miliyoni alongoro Chilingala

• Apharazgi 74,023 ateŵete mu mipingu 1,266 ya Chilingala

• Akaboni aku Yehova akwamba kufwatuliya mabuku mu Chilingala cha mu ma 1960

• Bayibolu la Charu Chifya la Chilingala lingutuzgika mu 2009

• Ofesi yakufwatuliyaku mabuku ye mutawuni ya Kinshasa

• Ŵanthu pafufupi 153,000 alongoro chineneru cha Chiurundu, ndipu anandi aja muchigaŵa cha Lualaba

• Apharazgi 553 ateŵete mu mipingu 19 ya chineneru cha Chiurundu

• Akaboni aku Yehova akwamba kufwatuliya mabuku mu chineneru cha Chiurundu mu 1994

• Ofesi yakufwatuliyaku mabuku ye mutawuni ya Kolwezi

Mabayibolu ngasonu kweniso ngakunozgeka so ngenanga, ngawovyengi ukongwa abali ndi azichi wo ateŵete mu mipingu ya vineneru venivi. Mupharazgi munyaki yo wateŵete mu mpingu wa chineneru cha Chituba wangukamba kuti: “Ŵanthu avwisiyanga cha chifukwa chakuti tagwiriskiyanga ntchitu mabuku nga chineneru chawu cha. Mwakuyeruzgiyapu, asani tiŵerenga lemba mu chineneru cha Chifurenchi ŵanthu atongapu kanthu cha. Kweni ndi Bayibolu ili, chinanga kuti munthu wangaŵa kuti wasuzgika kuŵerenga, iyu wangavwisiya ŵaka kweniso kuyanduwa ndi Mazu ngaku Chiuta.” Munthu munyaki pakuwonga Bayibolu la Charu Chifya lakunozgeka so la Chilingala wangukamba kuti: “Kuŵa ndi Bayibolu lakuvwika umampha mu uteŵeti, vija nge kuti we ndi chuma chakuti ugaŵiyi munthu weyosi yo wakumana nayu.”

Tikayika cha kuti Yehova watumbikengi phamphu la abali ndi azichi po agwiriskiya ntchitu Mabayibolu ngenanga, asani apharazgiya ŵanthu wo ‘akhumbisiska kuvwa mazu ngaku Chiuta.’—Machitidu 13:7.