Chimphepu chikulu kweniso maji ngakusapaliya vananga vinthu vinandi mucharu cha Democratic Republic of Congo, cho che muchigaŵa chapakati cha Africa. Ofesi ya Akaboni aku Yehova ku Congo (Kinshasa) yakamba kuti Akaboni aku Yehova anandi akwaskika chifukwa cha kusapaliya kwa maji. Kweni chakupaska chitima ukongwa ntchakuti mutawuni ya Kinshasa, mubali yumoza wakufwa chifukwa chakusapaliya kwa maji.

Ofesi ya nthambi ya Akaboni aku Yehova ku Congo (Kinshasa) yakamba kuti:

• Kumwera chakuzambwi muchigaŵa cha Kasai, chimphepu chikulu kweniso vuwa yanthazi yananga nyumba za mabanja 6 nga Akaboni aku Yehova.

• Nyumba ya Ufumu yo ye kunkhondi chakuzambwi muchigaŵa cha Sud-Ubangi yinguzaza maji pe. Mipingu yitatu ndiyu yigwiriskiya ntchitu Nyumba ya Ufumu yeniyi ndipu apharazgi wosi akwana 69. Mabanja 22 muchigaŵa ichi ndingu ngakukwaskika ndi ngozi iyi. Ofesi ya nthambi yingusankha mpayiniya wapade kweniso mura yumoza kuti alongozgi pa ntchitu yakupereka chovyu chakuliŵavu kweniso chakurya chauzimu kwa abali ndi azichi muchigaŵa ichi wo angukwaskika ndi ngozi yeniyi.

• Muchigaŵa cha Tshopo, abali ndi azichi wo aja mumphepeti mwa Msinji wa Congo anguŵakambiya kuti atuwemu mwaliŵiliŵi munyumba zawu. Kweniso, Nyumba ya Ufumu yimoza yinguzaza maji.

• Abali wo ŵe mu mipingu yo ye mutawuni ya Kinshasa angukamba kuti pafufupi mabanja ngakukwana 80 ngakukwaskika ndi maji ngakusapaliya.

Chifukwa chakuti kusapaliya kwa maji kwachitiska kuti malu nganandi nganangiki, vo vingachitiska kuti kubuki matenda ngakupambanapambana, ofesi ya nthambi yipereka ulongozgi wa mo angachitiya kuti aleki kuto matenda.

Chinanga kuti akumana ndi masuzgu ngenanga, abali ndi azichi awovyana ndipu apaskana vinthu vakukhumbika nge chakurya ndi vakuvwala. Makomiti Ngakovya pa Ngozi Zachilengedu ngo ngalongozgeka ndi ofesi ya nthambi nangu ngapereka chovyu.

Tiziŵa kuti mapempheru ngidu kweniso chovyu chakuliŵavu ndi chauzimu cho gulu laku Yehova lipereka ‘vipembuzgengi wosi wo aliya’ mu nyengu yakusuzga yinu.—Yesaya 61:1, 2.