Ofesi ya nthambi yasonu yizengeka ku Lubumbashi, ku Democratic Republic of the Congo. Abali ndi azichi pafufupi 260 wo ateŵete ku ofesi ya nthambi ayambengi kusamiya ku ofesi yasonu yeniyi mu May 2022, po anyaki 131 alutirizgengi kuja ku ofesi ya nthambi yo yilipu pasonu panu ku Kinshasa. a Ayamba so kuzenga nyumba zinyaki zakugonamu kweniso maofesi nganyaki pafupi ndi ofesi ya nthambi ya ku Kinshasa. Abali ndi azichi anyaki pafufupi 48 wo ateŵete pa beteli ayambengi kuja munyumba zasonu zenizi cha mu January 2024. Maofesi ndi nyumba zasonu zenizi ziwovyengi kuti chiŵerengeru cha apharazgi chikweri kweniso kuti ntchitu yakupharazga yiluti panthazi ku Congo.

Kwamba mu chaka cha uteŵeti cha 2021, abali ŵidu ku Democratic Republic of the Congo anguchitiska masambiru nga Bayibolu ngakujumpha 250,000. Ŵanthu akujumpha 1 miliyoni angusanirika pa Mwambu Wakukumbukiya Nyifwa Yaku Yesu. Pasonu panu, abali ndi azichi 394 ateŵete pa ofesi ya nthambi ya ku Kinshasa.

Chifukwa chakuti venga vakusuzga kuti abali asazgiyeku nyumba zinyaki ku Kinshasa, yiwu angwamba kupenja malu ngakuti azengepu ku matawuni nganyaki. Yiwu angusaniya malu ngamampha ku Lubumbashi ngo angazengapu ofesi yanthambi yasonu kweniso nyumba zinyaki zinandi munthazi.

Ofesi ya ku Lubumbashi ye pa mtunda wa makilomita 2,300 kutuwa ku Kinshasa. Ofesi yeniyi ye pamalu ngakukwana mahekita 12 ndipuso akuzengapu nyumba zakugonamu, maofesi, nyumba yakusungiyamu vinthu, holu yo yijengi ndi malu ngakuryiyamu kweniso malu ngakuchitiyamu masaza.

Ntchitu yakuzenga yingwamba mu November 2020, kweni ntchitu iyi yingukumana ndi masuzgu nganandi chifukwa cha mulili wa COVID-19.

Mubali Robert Elongo wa mu Komiti ya Nthambi ku Congo (Kinshasa) wangukamba kuti: “Maboda ngangujalika. Venga vakusuzga ukongwa kutumiza vinthu vakugwiriskiya ntchitu pakuzenga ndipu venivi vachitiska kuti chigaŵa chakwamba cha ntchitu iyi chito nyengu yitali ukongwa kuti chimali.”

Kweni, Mubali Elongo wangukamba kuti: “Mu chaka chimoza pe, tawona kuti 40 peresenti ya chigaŵa chakwamba cha ntchitu iyi yamala.”

Venivi vilongolore limu kuti Yehova wayitumbika ntchitu yakuzenga yeniyi. Tipemphera kuti ofesi ya nthambi kweniso nyumba zasonu zenizi zipereki ukaboni wamampha ku ŵanthu ndipuso yikankhuski zina laku Yehova Chiuta—Mateyu 24:47.