Pa 24 August 2021, Akaboni aku Yehova anguwina mulandu wakukhumbika ukongwa ku Ecuador. Khoti la Marangu lingupereka cheruzgu chakuti ŵanthu a mumuzi wa San Juan de Ilumán wo we muchigaŵa cha Imbabura, anguswa wanangwa wakusopa. Cheruzgu cho khoti lingupereka chivikiliya wanangwa wakusopa wa ŵanthu ku Ecuador, ukongwa wo aja muvigaŵa venivi ndipu ntcheruzgu chakukhumbika ukongwa cho vyaru vinyaki navu vikhumbika kugwiriskiya ntchitu.

Mu 2014, alongozgi a muchigaŵa anguluta mwankhaza ko Akaboni aku Yehova azenganga Nyumba ya Ufumu ndipu anguŵakaniza kuzenga. Yiwu angukaniza so abali ndi azichi kuti aleki kuwungana pamoza ndipuso kupharazga kunyumba ndi nyumba. Abali ŵidu anguluta ndi mulandu wenuwu ku khoti. Kweni akweruzga ŵaŵi angweruzga kuti palivi wanangwa wakusopa Akaboni wo wasweka.

Abali ŵidu ŵati ayesesa kuchita vo angafiska kuti amalisi suzgu yo yengapu, angutotole mulandu uwu ku Khoti Lakuwona va Marangu lo ndi khoti likulu ukongwa mucharu cho. Khoti Lakuwona va Marangu lenili lingukamba kuti makhoti ngamanangamana ndingungaphwanyanga marangu nga Akaboni pa nkhani yakusopa mwawanangwa. Alongozgi a muchigaŵa ndi akweruzga a makhoti ngamanangamana, anguŵakambiya kuti asere sukulu yakusambizga mo angajaliya mwa chimangu ndi visopa kweniso midawuku yakupambanapambana. Kusazgiyapu yapa, alongozgi a muchigaŵa angukambilika kuti akavikiliyi “magulu nga visopa vakupambanapambana kweniso midawuku yawu kuti akajengi mwachimangu, ukongwa akhumbika kuvikiliya vinthu vakusopa” vakukwaskana ndi Akaboni aku Yehova.

Philip Brumley yo wamiya Akaboni aku Yehova, wangukamba kuti: “Tiziŵa kuti marangu ngo ngaja muchigaŵa ngatovya kuvikiliya midawuku, kweni vakwenere cha kuti marangu ngenanga ngaswengi wanangwa wa munthu weyosi yo ngwamucharu chenicho.”

Akaboni aku Yehova ku San Juan de Ilumán mbakukondwa ukongwa chifukwa cha vo Khoti likuyeruzga.

Tikondwa kuwona ukaboni wa mo ‘janja laku Yehova’ lititiwovye asani abali ndi azichi ŵidu awina milandu yo yitiŵavikiliya kuti asopengi mwawanangwa.—Nthanthi 21:1.